ନୂଆଦିଲ୍ଲୀ ୧୯/୦୫: ପାକିସ୍ତାନର ଘୃଣ୍ୟ କାର୍ଯ୍ୟର ପର୍ଦ୍ଦାଫାସ। ସାଧାରଣ ନାଗରିକଙ୍କ ସହିତ ଧାର୍ମିକ ସ୍ଥଳକୁ ଟାର୍ଗେଟ୍ କରିଥିଲା ପାକିସ୍ତାନ। ସ୍ୱର୍ଣ୍ଣ ମନ୍ଦିରକୁ ଉଡ଼ାଇ ଦେବାକୁ ରଚିଥିଲା ଷଡଯନ୍ତ୍ର । ହେଲେ ତା'ର ସବୁ ଚେଷ୍ଟାକୁ ବିଫଳ କରିଥିଲେ ଭାରତୀୟ ସେନା। ଏନେଇ ଏକ ନୂତନ ରିପୋର୍ଟରେ ଏଏନଆଇ ଖୁଲାସା କରିଛି ।
ଭାରତ 'ଅପରେସନ ସିନ୍ଦୂର' ମାଧ୍ୟମରେ ପାକିସ୍ତାନରେ ବଢ଼ୁଥିବା ଆତଙ୍କବାଦୀଙ୍କୁ ଉଚିତ୍ ଶିକ୍ଷା ଦେଇଥିଲା । କିନ୍ତୁ ତଥାପି ନିଜ ହରକତ ଛାଡି ନଥିଲା ପାକିସ୍ତାନ । ମେ ୭ ଓ ୮ ରାତିରେ ସେ ଭାରତର ଅନେକ ସହର ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। ଅମୃତସରର ସ୍ୱର୍ଣ୍ଣ ମନ୍ଦିର ମଧ୍ୟ ପାକିସ୍ତାନର ଟାର୍ଗେଟରେ ଥିଲା, କିନ୍ତୁ ଭାରତୀୟ ସେନା ପାକ୍ର ହୀନ ଯୋଜନାକୁ ପଣ୍ଡ କରିଦେଇଥିଲା।
ଏଏନଆଇର ରିପୋର୍ଟ ଅନୁଯାୟୀ, ମେଜର ଜେନେରାଲ କାର୍ତ୍ତିକ ସି ଶେଷାଦ୍ରି ପାକିସ୍ତାନର ଏହି ଘୃଣ୍ୟ କାର୍ଯ୍ୟର ପର୍ଦ୍ଦାଫାସ କରିଛନ୍ତି। ସେ କହିଛନ୍ତି ଯେ ପାକିସ୍ତାନୀ ସେନା ଅମୃତସରର ସ୍ୱର୍ଣ୍ଣ ମନ୍ଦିର ଉପରେ ଡ୍ରୋନ୍ ସାହାଯ୍ୟରେ ଆକ୍ରମଣ କରିବାକୁ ଚେଷ୍ଟା କରିଥିଲା, କିନ୍ତୁ ଭାରତୀୟ ସେନା ପାକିସ୍ତାନର ସମସ୍ତ ଆକ୍ରମଣକୁ ବିଫଳ କରିଥିଲା । ପାକିସ୍ତାନ ସାଧାରଣ ନାଗରିକଙ୍କ ସହିତ ଧାର୍ମିକ ସ୍ଥଳଗୁଡ଼ିକୁ ମଧ୍ୟ ଟାର୍ଗେଟ କରିବାକୁ ଚେଷ୍ଟା କରିଥିଲା। ତେବେ ପାକିସ୍ତାନ ଅମୃତସର ସହିତ, ଜମ୍ମୁ, ଶ୍ରୀନଗର, ପଠାନକୋଟ, ଜଳନ୍ଧର, ଲୁଧିଆନା, ଚଣ୍ଡିଗଡ଼ ଏବଂ ଭୁଜକୁ ଟାର୍ଗେଟ କରିଥିଲା। ଏହା ବ୍ୟତୀତ ସେ ଭାରତର ଅନ୍ୟ ସହର ଉପରେ ମଧ୍ୟ ଆକ୍ରମଣ କରିବାକୁ ଚେଷ୍ଟା କରିଥିଲା।
