ବୌଦ୍ଧ ୦୧/୧୨: ବୌଦ୍ଧ ଜିଲ୍ଲାରେ ଜିଲ୍ଲା ପୋଲିସ୍ ପକ୍ଷରୁ ଅପରେସନ ଗ୍ରୀନ କ୍ଲିନ୍ ଅଭିଯାନକୁ ଜୋରଦାର କରାଯାଇଛି। ବୌଦ୍ଧ ଜିଲ୍ଲାରୁ ସମ୍ପୂର୍ଣ୍ଣ ଭାବେ ବେଆଇନ ଗଞ୍ଜେଇ ଚାଷକୁ ନଷ୍ଟ କରିବାକୁ ଏସପି ନାଗରାଜ୍ ଦେବରକୋଣ୍ଡାଙ୍କ ନିର୍ଦ୍ଦେଶକ୍ରମେ ପ୍ରତ୍ୟେକ ଦିନ ଚାଲିଛି ଗଞ୍ଜେଇ ଗଛ କଟା ଅଭିଯାନ। ପ୍ରଥମେ ଡ୍ରୋନ୍ ମାଧ୍ୟମରେ ଉକ୍ତ ବେଆଇନ ଗଞ୍ଜେଇ ଚାଷ ଅଞ୍ଚଳକୁ ଚିହ୍ନଟ କରାଯାଇ ସେହି ଅଞ୍ଚଳରେ ଉକ୍ତ ଥାନା ଅଧିକାରୀଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ଚଢାଉ କରାଯାଉଛି । ଗଛ କଟା ମେସିନ ସାହାଯ୍ୟରେ ଗଞ୍ଜେଇ ଗଛ ଗୁଡ଼ିକୁ କାଟି ସମ୍ପୂର୍ଣ ଭାବେ ପୋଡ଼ି ନଷ୍ଟ କରାଯାଉଛି। ପ୍ରତ୍ୟେକ ଦିନ ଏହି ଭଳି ଭାବେ ଅପରେସନ ଗ୍ରୀନ କ୍ଲିନ୍ ଅଭିଯାନ ଚାଲିଥିବ ବେଳେ ପୁଣି ୧୩ କୋଟି ଟଙ୍କାର ଗଞ୍ଜେଇ ଗଛ ପୋଡ଼ି ନଷ୍ଟ କରିଛି ପୋଲିସ।
ବୌଦ୍ଧ ଜିଲ୍ଲା ଆଦର୍ଶ ଥାନା ଓ କଣ୍ଟାମାଳ ଥାନା ଅଞ୍ଚଳରେ ସଂପୃକ୍ତ ଥାନା ଅଧିକାରୀଙ୍କ ନେତୃତ୍ୱରେ ଟିମ୍ ଗଠନ କରାଯାଇ ବେଆଇନ ଗଞ୍ଜେଇ ଚାଷ ଉପରେ ଚଢ଼ାଉ କରାଯାଇ ୧୩୦ ଏକର ଜମିରୁ ପ୍ରାୟ ୧ ଲକ୍ଷ ୩୫ ହଜାରରୁ ଉର୍ଦ୍ଧ୍ବ ଗଞ୍ଜେଇ ଗଛ ପୋଡ଼ି ନଷ୍ଟ କରିଛି ପୋଲିସ। ଆଦର୍ଶ ଥାନା ଦେବନ୍ଧ ଗ୍ରାମ ରୁ ୪୫ ଏକର ଓ କଣ୍ଟାମାଳ ଥାନା ମାହାର ପଡ଼ା ଜଙ୍ଗଲରୁ ୭୫ ଏକର ଗଞ୍ଜେଇ ଗଛ କାଟି ନଷ୍ଟ କରିଛି ପୋଲିସ ।
