ଭୁବନେଶ୍ୱର,୨୨/୦୯: ନାୟିକା ଜଣେ ନାୟକ ଦୁଇଜଣ । ଜଣେ ପ୍ରେମରେ ବୁଡ଼ି ନମ୍ର ଭାବରେ ନାୟିକା ପାଟିରୁ ଆଇ ଲଭ୍ ୟୁ ଶୁଣିବାକୁ ବ୍ୟାକୁଳତାର ସହ ଅପେକ୍ଷା କରିଥିଲାବେଳେ ଆଉ ଜଣେ ଜୋର୍ ଜବରଦସ୍ତ କରୁଛି । ସେଥିରେ ଆଉ ଜଣେ ନାୟିକା ଭୂମିକା ବି ରହିଛି । କଲେଜ ସମୟର ଏମିତି ଏକ ପ୍ରେମ କାହାଣୀକୁ ନେଇ ଫ୍ରାଇଡେ ରିଲିଜ୍ ଅବସରରେ ପରଦାକୁ ଆସୁଛି ନୂଆ ସିନେମା ‘କହିଦେ ଥରେ ଆଇ ଲଭ୍ ୟୁ’ ।
ସିଦ୍ଧାର୍ଥ ଟିଭି ନିବେଦିତ ଓ ସିଦ୍ଧାର୍ଥ ମ୍ୟୁଜିକ୍ର ୩୪ ତମ ଏହି ରୋମାଣ୍ଟିକ୍ ଚଳଚ୍ଚିତ୍ରକୁ ଦର୍ଶକ ସାରା ଓଡ଼ିଶାର ବିଭିନ୍ନ ପ୍ରେକ୍ଷାଳୟରେ ଦେଖିବାକୁ ପାଇବେ । କଟକ ସଙ୍ଗମ ହଲ୍ରେ ପ୍ରିମିୟର ଅନୁଷ୍ଠିତ ହୋଇଛି। ଏହି ସିନେମାର ମୁଖ୍ୟ ଚରିତ୍ରରେ ଲୋକପ୍ରିୟ ଅଭିନେତ୍ରୀ ଭୂମିକା ଥିବାବେଳେ ନାୟକ ଭୂମିକାରେ ଆର୍ଯ୍ୟନ୍ଧୀର କୁମାର, ରାଜ୍ ରାଜେଶ ଏବଂ ଅନ୍ୟତମ ନାୟିକା ଭୂମିକାରେ ସସ୍ମିତା ପିୟାଲି ପ୍ରମୁଖ ଅଭିନୟ କରିଛନ୍ତି । ସିନେମାର ପ୍ରଯୋଜନା କରିଛନ୍ତି ସୀତାରାମ ଅଗ୍ରୱାଲ ଓ ନମିତା ଅଗ୍ରୱାଲ । ନିର୍ଦ୍ଦେଶନା ଦେଇଛନ୍ତି ହିମାଂଶୁ ପରିଜା । ଗୀତ ରଚନା ଅରୁଣ ମନ୍ତ୍ରୀ ଓ ପୁଷ୍ପକ ପରିଡ଼ା କରିଥିବାବେଳେ ସଙ୍ଗୀତ ଦେଇଛନ୍ତି ଅସାଦ ନିଜାମ୍ । ସଂଳାପ ଲେଖିଛନ୍ତି ଚିନ୍ମୟ ଦାସ ପଟ୍ଟନାୟକ । ସମ୍ପାଦନାରେ ରାଜେଶ ଦାଶ, ଡିଓପିରେ ଶୁଭମ୍ ଏବଂ କୋରିଓଗ୍ରାଫିରେ ଅମିତ ନାୟକ ରହିଛନ୍ତି । ସିନେମାଟି ଦର୍ଶକଙ୍କ ଭଲ ସମର୍ଥନ ପାଇବା ସହ ସଫଳତା ଲାଭ କରିବ ବୋଲି ପୂରା ୟୁନିଟ୍ ଆଶାବାଦୀ ରହିଛି ।
ଏଥିସହ ଶୁକ୍ରବାର ଦୁଇ ନୂଆ ଓଡ଼ିଆ ସିନେମା ‘ପ୍ରତିଶୋଧ’ ଓ ‘ଶଙ୍କର’ ରିଲିଜ୍ ହେଉନାହିଁ । ବିଭିନ୍ନ କାରଣରୁ ଚୁଲବୁଲି ଅଭିନେତ୍ରୀ ଏଲିନାଙ୍କ ‘ପ୍ରତିଶୋଧ’ ଆସନ୍ତା ୨୩ରେ ରିଲିଜ୍ ହେବା ସହ ୨୪ରେ ସ୍ୱତନ୍ତ୍ର ପ୍ରିମିୟର ହେବ । ସେହିପରି ସୁପର୍ଷ୍ଟାର୍ ସିଦ୍ଧାନ୍ତାଙ୍କ ‘ଶଙ୍କର’ ଆସନ୍ତା ୨୯ରେ ପ୍ରେକ୍ଷାଳୟକୁ ଆସିବ ବୋଲି ସୂଚନା ମିଳିଛି ।
