ଲୋକପ୍ରିୟ ଝୁମର ଶିଳ୍ପୀ ସୌରୀଦତ୍ତଙ୍କ ଦେହାନ୍ତ, ବାରିପଦା ଆକାଶବାଣୀ କେନ୍ଦ୍ରର ଥିଲେ ସ୍ୱୀକୃତିପ୍ରାପ୍ତ କଳାକାର
ବାରିପଦା,୧୯/୦୩: ଲୋକପ୍ରିୟ ଝୁମର ଗାୟକ ସୌରୀଦତ୍ତ ମହାନ୍ତଙ୍କ ୬୪ବର୍ଷ ବୟସରେ ପରଲୋକ ଘଟିଛି । ଶନିବାର ସକାଳେ ତାଙ୍କର ମୁଣ୍ଡ ବୁଲାଇବାରୁ ତାଙ୍କୁ ହସପିଟାଲ ନିଆଯାଇଥିଲା । ତାଙ୍କ ଅବସ୍ଥା ଗୁରୁତର ହେବାରୁ ଭୁବନେଶ୍ୱରକୁ ନିଆଯାଇଥିଲା । ଭୁବନେଶ୍ୱରରେ ତାଙ୍କର ମୃତ୍ୟୁ ହୋଇଥିବା ନେଇ ସୂଚନା ମିଳିଛି । ତାଙ୍କର ହୃଦ୍ଘାତ ଜନିତ ମୃତ୍ୟୁ ହୋଇଥିବା ଡାକ୍ତର କହିଛନ୍ତି ।
ତାଙ୍କର ମୃତ୍ୟୁ ଖବର ପ୍ରଚାର ପରେ ଜିଲ୍ଲାର ସବୁ ମହଲରେ ଶୋକର ଛାୟା ଖେଳିଯାଇଛି । ମାଦଳ ଧୁମ୍ସାର ତାଳେ ତାଳେ ପିଲାଟି ଦିନରୁ ଗୀତ ଗାଇ ଶ୍ରୋତାଙ୍କୁ ଝୁମାଇ ଆସୁଥିବା ଝୁମର ଶିଳ୍ପୀ ସୌରୀଦତ୍ତ ମହାନ୍ତ ଥିଲେ ମୟୂରଭଞ୍ଜର ଲୋକଗୀତ ଝୁମର ସଂଗୀତର ଏକ ବିଚକ୍ଷଣ ପ୍ରତିଭା । ବାପା ସ୍ୱର୍ଗତ ପଦ୍ମଲୋଚନ ମହାନ୍ତ ଝୁମରର ଜଣେ ପୃଷ୍ଠପୋଷକ ଥିବା ବେଳେ ସୌରୀଦତ୍ତଙ୍କ ଉପରେ ବିଶେଷ ପ୍ରଭାବ ପଡ଼ିଥିଲା । ସୌରୀଦତ୍ତ ଝୁମର ସମ୍ରାଟ ଗିରିଶ ଚନ୍ଦ୍ର ମହାନ୍ତ ଏବଂ ମାମା ଲାଲ ସାହେବଙ୍କ ପ୍ରେରଣାରେ ବିଶେଷ ଭାବେ ପ୍ରଭାବିତ ହୋଇଥିଲେ । ୧୯୯୭ରେ ସେ କୁଡମାଲି କଲଚୁରାଲ ଆସୋସିଏସନରେ ଯୋଗ ଦେଇଥିଲେ । ଭୁବନେଶ୍ୱର, ରାଞ୍ଚି, ପଶ୍ଚିମବଙ୍ଗ, ସୁକିନ୍ଦା, ସୁନ୍ଦରଗଡ଼, ରାଉରକେଲା ପ୍ରଭୃତି ସ୍ଥାନରେ ସେ ଝୁମର ପରିବେଷଣ କରି ବେଶ ପ୍ରଂଶସା ସାଉଁଟିଥିଲେ । ସେ ବାରିପଦା ଆକାଶବାଣୀ କେନ୍ଦ୍ରର ଜଣେ ସ୍ୱୀକୃତିପ୍ରାପ୍ତ କଳାକାର ଥିଲେ । ୨୦୦୩ରୁ ଝୁମରିଆ ଝୁମର ନାମରେ ଏକ ଦଳ ଗଠନ କରିଥିଲେ । ବିଏସ୍ଏନ୍ଏଲ୍ରୁ ଜେଇ ଭାବେ ଅବସର ନେଇଥିବା ସୌରୀବାବୁ ମୟୂରଭଞ୍ଜର କଳା, ସଂସ୍କୃତି ସହ ବେଶ ଓତଃପ୍ରୋତ ଜଡ଼ିତ ଥିଲେ ।
