ନୂଆଦିଲ୍ଲୀ,୧୮/୦୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଆସାମର କାଲିଆବୋରରେ ୬,୯୫୭ କୋଟି ଟଙ୍କାର କାଜିରଙ୍ଗା ଏଲିଭେଟେଡ୍ କରିଡରର ଶିଳାନ୍ୟାସ କରିଛନ୍ତି । ଏହା ସହିତ ଦୁଇଟି ଅମୃତ ଭାରତ ଟ୍ରେନକୁ ସବୁଜ ପତାକା ଦେଖାଇ ଶୁଭାରମ୍ଭ କରିଛନ୍ତି । ମୁମ୍ବାଇ ବିଜୟର ଉତ୍ସବ କାଜିରଙ୍ଗାରେ ପାଳିଥିଲେ ପ୍ରଧାନମନ୍ତ୍ରୀ । ଏହି ଅବସରରେ ପ୍ରଧାନମନ୍ତ୍ରୀ ମୋଦି ଏକ ଜନସଭାକୁ ସମ୍ବୋଧନ କରି କଂଗ୍ରେସ ଦଳ ଉପରେ ବର୍ଷିଛନ୍ତି । କଂଗ୍ରେସ ଆସାମ ମାଟିକୁ ଅନୁପ୍ରବେଶକାରୀଙ୍କୁ ହସ୍ତାନ୍ତର କରିଥିଲା । ମୁମ୍ବାଇରେ କଂଗ୍ରେସ ଜନ୍ମ ହେଲେ ଆଜି ସେଠାରେ ଚତୁର୍ଥ-ପଞ୍ଚମ ନମ୍ବରରେ ରହିଛି । ଦେଶର ବିଶ୍ୱାସ ହରାଇଛି କଂଗ୍ରେସ କାରଣ ତାର କିଛି ବିକାଶ ଏଜେଣ୍ଡ ନାହିଁ । ବିଜେପି ଲୋକଙ୍କ ପ୍ରଥମ ପସନ୍ଦ ପାଲିଟିଛି ବୋଲି କହିଛନ୍ତି ପ୍ରଧାନମନ୍ତ୍ରୀ ।

​​​​​​​କଂଗ୍ରେସକୁ ଟାର୍ଗେଟ କରି ପ୍ରଧାନମନ୍ତ୍ରୀ କହିଛନ୍ତି,''ଶାସନରେ ଅନୁପ୍ରବେଶ କ୍ରମାଗତ ଭାବରେ ବୃଦ୍ଧି ପାଇଛି । ସେମାନଙ୍କୁ ଆସାମର ଇତିହାସ ଏବଂ ସଂସ୍କୃତି ପ୍ରତି କୌଣସି ଚିନ୍ତା ନଥିଲା । ଚୋରା ଚାଲାଣ ଏବଂ ଅନ୍ୟାନ୍ୟ ଅପରାଧ ମଧ୍ୟ ବୃଦ୍ଧି ପାଇଥିଲା । ଅନୁପ୍ରବେଶକାରୀମାନେ ଜନସଂଖ୍ୟା ସନ୍ତୁଳନକୁ ବିପର୍ଯ୍ୟସ୍ତ କରୁଛନ୍ତି । ଏହା ଆସାମ ଏବଂ ଦେଶର ସୁରକ୍ଷା ଉଭୟ ପାଇଁ ଏକ ବଡ଼ ବିପଦ ସୃଷ୍ଟି କରୁଛି । କଂଗ୍ରେସଠାରୁ ସାବଧାନ ରୁହ । ସେମାନେ ଅନୁପ୍ରବେଶକାରୀଙ୍କୁ ସୁରକ୍ଷା ଦିଅନ୍ତି ଏବଂ ସେମାନଙ୍କ ସାହାଯ୍ୟରେ କ୍ଷମତା ହାସଲ କରନ୍ତି । କଂଗ୍ରେସ ଏବଂ ଏହାର ସହଯୋଗୀମାନେ ସାରା ଦେଶରେ ସମାନ କାର୍ଯ୍ୟ କରୁଛନ୍ତି । ବିହାରରେ, ସେମାନେ ଅନୁପ୍ରବେଶକାରୀଙ୍କୁ ସୁରକ୍ଷା ଦେବା ପାଇଁ ରାଲି ମଧ୍ୟ କରିଥିଲେ, କିନ୍ତୁ ବିହାରର ଲୋକମାନେ ସେମାନଙ୍କୁ ନିପାତ କରିଦେଲେ । ସେମାନେ ଆସାମର ମାଟିରୁ ମଧ୍ୟ ଜବାବ ପାଇବେ ।''