ନୟାଗଡ଼,୦୧/୦୬: ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତରଙ୍କ ଅବହେଳାରୁ ଜଣେ ପ୍ରସୂତିଙ୍କ ମୃତ୍ୟୁ ହୋଇଛି । ଯାହାକୁ ନେଇ ଡାକ୍ତରଖାନାରେ ଚାପା ଉତ୍ତେଜନା ଦେଖାଦେଇଛି । ପୁଲିସ ଘଟଣାସ୍ଥଳରେ ରହି ତଦାରଖ କରୁଛି ।
ସୂଚନା ମୁତାବକ, ନୟାଗଡ଼ ବ୍ଲକ ବାଲୁଗାଁର ସଞ୍ଜୟ କୁମାର ନାୟକଙ୍କ ସ୍ତ୍ରୀ ମମତା(୩୩) ଗର୍ଭବତୀ ଥିଲେ । ଶନିବାର ରାତିରେ ତାଙ୍କର ପ୍ରସବ ଯନ୍ତ୍ରଣା ହେବାରୁ ପରିବାର ଲୋକେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ଡାକ୍ତର ରାତିରେ ଦେଖି ସିଜରିଂ କରାଯିବ ବୋଲି କହିଥିଲେ । ସେଥିପାଇଁ ଟଙ୍କା ଦରକାର ହେବ, ଟଙ୍କା ଆଣିଲେ କାମ କରାଯିବ ବୋଲି କହିଥିଲେ । ସଞ୍ଜୟ ରାତି ଅଧରେ ଗାଁକୁ ଯାଇ ଟଙ୍କା ଆଣି ଆସିଲାବେଳକୁ ବେଡ୍ରେ ସ୍ତ୍ରୀର ମୃତଦେହ ପଡିଥିଲା । ପାଖରେ ଡାକ୍ତରଖାନାର କେହି କର୍ମଚାରୀ ମଧ୍ୟ ନଥିଲେ । ଏହି ଘଟଣାକୁ ନେଇ ଡାକ୍ତରଖାନାରେ ଚାପା ଉତ୍ତେଜନା ଦେଖାଦେଇଛି । ଘଟଣା ସମ୍ପର୍କରେ ଖବର ପାଇ ପୁଲିସ ଘଟଣାସ୍ଥଳରେ ଜଗି ରହିଛି ।
