ନୋଏଡା, ୨୧/୦୩ : ମୁଁ କୋଲାବ ଥାନାର ପୋଲିସ ବିଜୟ ଖନ୍ନା କହୁଛି। ତୁମ ନାଁରେ ଥାନାରେ ଅଭିଯୋଗ ହୋଇଛି। ମନି ଲଣ୍ଡ୍ରିଂ ଏବଂ ନିବେଶରେ ଠକେଇ ନେଇ କେସ୍ ହୋଇଛି। ତୁମ ଆକାଉଣ୍ଟ୍ ଫ୍ରିଜ୍ କରିଦିଆଯିବ। ତଦନ୍ତରେ ସହଯୋଗ ନକଲେ କିମ୍ବା ଗୋପନୀୟତା ରକ୍ଷା ନକଲେ ଗିରଫ ହେବ। ଏଭଳି ଫୋନ୍ କଲ୍ କରି ଜାଲ ବିଛାଉଛନ୍ତି ସାଇବର ଠକ। ଆଉ ଡିଜିଟାଲ୍ ଆରେଷ୍ଟ କରି ଠକି ନେଉଛନ୍ତି ସବୁ ଜମାପୁଞ୍ଜି। ସାଇବର୍ ଠକେଇର ଏଭଳି ଏକ ମାମଲା ସାମ୍ନାକୁ ଆସିଛି। ତେବେ ଏଥର କେହି ସାଧାରଣ ବ୍ୟକ୍ତି ନୁହଁନ୍ତି ଜଣେ ପୂର୍ବତନ ଆରବିଆଇ ଅଧିକାରୀ ସାଇବର୍ ଠକଙ୍କ ହାବୁଡ଼ରେ ପଡ଼ିଛନ୍ତି। ଉତ୍ତର ପ୍ରଦେଶ ନୋଏଡାରୁ ଏଭଳି ଘଟଣା ଘଟିଛି। ୭୮ ବର୍ଷୀୟ ଜଣେ ପୂର୍ବତନ ଆରବିଆଇ ଅଧିକାରୀଙ୍କୁ ୧୫ ଦିନ ଧରି ଡିଜିଟାଲ୍ ଆରେଷ୍ଟରେ ରଖି ସାଇବର୍ ଠକମାନେ ୩.୧୪ କୋଟି ଠକି ନେଇଛନ୍ତି। କେତେବେଳେ TRAI, ଆଉ କେତେବେଳେ ପୋଲିସ, ସିବିଆଇ ଏପରିକି ସୁପ୍ରିମକୋର୍ଟର ଅଧିକାରୀ କହି ବୃଦ୍ଧଙ୍କୁ ଚୂନା ଲଗାଇଛନ୍ତି। 

ସୂଚନାନୁଯାୟୀ, ନୋଏଡା ସେକ୍ଟର ୭୫ରେ ରହୁଥିବା ଜଣେ ବୃଦ୍ଧଙ୍କ ପାଖକୁ ଫେବୃଆରୀ ୨୫ ତାରିଖରେ ଏକ ଫୋନ କଲ୍ ଆସିଥିଲା। ନିଜକୁ କୋଲାବ ଥାନାର ପୋଲିସ ବିଜୟ ଖନ୍ନା ପରିଚୟ ଦେଇ ଏକ ମାମଲା ଥିବା କଥା କହିଥିଲେ। ଏପରିକି ତାଙ୍କୁ ଅନଲାଇନ୍ ମାଧ୍ୟମରେ ସୁପ୍ରିମକୋର୍ଟରେ ହାଜର ହେବାକୁ ପଡ଼ିବ ବୋଲି କହିଥିଲେ। ଏଥିରେ ବୃଦ୍ଧ ଜଣଙ୍କ ଭୟଭୀତ ହୋଇ ଜୀବନସାରା ରଖିଥିବା ୩କୋଟି ୧୪ ଲକ୍ଷ ଟଙ୍କା ସିକ୍ରେଟ୍ ସୁପରଭିଜନ୍ ଆକାଉଣ୍ଟରେ ଟ୍ରାନ୍ସଫର୍ କରି ଦେଇଥିଲେ। ଏହାପରେ ତାଙ୍କୁ ସୁପ୍ରିମକୋର୍ଟରୁ ଏକ ଅନଲାଇନ୍ ଅର୍ଡର କପି ମିଳିଥିଲା। ଯେଉଁଥିରେ ସେ ନିର୍ଦ୍ଦୋଶ ବୋଲି ଲେଖାଥିଲା। ହେଲେ ଏହି ଅର୍ଡର କପି ନକଲି ଥିଲା। ବୃଦ୍ଧ ଜଣଙ୍କ ଭାବିଥିଲେ ଯେ ତଦନ୍ତ ପରେ ଏହି ଟଙ୍କା ତାଙ୍କୁ ଫେରସ୍ତ କରିଦିଆଯିବ। କିନ୍ତୁ ଟଙ୍କା ନମିଳିବା ପରେ ବୃଦ୍ଧ ଜଣଙ୍କ ଜାଣି ପାରିଥିଲେ ଯେ, ତାଙ୍କ ସହ ଠକେଇ ହୋଇଛି। ଏହାପରେ ସେ ସାଇବର୍ ଅପରାଧ ପୋର୍ଟାଲରେ ଅଭିଯୋଗ କରିଥିଲେ। ଏବେ ମାମଲାର ତଦନ୍ତ ଚାଲିଛି। 

ସୂଚନା ଥାଉକି, ସାଇବର୍ ଠକମାନେ ବୃଦ୍ଧ ଦମ୍ପତିଙ୍କୁ ଭିଡିଓ କନଫରେନ୍ସିଂ ଜରିଆରେ ପ୍ରାୟ ୧୫ ଦିନ ଧରି ଡିଜିଟାଲ୍ ଆରେଷ୍ଟ କରି ରଖିଥିଲେ। ସେମାନଙ୍କୁ କେବଳ ଖାଇବା ପିଇବା ପାଇଁ ଅନୁମତି ଥିଲା। ଏପରିକି କାହା ସହ କଥା ହେବା ପାଇଁ ବାରଣ କରାଯାଇଥିଲା। ଏସମ୍ପର୍କରେ ଆଉ କାହା ସହ ଆଲୋଚନା କଲେ ଗିରଫ ହେବେ ବୋଲି ଧମକ ବି ଦିଆଯାଇଥିଲା। 

ଏହି ଖବରଟିକୁ ପଢନ୍ତୁ-ବିଚାରପତିଙ୍କ ବଙ୍ଗଳାରେ ଲାଗିଲା ନିଆଁ, ମିଳିଲା ଟଙ୍କାର ପାହାଡ଼, ନ୍ୟାୟ ବ୍ୟବସ୍ଥା ଉପରେ ଉଠିଲା ପ୍ରଶ୍ନ