ନୂଆଦିଲ୍ଲୀ: ଉତ୍ତରାଖଣ୍ଡର ଚାମୋଲି ଜିଲ୍ଲାର ନନ୍ଦାନଗର ଘାଟ ଅଞ୍ଚଳରେ ଗତ ବୁଧବାର ବାଦଲଫଟା ବର୍ଷା ଯୋଗୁଁ ହୋଇଥିବା ବ୍ୟାପକ କ୍ଷୟକ୍ଷତି ଏବେ ଯାଏଁ କମିନାହିଁ। ରିଲିଫ୍ ଏବଂ ଉଦ୍ଧାରକାରୀ ଦଳ ଅକ୍ଲାନ୍ତ ପରିଶ୍ରମ କରୁଛନ୍ତି। ପ୍ରଶାସନ ଅନୁଯାୟୀ, ବିପର୍ଯ୍ୟୟରେ ଏପର୍ଯ୍ୟନ୍ତ ୭ ଜଣଙ୍କର ମୃତ୍ୟୁ ହୋଇଛି। ଏହା ସହିତ, ଅନ୍ୟ ୧୧ ଜଣ ଆହତ ହୋଇଛନ୍ତି, ଯେଉଁଥିରେ ଜଣେ ଶିଶୁ ମଧ୍ୟ ଅଛନ୍ତି ଯାହାକୁ ଗୁରୁତର ଅବସ୍ଥାରେ AIIMS ଋଷିକେଶକୁ ରେଫର କରାଯାଇଛି। ବାକି ଆହତ ମାନଙ୍କୁ ସ୍ଥାନୀୟ ହସ୍ପିଟାଲ ଏବଂ ଶ୍ରୀନଗରରେ ଚିକିତ୍ସା କରାଯାଉଛି।
ବିପର୍ଯ୍ୟୟ ପରିଚାଳନା ଏବଂ ପୁନର୍ବାସ ସଚିବ ବିନୋଦ କୁମାର ସୁମନ ସମ୍ବାଦ ସଂସ୍ଥା ANIକୁ କହିଛନ୍ତି ଯେ, ଏହି ଘଟଣାରେ ୪୫ କୋଠା ଏବଂ ୧୫ ଗୋ ଆଶ୍ରୟସ୍ଥଳ ପ୍ରଭାବିତ ହୋଇଛି। ୪ ପ୍ରାଣୀଙ୍କ ମୃତ୍ୟୁ ହୋଇଛି ଏବଂ ୨୮ ଜଣ ନିଖୋଜ ଅଛନ୍ତି ବୋଲି ଜଣାପଡ଼ିଛି।
ଚାମୋଲି ଜିଲ୍ଲାର ନନ୍ଦାନଗର ଅଞ୍ଚଳର କୁନ୍ତରୀ ଲଗାଫାଲି ୱାର୍ଡରେ ଛଅଟି ଘର ମାଟି ତଳେ ପୋତି ହୋଇଯାଇଥିଲା । ଭଗ୍ନାବଶେଷ ଏବଂ ବର୍ଷା ଯୋଗୁଁ ଆହୁରି ଅନେକ ଘର କ୍ଷତିଗ୍ରସ୍ତ ହୋଇଛି। ପ୍ରଭାବିତ ଅଞ୍ଚଳର ଲୋକ ମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। NDRF, SDRF, ITBP, ସ୍ଥାନୀୟ ପୋଲିସ ଏବଂ ନାଗରିକ ପ୍ରଶାସନର ଦଳ ନିରନ୍ତର ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ଏପର୍ଯ୍ୟନ୍ତ ଜଣେ ବ୍ୟକ୍ତିଙ୍କୁ ଜୀବିତ ଉଦ୍ଧାର କରାଯାଇଛି ଏବଂ ସାତଟି ମୃତଦେହ ଉଦ୍ଧାର କରାଯାଇଛି। ପାଞ୍ଚଟି ଗୋରୁଙ୍କୁ ମଧ୍ୟ ସୁରକ୍ଷିତ ଭାବରେ ସ୍ଥାନାନ୍ତର କରାଯାଇଛି।
ପ୍ରଭାବିତ ପରିବାରକୁ ରିଲିଫ୍ ସାମଗ୍ରୀ ପହଞ୍ଚାଇବା କାର୍ଯ୍ୟ ମଧ୍ୟ ଜାରି ରହିଛି। ହେଲିକପ୍ଟର ଦ୍ୱାରା କିଛି ଅତ୍ୟାବଶ୍ୟକୀୟ ସାମଗ୍ରୀ ପହଞ୍ଚାଯାଇଛି। ପ୍ରଶାସନ କହିଛି ଯେ,ଆବଶ୍ୟକ ହେଲେ ଅଧିକ ସହାୟତା ପଠାଯିବ।
