ଫିରିଙ୍ଗିଆ,୦୨/୦୫: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ତାର ଆଖପାଖ ଅଞ୍ଚଳ ମାନଙ୍କରେ ବାଇକ ଚୋରି ଦିନକୁଦିନ ବଢ଼ିବାରେ ଲାଗିଛି। ଗତ ତିନିମାସ ମଧ୍ୟରେ ସହରର ବିଭିନ୍ନ ଜାଗାରୁ ପ୍ରାୟ କୋଡିଏ ରୁ ପଚିଶ ଟି ବାଇକ ଚୋରି ହୋଇଥିବା ଜଣାପଡିଛି। ତେବେ ଏହି ପରିପେକ୍ଷୀରେ ଫିରିଙ୍ଗିଆ ପୋଲିସ ଫିରିଙ୍ଗିଆ ବଜାରରୁ ଚୋରି ହୋଇଥିବା ଏକ ବାଇକକୁ ଜବତ କରିବାରେ ସଫଳ ହୋଇଛି। ଏହାସହ ଚୋରି ଘଟଣାରେ ସମ୍ପୃକ୍ତି ଥିବା ଅଭିଯୋଗରେ ଦୁଇଜଣଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରାଯାଇଥିବା ପୋଲିସ ତରଫରୁ ସୂଚନା ମିଳିଛିI 

ସୂଚନା ଅନୁସାରେ ଗୋଛାପଡା ଗାଁର ସାଗର କହଁର ନାମକ ଜଣେ ବ୍ୟକ୍ତି ଗତ ୦୧/୦୩/୨୦୨୫ ତାରିଖ ଦିନ ଫିରିଙ୍ଗିଆ ବଜାରରୁ ତାଙ୍କ ବାଇକ ଚୋରି ହୋଇଥିବା ନେଇ ଫିରିଙ୍ଗିଆ ଥାନାରେ ଲିଖିତ ଅଭିଯୋଗ କରିଥିଲେ। ଏହି ଘଟଣାକୁ ନେଇ ପୋଲିସ ତଦନ୍ତ ଜାରି ରଖିଥିଲା। ତେବେ ନୂଆଗାଁ ପୋଲିସ ବୁଧବାର ପେଟ୍ରୋଲିଙ୍ଗ କରିବା ସମୟରେ ଏକ ନମ୍ୱର ବିହିନ ଗାଡି ଯାଉଥିବାରୁ ସନ୍ଦେହରେ ପୋଲିସ ଗାଡିଟିକୁ ଜବତ କରିଥିଲା।

ପରେ ତଦନ୍ତ କଲାପରେ ଗାଡିଟି ଉକ୍ତ ଚୋରି ଗାଡି ବୋଲି ଜଣାପଡିଥିଲା। ନୂଆଗାଁ ପୋଲିସ ଫିରିଙ୍ଗିଆ ପୋଲିସକୁ ଖବର ଦେବା ପରେ ଫିରିଙ୍ଗିଆ ପୋଲିସ ଜବତ ଗାଡି ସହ ଅଭିଯୁକ୍ତ ମାନଙ୍କୁ ଫିରିଙ୍ଗିଆ ଥାନାକୁ ଆଣିଥିଲା। ତେବେ ଗିରଫ ଅଭିଯୁକ୍ତ ମାନଙ୍କ ମଧ୍ୟ୍ୟରେ ଜଣେ କେ. ନୂଆଗାଁ ଥାନା ପଦାସାହିର ଚନ୍ଦ୍ରମଣି ବିଶିମାଝି ବୋଲି ଜଣାପଡିଥିବା ବେଳେ ଅନ୍ୟଜଣେ ସେହି କେ. ନୂଆଗାଁ ଥାନା ନେଡିପଦର ଗାଁର ମୁକେଶ ପ୍ରଧାନ ବୋଲି ଜଣାପଡିଛିI 

ଏହି ଘଟଣାରେ ଫିରିଙ୍ଗିଆ ଥାନାରେ ୫୧/୨୦୨୫ ରେ ଏକ ମାମଲା ରୁଜୁ କରି ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରିବା ସହ ଅଧିକ ତଦନ୍ତ ଜାରିରଖିଥିବା ସୂଚନା ଦେଇଛନ୍ତି ଥାନା ଅଧିକାରୀ ଡ଼ିଏସପି ଗୋପୀନାଥ ପ୍ରଧାନ।