ଭୁବନେଶ୍ୱର,୦୯/୦୧: ଆସନ୍ତା ୧୩ ତାରିଖରୁ ଉତ୍ତରପ୍ରଦେଶର ପ୍ରୟାଗରାଜରେ ମହାକୁମ୍ଭ ମେଳା ଆରମ୍ଭ ହେଉଛି । କୁମ୍ଭମେଳାକୁ ତୀର୍ଥଯାତ୍ରୀମାନେ ସହଜରେ ପହଞ୍ଚିବାକୁ ଓଡିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆରଟିସି) ପକ୍ଷରୁ ହାଇ-ଏଣ୍ଡ ପ୍ରିମିୟମ୍ ବସ୍ ସେବା ଆରମ୍ଭ ହୋଇଛି । ପୁରୀରୁ ଅଯୋଧ୍ୟାକୁ ବସ୍ ଗଡୁଥିବା ବେଳେ କୁମ୍ଭମେଳା ପାଇଁ ଅନ୍ୟ ୩ଟି ସହରରୁ ଅଯୋଧ୍ୟାକୁ ଯାତାୟାତ କରିବ ।
ଆସନ୍ତା ୧୩ରୁ ଫେବ୍ରୁଆରୀ ୨୬ ତାରିଖ ଯାଏଁ ଏହି ସ୍ୱତନ୍ତ୍ର ଭଲ୍ଭୋ ବସ ପୁରୀ, ସମ୍ବଲପୁର, ଭବାନୀପାଟଣା ଓ ବ୍ରହ୍ମପୁର ସହରରୁ ଉତ୍ତରପ୍ରଦେଶର ଅଯୋଧ୍ୟାକୁ ଯିବ । ପ୍ରତି ରୁଟ୍ରେ ୨ଟି ଲେଖାଏଁ ବସ୍ ଯିବା ଆସିବା ବ୍ୟବସ୍ଥା ହୋଇଛି । ଯାତ୍ରୀମାନେ osrtc.org ୱେବ୍ସାଇଟ୍ କିମ୍ବା ଓଏସ୍ଆର୍ଟିସି ଆପ୍ ଜରିଆରେ ଟିକେଟ୍ ବୁକିଂ କରି ପାରିବେ । ନଚେତ୍, ଏସବୁ ବସଷ୍ଟାଣ୍ଡରେ ଥିବା ଓଏସ୍ଆର୍ଟିସିର ଟିକେଟ୍ କାଉଣ୍ଟରରେ ମଧ୍ୟ ଟିକେଟ୍ କାଟିହେବ । ଯାତ୍ରୀଙ୍କ ସହାୟତା ପାଇଁ ୨୪ ଘଣ୍ଟିଆ ହେଲ୍ପଲାଇନ ନଂ (୧୮୦୦-୩୪୫-୧୧୨୨) ଓ ଏକ ହ୍ୱାଟସ୍ଆପ୍ ନଂ (୭୮୪୯୦୦୫୨୨୦୫) ଜାରି କରାଯାଇଛି ।
ଓଏସ୍ଆର୍ଟିସି ପକ୍ଷରୁ ସୂଚନା ଦିଆଯାଇଛି ଯେ, ମହିଳା ତୀର୍ଥଯାତ୍ରୀଙ୍କ ପାଇଁ ଟିକେଟ୍ ଦର ୫୦ ପ୍ରତିଶତ କମ ରହିବ। ବସ୍ଟି ଅଯୋଧ୍ୟାରେ ପହଞ୍ଚିବା ପରେ ଗୋଟିଏ ଦିନ ପାଇଁ ସେଠାରେ ରହିବ । ସେହି ବସ୍ରେ ହିଁ ତୀର୍ଥଯାତ୍ରୀମାନେ ଘରକୁ ଫେରିବେ । ବସ୍ରେ ସ୍ଲିପର ଓ ସେମି ସ୍ଲିପର ସୁବିଧା ରହିଛି । ଯାତ୍ରୀମାନେ ମୋବାଇଲ ଚାର୍ଜ କରିପାରିବେ । ଆରାମଦାୟକ ଯାତ୍ରା ପାଇଁ ବସ୍ ଭିତରେ ସ୍ଲିପର୍ ସିଟ୍, ମୋବାଇଲ୍ ଚାର୍ଜିଂ ପଏଣ୍ଟ ଓ ଉନ୍ନତ ସ୍ଥିରତା ପାଇଁ ଲମ୍ବା ହ୍ୱିଲ୍ ବେସ୍ ବ୍ୟବସ୍ଥା ରହିଛି । ଯାତ୍ରୀମାନଙ୍କ ସୁରକ୍ଷା ପାଇଁ ଅଗ୍ନି ସୁରକ୍ଷା ବ୍ୟବସ୍ଥା, ଲାଇଭ୍ ଯାନ ଟ୍ରାକିଂ, ପ୍ୟାନିକ୍ ବଟନ୍ ଖଞ୍ଜାଯାଇଛି । ଯଦି ଅଧାବାଟରେ ବସ୍ଟି ଖରାପ ହୋଇଯାଏ, ଆଉ ଏକ ସ୍ପେୟାରିଂ ବସ୍ ଭୁବନେଶ୍ୱରରୁ ଅଘଟଣସ୍ଥଳକୁ ବାହାରିବ ।
ସୂଚନାଯୋଗ୍ୟ, ଡିସେମ୍ବର ୧୨ ତାରିଖରେ ପ୍ରଥମ ଦଫାରେ ପୁରୀରୁ ଅଯୋଧ୍ୟା ଧାମ ଓ ପୁରୀରୁ ତିରୁପତିକୁ ୪ଟି ବସ୍ ଗଡି଼ଥିଲା । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଲୋକସେବା ଭବନରୁ ଭର୍ଚୁଆଲ୍ ମାଧ୍ୟମରେ ଏହାର ଉଦ୍ଘାଟନ କରିଥିଲେ । ସପ୍ତାହକୁ ୨ ଥର ପୁରୀରୁ ୨ ତୀର୍ଥଧାମକୁ ବସ୍ ଯା’ ଆସ କରୁଛି । ପରବର୍ତ୍ତୀ ସମୟରେ ଇନ୍ଦୋର ମହାକାଳେଶ୍ୱର, ମଥୁରା, ବୃନ୍ଦାବନକୁ ମଧ୍ୟ ବସ୍ ଗଡି଼ବ ବୋଲି ଯୋଜନା ଥିଲା ।
