ରମଜାନରେ ପାକିସ୍ତାନ ବଢାଇଲା ଭାରତ ଆଡକୁ ବନ୍ଧୁତ୍ବର ହାତ, କରିଲା ଏହି କାମ
ନୂଆଦିଲ୍ଲୀ,୩୧।୩: ଭାରତ-ପାକିସ୍ତାନ ସମ୍ପର୍କରେ ବିବାଦ ଭିତରେ ରମଜାନ ମାସରେ ଏକ ସକରାତ୍ମକ ଖବର ସାମନାକୁ ଆସିଛି। ପାକିସ୍ତାନର ବୈଦେଶିକ ମନ୍ତ୍ରୀ ବିଲାଓ୍ବଲ ଭୁଟ୍ଟୋ ଜର୍ଦାରୀ ଗୁରୁବାର ବୈଦେଶିକ ମନ୍ତ୍ରଣାଳୟରେ ଆୟୋଜିତ ଇଫତାର ରାତ୍ରଭୋଜନରେ ଜଣେ ଭାରତୀୟ ରାଷ୍ଟ୍ରଦୂତଙ୍କୁ ନିମନ୍ତ୍ରଣ ପଠାଇଥିଲେ, ଯାହାକୁ ଭାରତୀୟ ରାଷ୍ଟ୍ରଦୂତ ସ୍ବୀକାର କରିଥିଲେ। ପାକିସ୍ତାନ ପକ୍ଷରୁ ଭାରତର ହାଇକମିଶନର ନିମନ୍ତ୍ରଣ ପଠାଇଥିଲେ, କିନ୍ତୁ ସେ ପାକିସ୍ତାନରେ ନଥିବା କାରଣରୁ ଭାରତର ବରିଷ୍ଠ ରାଷ୍ଟ୍ରଦୂତ ଇଫତାରରେ ସାମିଲ ହୋଇଥିଲେ।
ପାକିସ୍ତାନର ଖବର କାଗଜ ‘ ଦ ଏକ୍ସପ୍ରେସ୍ ଟ୍ରିବ୍ୟୁନ୍’କହିଛି, ବିଲାଓ୍ବଲ ଭୁଟ୍ଟୋ ରାଜଧାନୀ ଇସ୍ଲାମାବାଦ ସ୍ଥିତ ଦୂତାବାସ ସହିତ ଭାରତୀୟ ରାଷ୍ଟ୍ରଦୂତଙ୍କୁ ଇଫତାର ପାର୍ଟି ପାଇଁ ନିମନ୍ତ୍ରଣ ପଠାଇଥିଲେ। ଭାରତର ନିମନ୍ତ୍ରଣ ସ୍ବୀକାର କରିଥିଲା ଓ ତାଙ୍କର ବରିଷ୍ଠ ରାଷ୍ଟ୍ରଦୂତ ବୈଦେଶିକ ମନ୍ତ୍ରଣାଳୟରେ ଇଫତାର ପାର୍ଟିରେ ଭାଗ ନେଇଥିଲେ।
ଉଲ୍ଲେଖନୀୟ ଯେ, ସାଧାରଣତଃ ଭାରତ-ପାକିସ୍ତାନ ଏଭଳି ସମାରୋହରେ ପରସ୍ପରକୁ ଆମନ୍ତ୍ରଣ କରିନଥାନ୍ତି, କିନ୍ତୁ ଇଫତାର ଡିନରରେ ଜଣେ ଭାରତୀୟ ରାଷ୍ଟ୍ରଦୂତ ସାମିଲ ହୋଇଛନ୍ତି। ଏହି କଥାରୁ ସଙ୍କେତ ମିଳୁଛି ପାକିସ୍ତାନ ପ୍ରତିରକ୍ଷା ଓ ବୈଦେଶିକ ମନ୍ତ୍ରୀ ଆଗାମୀ ସଙ୍ଘାଇ ସହଯୋଗ ସଂଗଠନ(ଏସସିଓ) ବୈଠକରେ ଭାଗ ନିଅନ୍ତି ଯଦି ତେବେ ଦୁଇ ଦେଶ ଭିତରେ ଉଚ୍ଚସ୍ତରୀୟ ଆଲୋଚନାର ସମ୍ଭାବନା ରହିପାରେ। ଏସସିଓର ଋଷ, ଭାରତ, ଚୀନ୍, ପାକିସ୍ତାନ, କଜାକିସ୍ତାନ, କିର୍ଗିସ୍ତାନ, ତଜାକିସ୍ତାନ ଓ ଉଜବେକିସ୍ତାନ ସାମିଲ ହେବେ। ଏହି ସମ୍ମିଳନୀର ଅଧ୍ୟକ୍ଷା କରିବ ଭାରତ।
