ବାଇକ ଦୁର୍ଘଟଣାରେ କଲେଜ ଛାତ୍ରଙ୍କ ମୃତ୍ୟୁ
ଗୋଚ୍ଛାପଡା, ୨୫/୫ : ଫିରିଙ୍ଗିଆ ବ୍ଲକ ଗୋଛାପଡା ଥାନା ପଲାବ୍ରୁଡି ପଞ୍ଚାୟତର ନେଡିପଦର ଗାଁ ନିକଟରେ ବାଇକ ଦୁର୍ଘଟଣାରେ ଜଣେ କାଲେଜ ଛାତ୍ରଙ୍କ ମୃତ୍ୟୁ ହୋଇଛି। ମୃତକ ଜଣକ ହେଲେ ପଳାବୃଡି ପଞ୍ଚାୟତ ଅଲିମାଡା ଗ୍ରାମର କୈଳାଶ କହଁରଙ୍କ ପୁଅ ବିକାଶ କହଁର (୧୮ ବର୍ଷ)। ସେ ଫିରିଙ୍ଗିଆ ପଞ୍ଚାୟତ ମହାବିଦ୍ୟାଳୟରେ ଯୁକ୍ତ ଦୁଇରେ ପାଠ ପଢୁଥିଲେ।
ସୂଚନା ଅନୁସାରେ, ବିକାଶ କୌଣସି ଏକ କାମରେ ବାଇକ ଯୋଗେ ଜଣେ ସାଙ୍ଗ ସହ ଯାଉଥିଲେ। ଏହି ସମୟରେ ଫିରିଙ୍ଗିଆ-ଗୋଛାପଡା ମୁଖ୍ୟ ରାସ୍ତାର ନେଡିପଦର ନିକଟରେ ରାସ୍ତା କଡରେ ପଡିରହିଥିବା ଏକ କାଠ ଗଣ୍ଡିରେ ବାଇକଟି ବାଡେଇ ହୋଇଥିଲା। ଯାହାଫଳରେ ସେ ଗାଡିରୁ ଛିଟିକି ପଡିଥିଲେ। ଗୁରୁତର ଅବସ୍ଥାରେ ରାସ୍ତା କଡରେ ପଡି ରହିଥିବା ଦେଖି ସ୍ଥାନୀୟ ଗ୍ରାମବାସୀ ତାଙ୍କୁ ପ୍ରଥମେ ଗୋଛାପଡା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ। ପରେ ଅବସ୍ଥା ଗୁରୁତର ହେବାରୁ ତାଙ୍କୁ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଲୟ ସ୍ଥାନାନ୍ତର କରାଯାଇଥିଲା। ବୁଧବାର ବିଳମ୍ବିତ ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ଖବର ପାଇ ଗୋଛାପଡା ପୋଲିସ ମେଡିକାଲରେ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥିଲା। ଗୋଛାପଡା ଥାନାରେ ଏନେଇ ୬୭/୨୩ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିବା କହିଛନ୍ତି ଥାନା ଅଧିକାରୀ ରଞ୍ଜିତ କୁମାର ମୁନି।
