ଭୁବନେଶ୍ୱର ୦୧/୧୨ (ଗୋପାଳକୃଷ୍ଣ ମହାପାତ୍ର,ସମ୍ପାଦକ): ସ୍ୱପ୍ନ ଓ ସଂଘର୍ଷର ଆଉ ଏକ ନୂଆ ବର୍ଷ । ଏକ ନୂଆ ଆରମ୍ଭ, ନୂଆ ସମ୍ଭାବନା। ‘ପ୍ରମେୟ’ ଆଜି ଏମିତି ଏକ ବୈଶ୍ୱିକ ଆବହାୱା ଭିତରେ ତାର ତ୍ରୟୋଦଶ ଜନ୍ମଦିନ ପାଳନ କରୁଛି, ଯେତେବେଳେ ଦେଶର ଅଧିକାଂଶ ଭାଗ ପ୍ରଦୂଷଣ ଭିତରେ ଶ୍ୱାସରୁଦ୍ଧ ଅବସ୍ଥାରେ ରହିଛନ୍ତି । ଦେଶ ଦେଶ ମଧ୍ୟରେ ବିବାଦ, ପରସ୍ପର ସନ୍ଦେହ ଏବଂ ଯୁଦ୍ଧର ବାତାବରଣ । ପରିବେଶ ବିପନ୍ନ, ଜୀବଜଗତ ମଧ୍ୟ ବିନାଶ ପଥରେ । ଆମ ରାଜ୍ୟରେ ଏକ ନୂଆ ଅଧ୍ୟାୟ, କିଛି ନୂଆ ପରୀକ୍ଷା ନିରୀକ୍ଷା ଆରମ୍ଭ ହୋଇଛି । ସଂଖ୍ୟା ଗଣନାରେ ଏହି ତ୍ରୟୋଦଶ ବା ତେର ସଂଖ୍ୟାଟି ହେଉଛି "ଆସ୍ଥାର ପ୍ରତୀକ' । ତେଣୁ ‘ପ୍ରମେୟ’ର ଏହି ତ୍ରୟୋଦଶ ଜନ୍ମଦିନରେ ଆମେ ସମସ୍ତଙ୍କ ଆସ୍ଥା ଜିଣିବା ସଂକଳ୍ପ ନେଉଛୁ ।
ବିନା ସଂଘର୍ଷରେ କୌଣସି ସଂକଳ୍ପ ପୂରଣ ହୁଏନାହିଁ । ‘ପ୍ରମେୟ’ ଜନ୍ମରୁ ସଂଘର୍ଷ କରିବା ଶିଖିଛି, ଜିତିବା ଜାଣିଛି । ଏହି ନୂଆ ବର୍ଷର ଯାତ୍ରା ବି ସହଜ ହେବନାହିଁ । ଅନେକ କିଛି ନୂଆ କରିବାକୁ ହେବ । "ପ୍ରମେୟ’ର ପାଠକ ସବୁବେଳେ ଆମଠୁ କିଛି ଅଲଗା ଚାହାନ୍ତି । ସେହି ଇଚ୍ଛାକୁ ସମ୍ମାନ ଦେଇ ଆମେ କିଛି ନୂଆ ସ୍ତମ୍ଭ, ନୂଆ ପୃଷ୍ଠା ଏବଂ ନୂତନ ଉପସ୍ଥାପନାର ଯୋଜନା ପ୍ରସ୍ତୁତ କରୁଛୁ । ଆଶା, ଆପଣମାନଙ୍କ ପସନ୍ଦ ହେବ । କିଛି ନୂଆ ପାଠକ ଗୋଷ୍ଠୀ ଆମ ସହିତ ଯୋଡ଼ି ହେଲେଣି । ଯଶସ୍ୱୀ ତଥା ଚିନ୍ତାଶୀଳ ନୂତନ ଲେଖକଙ୍କୁ ମଧ୍ୟ ଆମେ ପାଇଛୁ। ପରିବର୍ତ୍ତନ ଅବଶ୍ୟ ହେବ ।
ଗତ ଜନ୍ମଦିନର ବାର୍ତ୍ତାରେ ଆମେ କହିଥିଲୁ, ପ୍ରତିକୂଳ ପରିସ୍ଥିତି ସତ୍ତ୍ୱେ ମୁଦ୍ରିତ ଗଣମାଧ୍ୟମର ସ୍ଥିତିରେ ସୁଧାର ଆସିଛି । ପାଠକ ଫେରୁଛନ୍ତି ଖବରକାଗଜ ପୃଷ୍ଠାକୁ । ନୂଆ ବର୍ଷର ଆରମ୍ଭରେ ଏହି ଉକ୍ତିଟି ଅଧିକ ପ୍ରମାଣସିଦ୍ଧ । ପାଠକ ବୁଝି ସାରିଲେଣି ଯେ ଛାପା ଗଣମାଧ୍ୟମର ବିଶ୍ୱସନୀୟତା ଅନ୍ୟ ସବୁ ମାଧ୍ୟମ ଠାରୁ ଅଧିକ । ଖବରକାଗଜ ଶିଳ୍ପ କେବେ ହାର୍ ମାନିବନି ।
ଆମ ପାଠକପାଠିକା, ଶୁଭେଚ୍ଛୁ, ବିଜ୍ଞାପନଦାତା ଏବଂ ବିତରକ ବନ୍ଧୁମାନଙ୍କର ଆସ୍ଥା ଆମ ଉପରୁ କେବେ ବି ତୁଟିବ ନାହିଁ । ଜନ୍ମଦିନରେ ଆମେ ପ୍ରତିଶ୍ରୁତି ଦେଉଛୁ । ଆମେ ଆହୁରି କିଛି ନୂଆ କରିବୁ । ସକାରାତ୍ମକ ଆଭିମୁଖ୍ୟରୁ ପଛକୁ ହଟିବୁ ନାହିଁ । ଆଶୀର୍ବାଦ କାମନା କରୁଛି । ‘ପ୍ରମେୟ’ ପରିବାର ତରଫରୁ ଆପଣମାନଙ୍କୁ ବିନମ୍ର ଅଭିବାଦନ ।
