ଇସ୍ଲାମାବାଦ,୨୨/୦୯ ଆସନ୍ତା ବର୍ଷ ଜାନୁଆରୀ ଶେଷ ସପ୍ତାହରେ ପାକିସ୍ତାନରେ ସାଧାରଣ ନିର୍ବାଚନ ହେବ । ଏ ନେଇ ପାକ୍ ନିର୍ବାଚନ କମିଶନ ଗୁରୁବାର ଏହି ଘୋଷଣା କରିଛନ୍ତି । କମିଶନ ପକ୍ଷରୁ ଜାରି ଏକ ବିଜ୍ଞପ୍ତିରେ କୁହାଯାଇଛି, ନିର୍ବାଚନ ମଣ୍ଡଳୀର ପରିସୀମନ କାର୍ଯ୍ୟର ସମୀକ୍ଷା କରାଯାଇଛି । ପରିସୀମନ ହୋଇଥିବା ନିର୍ବାଚନ ମଣ୍ଡଳୀର ପ୍ରାରମ୍ଭ ସୂଚୀ ଆସନ୍ତା ୨୭ ତାରିଖରେ ଜାରି କରାଯିବ । ଏହି ନିର୍ବାଚନରେ ସେନା ନୱାଜ ସରିଫ୍ଙ୍କୁ ସମର୍ଥନ ଦେଇପାରେ ବୋଲି କୁହାଯାଉଛି ।
ଏପରି ହେଲେ ନୱାଜ ପୁଣି କ୍ଷମତାକୁ ଫେରିପାରିବେ । ଜାରି ସୂଚୀ ସମ୍ବନ୍ଧରେ କୌଣସି ଆପତ୍ତି କିମ୍ବା ପ୍ରସ୍ତାବ ଉପରେ ବିଚାର କରାଯିବା ପରେ ନଭେମ୍ବର ୩୦ରେ ଅନ୍ତିମ ସୂଚୀ ଜାରି ହେବ । ପାକିସ୍ତାନର ଆଇନ ଅନୁସାରେ ନ୍ୟାସନାଲ ଆସେମ୍ବ୍ଲି ଭଙ୍ଗ ହେବାର ୯୦ ଦିନ ମଧ୍ୟରେ ସାଧାରଣ ନିର୍ବାଚନ କରାଯିବା କଥା । ଗତ ଅଗଷ୍ଟରେ ପାକ୍ ନ୍ୟାସନାଲ ଆସେମ୍ବ୍ଲି ଭଙ୍ଗ ହୋଇଥିଲା । ପାକିସ୍ତାନରେ ହେବାକୁ ଥିବା ଏହି ନିର୍ବାଚନରେ ଜେଲ୍ରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଇଲେକ୍ସନ ଲଢ଼ିବା ସମ୍ଭାବନା ଏବେ ଆହୁରି କ୍ଷୀଣ ହୋଇଯାଇଛି ।