ପ୍ରମୂଖ ଖବର
  • ମେକ୍ସିକୋ ଏବଂ ଇୟୁ ଉପରେ ଟାରିଫ୍‌ ବୋମା ପକାଇଲେ ଟ୍ରମ୍ପ, ଲାଗିବ ୩୦ ପ୍ରତିଶତ ଶୁଳ୍କ
  • ||
  • ପ୍ରଥମ ଥର ଟି-୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କଲା ଇଟାଲୀ, ନେଦରଲ୍ୟାଣ୍ଡସକୁ ବି ମିଳିଲା ସୁଯୋଗ
  • ||
  • ଏଫଏମ କଲେଜ ଛାତ୍ରୀ ଆତ୍ମହତ୍ୟା ଉଦ୍ୟମ ଘଟଣା ; କଲେଜ ଅଧ୍ୟକ୍ଷ ନିଲମ୍ବିତ, ଏଚଓଡି ଗିରଫ
  • ||
  • ବ୍ରହ୍ମପୁର ରେଳ ଷ୍ଟେସନରୁ ୨ ଜଣଙ୍କ ମୃତଦେହ ଉଦ୍ଧାର, ବିଷ ପିଇ ଜୀବନ ହାରିଥିବା ସନ୍ଦେହ
  • ||
  • ନୀଳଗିରି ବ୍ଲକ ତେଲିପାଳ ପଞ୍ଚାୟତ ଋଷିଆ କେନାଲରେ ଅଘଟଣ, ବଜ୍ରପାତରେ ୩ ମୃତ
  • ||
  • କଟକ: ଓସିଏ କନ୍‌ଫରେନ୍ସ ହଲ୍‌ରେ ଅଗ୍ନିକାଣ୍ଡ , କାରଣ ଅସ୍ପଷ୍ଟ
  • ||
  • ଅସହ୍ୟ ହେଲା ଅଧ୍ୟାପକଙ୍କ ନିର୍ଯାତନା, ଦେହରେ ପେଟ୍ରୋଲ ଢାଳି ନିଆଁ ଲଗାଇଲେ ଛାତ୍ରୀ, ଉଦ୍ଧାର କରିବାକୁ ଯାଇ ଛାତ୍ର ଗୁରୁତର
  • ||
  • ରାୟଗଡ଼ା : କଞ୍ଜାମଯୋଡି ଗ୍ରାମରେ କଙ୍ଗାରୁକୋର୍ଟ ଘଟଣା: ରାୟଗଡ଼ା ଉପଜିଲ୍ଲାପାଳଙ୍କ ତଦନ୍ତ ନିର୍ଦ୍ଦେଶ
  • ||
  • ଅନୁଗୁଳ : ସାପ କାମୁଡ଼ାରେ ନାବାଳକ ମୃତ
  • ||
  • କଟକ : ପାରିବାରିକ କଳହର କରୁଣ ପରିଣତି, ମୁଣ୍ଡଳୀ ବ୍ରିଜ୍‌ରେ ଗାଡ଼ି ରଖି ମହାନଦୀକୁ ଡେଇଁ ପଡ଼ିଲେ ଯୁବକ!
  • ||
  • ମୁମ୍ବାଇରୁ ଓଡ଼ିଶା ଫେରିବେ ବିରୋଧୀ ଦଳ ନେତା ନବୀନ, ସ୍ୱାଗତ ପାଇଁ ବିଜେଡି ନେତା ଓ କର୍ମୀ ପ୍ରସ୍ତୁତ
  • ||
  • ଡ୍ରାଇଭର ମହାସଂଘ ହାତ ଛାଡ଼ିଲେ ବସ୍‌ ମାଲିକ, ରାଜ୍ୟରେ ସ୍ୱାଭାବିକ ହେଲା ଘରୋଇ ବସ୍‌ ଚଳାଚଳ
  • ||
  • ଦିଲ୍ଲୀରେ ଭୁଶୁଡ଼ିଲା ୪ ମହଲା ବିଲ୍ଡିଂ, ୧୨ ଜଣ ଚାପି ହୋଇଥିବା ଆଶଙ୍କା
  • ||
  • ଦୁର୍ବଳ ହେଉଛି ମାଓ ସଙ୍ଗଠନ, ଆତ୍ମସମର୍ପଣ କଲେ ୨୨ ମାଓବାଦୀ
  • ||
  • ଭୁବନେଶ୍ୱର : ପୁଲିସ ଭବନ ସମ୍ମୁଖରେ ସିରିଜ୍ ଦୁର୍ଘଟଣା, ଡ୍ରାଇଭର ଗୁରୁତର
  • ||
  • କେନ୍ଦୁଝର: ଗୋଠଛଡ଼ା ଦନ୍ତା ଆକ୍ରମଣରେ ଜଣେ ମୃତ, ଜଣେ ଗୁରୁତର
  • ||
  • ଅହମ୍ମଦାବାଦ ପ୍ଲେନ୍‌ କ୍ରାସ୍‌ର ଆସିଲା ତଦନ୍ତ ରିପୋର୍ଟ, ଉଡ଼ାଣର ୯୦ ସେକେଣ୍ଡରେ ବନ୍ଦ ହୋଇଥିଲା ବିମାନ ଇଞ୍ଜିନ୍‌
  • ||
  • ମେଗା ରୋଜଗାର ମେଳା, ଆଜି ୫୧ ହଜାର ନିଯୁକ୍ତିପତ୍ର ବାଣ୍ଟିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି
  • ||
  • ଘୂର୍ଣ୍ଣିବଳୟ ସକ୍ରିୟ: ଆଜି ୧୩ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ, ୧୩ରୁ ଅଧିକ ବର୍ଷା ହୋଇପାରେ
  • ||

ଘର ଡିହ ବିକ୍ରି କରିଦେଲା ବଡ ପୁଅ, ଇଚ୍ଛାମୃତ୍ୟୁ ପାଇଁ ରାଷ୍ଟ୍ରପତିଙ୍କୁ ନିବେଦନ କଲେ ବାପାମା’

Published By : Krishna Priya | February 11, 2025 12:34 PM

ପୁରୀ ୧୧/୦୨:  ବ୍ୟାଙ୍କରୁ ବାରମ୍ବାର ନୋଟିସ୍‌ ଆସୁଥିଲା । ଋଣ ପରିଶୋଧ ନକଲେ ଘର ନିଲାମ ହୋଇଯିବ । ବାପା-ମା' ଓ ସାନଭାଇ ଏହାକୁ ମଥାପାତି ସହି ଯାଉଥିଲେ । ବଡ଼ପୁଅ ଟଙ୍କା ଶୁଝି ଦେବ ବୋଲି ବିଶ୍ୱାସ ରଖି ଚୁପ୍‌ ରହୁଥିଲେ । ହେଲେ ଯେଉଁ ଜମିରୁ ସେମାନେ ବର୍ଷ ତମାମ ପରିବାର ପାଇଁ ଖାଦ୍ୟ ଯୋଗାଡ଼ କରୁଥିଲେ ସେଠାକୁ ଯିବା ବେଳେ ବାରଣ କରାଗଲା । ପଚରାଉଚରା ପରେ ଜଣାପଡ଼ିଲା ତାହାକୁ ମଧ୍ୟ ବଡ଼ପୁଅ ବିକ୍ରି କରି ଦେଇଛି । ବାପାମା’ଙ୍କ ପାଖରେ ନିଜର ବୋଲି କିଛି ନାହିଁ । ଯାହାକୁ ନେଇ ସେମାନେ ଭାଙ୍ଗି ପଡ଼ିଛନ୍ତି । ଇଚ୍ଛାମୃତ୍ୟୁ ପାଇଁ ରାଷ୍ଟ୍ରପତିଙ୍କୁ ନିବେଦନ କରିଛନ୍ତି । ଏମିତି ଏକ ଘଟଣା ଘଟିଛି ସତ୍ୟବାଦୀ ବ୍ଲକ୍‌ ବଳପୁର ପଞ୍ଚାୟତର ବେହେରା ସାହିରେ । 

ଦେବ ବେହେରା, ପତ୍ନୀ ତାରାମଣି ବେହେରା, ସାନପୁଅ ସୁଦର୍ଶନ ବେହେରା ଓ ତାଙ୍କ ପତ୍ନୀ ପୁଷ୍ପାଞ୍ଜଳି ବେହେରା ମହାମହିମଙ୍କ ନିକଟକୁ ଇଚ୍ଛାମୃତ୍ୟୁ ଲାଗି ଚିଠି ଲେକ ଆବେଦନ କରିଛନ୍ତି । ସାନପୁଅର ଶିଶୁକନ୍ୟାକୁ ଅନାଥାଶ୍ରମରେ ରଖିବା ନିମନ୍ତେ ପରିବାର ଲୋକେ ଅନୁରୋଧ କରିଥିବା ଜଣାପଡ଼ିଛି । ଆବେଦନରୁ ଜଣାପଡ଼ିଛି, ପ୍ରାୟ ୪୫ବର୍ଷ ତଳେ ଦେବଙ୍କ ପିତା ସ୍ୱର୍ଗତ ବଳି ବେହେରା ୬ବର୍ଷର ନାତି ତଥା ତାଙ୍କ ବଡ଼ପୁଅ ଧଡ଼ୁ ନାମରେ ୧ ଏକର ୨୨ ଡେସିମିଲ୍‌ ଜମିକୁ ରେଜିଷ୍ଟ୍ରି କରିଥିଲେ । ଏବେ ଧଡ଼ୁ ରେଳ ବିଭାଗର ପୁରୀରେ ଗ୍ୟାଙ୍ଗ ମ୍ୟାନ୍‌ ଭାବେ ଚାକିରି କରୁଛନ୍ତି । ପରିବାରର ଏକମାତ୍ର ସାହା ଭରସା ଥିବା ଚାକିରିଆ ବଡ଼ପୁଅ ବିବାହ ପରେ ପତ୍ନୀ ସହ ଜଟଣୀରେ ରହୁଛନ୍ତି । ବାପା-ମା' ଓ ସାନଭାଇକୁ ଆଉ ପଚାରୁନାହାନ୍ତି । ପୁଅ ପଚାରୁ ନ ଥିଲେ ସୁଦ୍ଧା ସେମାନେ ଏହି ଜମିରେ ଚାଷବାସ କରି ବହୁ ଦୁଃଖ କଷ୍ଟରେ ଚଳୁଥିଲେ । 

ଗତ ଫେବ୍ରୁଆରୀ ୪ରେ ସତ୍ୟବାଦୀ ପଞ୍ଚାୟତ ସମିତି ଉପାଧ୍ୟାକ୍ଷା ନିବେଦିତା ପାତ୍ର, ସ୍ୱାମୀ ପ୍ରକାଶ ପ୍ରଧାନ, ଶ୍ୱଶୁର ଲକ୍ଷ୍ମଣ ପ୍ରଧାନ ଓ ଭାଇ ନଟ ପ୍ରଧାନ ପ୍ରମୁଖ ଦେବଙ୍କୁ ଚାଷ ଜମିକୁ ଯିବାକୁ ବାରଣ କରିଥିଲେ । ସେମାନେ କହିଥିଲେ, ତୁମ ବଡ଼ପୁଅ ଆମକୁ ଜମି ବିକ୍ରି କରିଦେଇଛି । ସେଠାକୁ ଗଲେ ହାଣିଦେବୁ ବୋଲି ଧମକ ଦେଇଥିଲେ । ଧଡ଼ୁ ଉପସ୍ଥିତିରେ ଉପାଧ୍ୟକ୍ଷାଙ୍କ ପରିବାର ସହିତ ୫୦ରୁ ୬୦ଜଣ ନିଶାସକ୍ତ ଗୁଣ୍ଡା ଶ୍ରେଣୀୟ ବ୍ୟକ୍ତି ଜମିରେ ହୋଇଥିବା ମୁଗ ଫସଲ କିଆରୀରେ ହଳ କରି ଦେଇଥିଲେ । ଖୁଣ୍ଟ ପୋତି ତାରବାଡ଼ କରି ଦଖଲ କରିଥିଲେ । ଦେବ ଯେତେ ଗୁହାରି କଲେ ମଧ୍ୟ ତାଙ୍କ କଥା କେହି ଶୁଣି ନଥିଲେ । ଧଡ଼ୁ କହିଲେ ମୋ ସମ୍ପତ୍ତି, ମୁଁ ବିକିଛି । ତୁମେ ଏଠାକୁ ଆସନାହିଁ । ସେମାନେ ଥାନାରେ ବି ଅଭିଯୋଗ କରିଥିଲେ । ସନ୍ଧ୍ୟାରେ ସତ୍ୟବାଦୀ ଥାନାରୁ ଡାକରା ଆସିଥିଲା । ସେଠାକୁ ଯିବା ପରେ ଜଣେ ଅଧିକାରୀ ଜମିକୁ ନଯିବା ନିମନ୍ତେ ଦେବଙ୍କୁ ତାଗିଦ୍‌ କରିଥିଲେ । ସେଠାକୁ ଗଲେ ଜେଲ୍‌ ଯିବ ବୋଲି ଚେତାବନୀ ଦେଇଥିଲେ । 

ବୁଝାସୁଝା ପରେ ଜଣାପଡ଼ିଥିଲା, ସେମାନଙ୍କ ଅଜାଣତରେ ଧଡ଼ୁ ଜମିକୁ ପିପିଲି ଥାନା ଅନ୍ତର୍ଗତ ସଙ୍ଗଳାଇ ଶାସନ ଗ୍ରାମର ମନୋଜ ମଲ୍ଲିକଙ୍କୁ ବିକ୍ରି କରିଛି । ଦେବ ଅନୁସୂଚିତ ଜାତି ଓ ଜନଜାତି ବର୍ଗର । ଉପାଧ୍ୟାକ୍ଷା ନିବେଦିତା ପାତ୍ର ଓ ତାଙ୍କ ସ୍ୱାମୀ ପ୍ରକାଶ ପ୍ରଧାନ ସାଧାରଣ ବର୍ଗର ହୋଇଥିବାରୁ ସିଧାସଳଖ ଜମି କିଣିପାରିବେନାହିଁ । ମନୋଜ ବର୍ତ୍ତମାନ ଏହି ଜମି ବିକ୍ରି କରିବା ନିମନ୍ତେ ପୁରୀ ଉପଜିଲ୍ଲାପାଳଙ୍କ ଅଦାଲତରେ ଏକ ମକଦ୍ଦମା କରି ଆବେଦନ କରିଛନ୍ତି । ଉପଜିଲ୍ଲାପାଳଙ୍କ ଅଦାଲତରୁ ମଞ୍ଜୁରୀ ମିଳିଗଲେ ମନୋଜ ଏହି ଜମିକୁ ପ୍ରକାଶଙ୍କୁ ବିକ୍ରି କରିଦେବେ । କେବଳ ସେତିକି ନୁହେଁ, ପ୍ଲଟ୍‌ ନମ୍ବର-୨୮୬୬ରେ ଥିବା ୪ ଡିସିମିଲ ଘରବାରିକୁ ଧଡ଼ୁ ବ୍ୟାଙ୍କରେ ବନ୍ଧା ପକାଇ ୪୨ଲକ୍ଷ ଟଙ୍କା ଗୃହ ଋଣ ନେଇଛନ୍ତି । ଋଣ ପରିଶୋଧ ନିମନ୍ତେ ବ୍ୟାଙ୍କ ତରଫରୁ ଗତ ୬ ମାସ ହେବ ୧୮ଥର ନୋଟିସ୍‌ ଆସିଲାଣି । ବର୍ତ୍ତମାନ ବ୍ୟାଙ୍କ କର୍ତ୍ତୃପକ୍ଷ ଘର କାନ୍ଥରେ ନିଲାମ ଲାଗି ନୋଟିସ୍‌ ମାରିଛନ୍ତି । ଏବେ ରହିବାକୁ ଘର ବି ରହିବ ନାହିଁ । ଖଟିକରି ଖାଇବାକୁ ବିଲ ନାହିଁ । ତେଣୁ ଏମିତି ଜୀବନ ବଞ୍ଚିବା ଅପେକ୍ଷା ମରିଯିବାକୁ ଶ୍ରେଷ୍ଠ ମଣୁଛୁ ବୋଲି ଦେବଙ୍କ ପରିବାର ଲୋକେ ଇଚ୍ଛାମୃତ୍ୟୁ ପାଇଁ ନିବେଦନ କରିଛନ୍ତି ।

Prameya Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.