୨୭ରେ ବରଗଡ଼ ଓ ଜୟପୁର ଆସିବେ ରାହୁଲ୍
ଭୁବନେଶ୍ୱର,୧୨ ।୨(ବ୍ୟୁରୋ): ଏଥର ବରଗଡ଼ ଓ ଜୟପୁର ଆସିବେ କଂଗ୍ରେସ ମୁଖିଆ ରାହୁଲ ଗାନ୍ଧୀ । ୨୭ରେ ରାହୁଲ ଆସିବା ବାବଦରେ ଆପାତତଃ ସ୍ଥିର ହୋଇଛି । ତେବେ କଂଗ୍ରେସର ବରିଷ୍ଠ ନେତାଙ୍କ ସୂଚନା ଅନୁସାରେ ରାହୁଲ ଦିନ ୧୧ଟା ବେଳେ ଜୟପୁରରେ ଓ ଅପରାହ୍ନ ୨ଟାରେ ବରଗଡ଼ରେ କରିବେ ସମାବେଶ । ବରଗଡ଼ରେ ସଭା ସରିବା ପରେ ରାହୁଲ ରାୟପୁରରୁ ନୂଆଦିଲ୍ଲୀ ଫେରିଯିବେ । ତେବେ ରାହୁଲଙ୍କ ଗସ୍ତ ପୂର୍ବରୁ ବରଗଡ଼ ପହଞ୍ଚିଛନ୍ତି ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ । ସ୍ଥିତିର ସମୀକ୍ଷା କରିଛନ୍ତି । ଜିଲ୍ଲାନେତାମାନଙ୍କୁ ରାହୁଲଙ୍କ ସମାବେଶକୁ ସଫଳ କରିବା ପାଇଁ ସମସ୍ତ କଳ, ବଳ ଓ କୌଶଳ ଲଗାଇବାକୁ ପରାମର୍ଶ ଦେଇଛନ୍ତି । ଦକ୍ଷିଣ ଓ ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲା ଛତିଶଗଡ଼କୁ ଲାଗିଥିବାରୁ ତା’ର ଲାଭ ନେବାକୁ ଚେଷ୍ଟା ଚଳାଇଛି କଂଗ୍ରେସ । ବାରମ୍ବାର ଦକ୍ଷିଣ ଓ ପଶ୍ଚିମ ଓଡ଼ିଶାରେ ରାହୁଲଙ୍କ କାର୍ଯ୍ୟକ୍ରମ ଆୟୋଜିତ କରି ନିର୍ବାଚନ ଗଡ଼ ଜିତିବାକୁ ଦଳ ପ୍ରସ୍ତୁତ କରିଛି ବ୍ଲୁ ପ୍ରିଣ୍ଟ୍ । ବିଜେପିର ହେଭିୱେଟ୍ ନେତାମାନେ ବାରମ୍ବାର ଓଡ଼ିଶା ଗସ୍ତରେ ଆସି ବୈଠକ କରୁଥିବାରୁ କଂଗ୍ରେସ ମଧ୍ୟ ଓଡ଼ିଶାକୁ ସମ ପରିମାଣରେ ଫୋକସ୍ ଦେବା ଆରମ୍ଭ କରିଛି ।
