ନୂଆଦିଲ୍ଲୀ: ଆମେରିକା ସଂସଦର ବାଚସ୍ପତି ମାଇକ ଜନସନ ଭାରତକୁ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଂଶୀଦାର ବୋଲି ବର୍ଣ୍ଣନା କରିଛନ୍ତି। ସେ ଆତଙ୍କବାଦ ବିରୋଧୀ ଲଢ଼େଇରେ ଭାରତକୁ ପୂର୍ଣ୍ଣ ସହଯୋଗର ପ୍ରତିଶ୍ରୁତି ଦେଇଛନ୍ତି। ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣ ପରେ ତାଙ୍କର ଏହି ବିବୃତ୍ତି ଆସିଛି, ଯେଉଁଥିରେ ୨୬ ଜଣ ପ୍ରାଣ ହରାଇଥିଲେ। ମାଇକ ଜନସନ କ୍ୟାପିଟାଲ ହିଲରେ କଂଗ୍ରେସର ଏକ ବ୍ରିଫିଂ ସମୟରେ କହିଥିଲେ ଯେ, ଭାରତ ଆମ ପାଇଁ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଂଶୀଦାର। ଆମେ ତାଙ୍କୁ ସମର୍ଥନ କରିବାକୁ ଯଥାସମ୍ଭବ ଚେଷ୍ଟା କରିବୁ। ମାଇକ୍ ଜନସନଙ୍କ ଦ୍ୱାରା ଦିଆଯାଇଥିବା ବିବୃତ୍ତି ଭାରତ-ଆମେରିକା କୂଟନୈତିକ ସମ୍ପର୍କକୁ ନୂତନ ଶକ୍ତି ପ୍ରଦାନ କରୁଛି। ବିଶେଷକରି ଯେତେବେଳେ ଭାରତ ଦଶନ୍ଧି ଧରି ସୀମାପାର ଆତଙ୍କବାଦର ସମ୍ମୁଖୀନ ହେଉଛି।

ସୂଚନାଥାଉକି, ଏପ୍ରିଲ ୨୨ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ଡୋନାଲ୍ଡ ଟ୍ରମ୍ପ ପ୍ରଶାସନ ତୁରନ୍ତ ପ୍ରତିକ୍ରିୟା ପ୍ରକାଶ କରି ଭାରତକୁ ସମର୍ଥନ ଜଣାଇଥିଲା। ଏପ୍ରିଲ ୨୩ରେ ରାଷ୍ଟ୍ରପତି ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଫୋନ୍ ଯୋଗେ କଥା ହୋଇଥିଲେ। ଆଉ ପୀଡିତଙ୍କ ପ୍ରତି ଗଭୀର ସମବେଦନା ଜଣାଇଥିଲେ। ଟ୍ରମ୍ପ X ରେ ଏକ ପୋଷ୍ଟ ମାଧ୍ୟମରେ କହିଥିଲେ ଯେ, ଭାରତ ଏବଂ ଆମେରିକା ଆତଙ୍କବାଦ ବିରୋଧୀ ଲଢ଼େଇରେ ଏକାଠି ଛିଡା ହୋଇଛନ୍ତି। ଏହା ଏକ ଜଘନ୍ୟ ଆକ୍ରମଣ ଥିଲା ଏବଂ ଏହାର ଅପରାଧୀ ମାନଙ୍କୁ କଠୋର ଦଣ୍ଡ ଦିଆଯିବ। ଏହି ବିବୃତ୍ତି ସ୍ପଷ୍ଟ କରୁଛି ଯେ ଆମେରିକା ରଣନୈତିକ ଦୃଷ୍ଟିରୁ ମଧ୍ୟ ଭାରତ ସହିତ ଠିଆ ହୋଇଛି। 

ଏପ୍ରିଲ ୩୦ ତାରିଖରେ, ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କରଙ୍କୁ ଭେଟି ଆତଙ୍କବାଦ ବିରୋଧରେ ସହଯୋଗକୁ ଦୋହରାଇଥିଲେ।