ନୂଆଦିଲ୍ଲୀ,୦୬/୦୪: ମ୍ୟାଚ ଚାଲିଥିଲା । ୩୨ତମ୍ ଓଭରରେ ବୋଲର ବୋଲିଂ କରିବାକୁ ପ୍ରସ୍ତୁତ ହେଉଥିଲେ । ଏହି ସମୟରେ ଧୋକା ଦେଇ ଦେଲା ଫ୍ଲଡ଼ ଲାଇଟ୍ । ଅନ୍ଧାର ହୋଇଗଲା ଓଭାଲ ଷ୍ଟାଡ଼ିୟମ । ସୋସିଆଲ ମିଡ଼ିଆରେ ଉକ୍ତ ସମୟର ଭିଡ଼ିଓ ଭାଇରାଲ ହେଉଛି । ଯେଉଁଥିଲେ ଭିନ୍ନ ଭିନ୍ନ କମେଣ୍ଟ କରୁଛନ୍ତି ୟୁଜର୍ସ । ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ତୃତୀୟ ଦିନିକିଆ ମ୍ୟାଚରେ କିଛି ଏପରି ପରିସ୍ଥିତି ସୃଷ୍ଟି ହୋଇଥିଲା । ପାକିସ୍ତାନ ବିପକ୍ଷରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜକୁ କ୍ଲିନ୍ ସୁଇପ୍ କରି ନେଇଛି କିୱି ଦଳ । ତୃତୀୟ ତଥା ଅନ୍ତିମ ଦିନିକିଆରେ ପାକିସ୍ତାନକୁ ୪୩ ରନରେ ହରାଇଛି ନ୍ୟୁଜିଲାଣ୍ଡ ।
ପାକିସ୍ତାନ ବିପକ୍ଷରେ ଘରୋଇ ନ୍ୟୁଜିଲାଣ୍ଡ ୩-୦ରେ ଦିନିକିଆ ସିରିଜ ମୂଳପୋଛ କରିଛି । ଶନିବାର ଅନ୍ତିମ ମ୍ୟାଚ୍ରେ ଦଳ ୪୩ ରନ୍ରେ ପାକିସ୍ତାନକୁ ପରାଜିତ କରିଥିଲା । ମାଇକେଲ ବ୍ରେସୱେଲଙ୍କ ଅଲରାଉଣ୍ଡ୍ ପ୍ରଦର୍ଶନ ଏବଂ ବେନ୍ ସିୟର୍ସଙ୍କ ଘାତକ ବୋଲିଂ ବଳରେ ଦଳର ବିଜୟ ସହଜ ହୋଇଥିଲା । ବ୍ରେସୱେଲ (୫୯ରନ୍, ୧ ୱିକେଟ୍) ପ୍ଲେୟାର ଅଫ୍ ଦ ମ୍ୟାଚ୍ ଓ ସିୟର୍ସ (ମୋଟ ୧୦ୱିକେଟ୍) ପ୍ଲେୟାର ଅଫ୍ ଦ ସିରିଜ ବିବେଚିତ ହୋଇଥିଲେ । ବ୍ୟାଟିଂ ଆମନ୍ତ୍ରଣ ପାଇ ନ୍ୟୁଜିଲାଣ୍ଡ ନିର୍ଦ୍ଧାରିତ ୪୨ଓଭରରେ ୮/୨୬୪ରନ୍ ସଂଗ୍ରହ କରିଥିଲା । ରିସ୍ ମାରିଉ ୫୮, ହେନରୀ ନିକୋଲ୍ସ ୩୧, ଡାରିଲ ମିଚେଲ ୪୩, ଟିମ୍ ସାଇଫର୍ଟ ୨୬, ବ୍ରେସୱେଲ ୫୯ରନ୍ କରିଥିଲେ ।
ଅଧିକ ପଢନ୍ତୁ...IPL 2025: ଆଜି ସନରାଇଜର୍ସ ହାଇଦ୍ରାବାଦକୁ ଭେଟିବ ଗୁଜରାଟ ଟାଇଟନ୍ସ, ସଂଘର୍ଷପୂର୍ଣ୍ଣ ହେବ ମ୍ୟାଚ୍
ପାକିସ୍ତାନର ଅକିଫ୍ ଜାଭେଦ ୪ଟି ୱିକେଟ୍ ନେଇଥିଲେ । ୨୬୫ରନ୍ ବିଜୟ ଲକ୍ଷ୍ୟର ପିଛା କରି ପାକିସ୍ତାନ ୪୦ ଓଭରରେ ସମସ୍ତ ୱିକେଟ୍ ହରାଇ ୨୨୧ରନ୍ କରିବାକୁ ସକ୍ଷମ ହୋଇଥିଲା । ଅବଦୁଲ୍ଲା ସଫିକ୍ ୩୩, ବାବର ଆଜମ ୫୦, ମହମ୍ମଦ ରିଜୱାନ ୩୭, ତୟାବ ତାହିର ୩୩ରନ୍ କରିଥିଲେ । ନ୍ୟୁଜିଲାଣ୍ଡ ପକ୍ଷରୁ ସିୟର୍ସ ୫ଟି ୱିକେଟ୍ ଅକ୍ତିଆର କରିଥିଲେ । ସୂଚନାଯୋଗ୍ୟ, ଏହି ମ୍ୟାଚ୍ ବେଳେ ପାକିସ୍ତାନ ଇନିଂସ୍ର ୩୯ତମ ଓଭରରେ ଷ୍ଟାଡିୟମର ସମସ୍ତ ଫ୍ଲଡଲାଇଟ୍ କଟି ଯାଇଥିଲା । ଯାହାକୁ ନେଇ ଉଭୟ ଦଳର ଖେଳାଳି ଚକିତ ହୋଇଯାଇଥିଲେ ।
