ଗୋପାଳପୁର,୧/୨(ଆପ୍ର): ଆଜି ପ୍ରଚଣ୍ଡ ଖରା ସାଙ୍ଗକୁ ଗୁଳୁଗୁଳିରେ ଜନଜୀବନ ଅସ୍ତବ୍ୟସ୍ତ ହେଉଥିଲା। ଗତ କିଛି ଦିନ ଧରି ପାଗରେ ଟିକିଏ ସୁଧାର ଆସିବା ସହ କାଳ ବୈଶାଖୀ ବର୍ଷା ପ୍ରଭାବ ରହିଥିବା ବେଳେ ଆଜି ପ୍ରଚଣ୍ଡ ଖରା ସାଙ୍ଗକୁ ଗୁଳୁଗୁଳି ଜାରି ରହିଛି। ସକାଳ ୮ଟାରୁ ଗରମର ପ୍ରକୋପ ଆରମ୍ଭ ହୋଇଯାଇଥିବା ବେଳେ ପୂର୍ବାହ୍ନ ୧୧ଟା ବେଳକୁ ଆଉ ଘରୁ ବାହାରକୁ ବାହାରି ହେଉନଥିଲା। ମଧ୍ୟାହ୍ନ ବେଳକୁ ଉପରୁ ଯେଭଳି ନିଆଁଖଣ୍ଡ ଖସି ପଡୁଥିବା ପରି ମନେ ହେଉଥିଲା।
ଟାଣ ଖରାରେ ଜରୁରି ନଥିଲେ ଲୋକେ କାହାରି ହାତରେ ଛତା ତ ପୁଣି କିଏ ମୁହଁରେ ଓଦା କପଡ଼ା ବାନ୍ଧି ଯାତାୟାତ କରୁଥିବା ଦେଖିବାକୁ ମିଳିଥିଲା। ଦିନରେ ଖରା ସହ ଗୁଳିଗୁଳି ରହୁଥିବା ବେଳେ ସନ୍ଧ୍ୟାରେ ଗୋପାଳପୁର ଆଖପାଖ ଲୋକେ ଗୋପାଳପୁର ବେଳାଭୂମି ଆଡକୁ ମୁହାଁଇଥିଲେ। ଆଜି ସନ୍ଧ୍ୟାରେ ଗୋପାଳପୁର ବେଳାଭୂମିରେ ଲୋକଙ୍କ ଗହଳି ରହିଥିବା ବେଳେ କିଛି ଲୋକେ ଜଳକ୍ରୀଡ଼ା କରୁଥିବା ଦେଖିବାକୁ ମିଳିଥିଲା।
ଆଜି ଗୋପାଳପୁରରେ ତାପମାତ୍ରା ୩୫.୦ ଡିଗ୍ରୀ ସେଲସିଅସ ରହିଥିବା ବେଳେ ଆଦ୍ରତା ପ୍ରାୟ ୮୨ ରହିଥିଲା। ଆସନ୍ତା ପ୍ରାୟ ୫ ଦିନ ଖରାର ପ୍ରଭାବ ବଢ଼ିବା ସହ ଗୁଳୁଗୁଳି ରହିବା ସମ୍ଭାବନା ରହିଥିବା ପାଣିପାଗ କେନ୍ଦ୍ରରୁ ସୂଚନା ମିଳିଛି।
