ନୂଆଦିଲ୍ଲୀ ; ୨୧/ ୧ : ଲୋକସଭାର ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧି ଏକ ଭିଡିଓ ସୋସିଆଲ ମିଡିଆ ଏକ୍ସରେ ପୋଷ୍ଟ କରିଛନ୍ତି । ଯେଉଁ ଭିଡିଓରେ ଲୋକେ କିଭଳିଭାବେ ଅସୁବିଧାରେ ଚଳୁଛନ୍ତି ତାହା ଦର୍ଶଯାଇଛି । ଗଳି ଭିତରେ ନର୍ଦ୍ଦମା ପାଣି । ଗନ୍ଧିଆ ପାଣି ଭିତରେ ଯାତାୟତ କରୁଛନ୍ତି ଲୋକେ । ତେବେ ଏହି ଭିଡିଓଟି ହେଉଛି ଦିଲ୍ଲୀର କିରାରି ନିର୍ବାଚନ ମଣ୍ଡଳୀର । ଶର୍ମା ଏକକ୍ଲେଭ୍ ମୁବାରକପୁର ଡବାସର । ରାହୁଲ ସେୟାର କରିଥିବା ଭିଡିଓରେ ଲୋକେ ମଇଳା ପାଣି ଭିତରେ କିଭଳି ଯାତାୟତ କରୁଛନ୍ତି ଆଉ ଜୀବନ କାଟୁଛନ୍ତି ଏହା ଦର୍ଶାଇ ସମାଲୋଚନା କରିଛନ୍ତି ।

 

ଏବେ ପ୍ରବଳ ଶୀତ ଅନୁଭବ ହେଉଥିବାବେଳେ ଲୋକେ ନର୍ଦ୍ଦମା ପାଣିରେ ବୁଡ଼ି ରହିଥିବା ଅଞ୍ଚଳରେ ବାସ କରିବାକୁ ବାଧ୍ୟ ହେଉଛନ୍ତି । ଲୋକେ ବହୁ ଅସୁବିଧାର ସମ୍ମୁଖୀନ ହେଉଥିବାବେଳେ ସରକାର କିମ୍ବା ପ୍ରଶାସନ କୌଣସି ନଜର ଦେଉନାହାନ୍ତି । ଏଣୁ ସରକାରଙ୍କୁ ଟାର୍ଗେଟ କରି କହିଛନ୍ତି କି, ଜୀବନ ଏବେ ନର୍କ ହୋଇଯାଇଛି । କ୍ଷମତା ପାଖରେ ବ୍ୟବସ୍ଥା ବିକ୍ରି ହୋଇଯାଇଛି । ସହରରେ ଏତେ ଭୟଙ୍କର ପରିସ୍ଥିତି ସୃଷ୍ଟି ହୋଇଥିଲେ ସୁଦ୍ଧା କାହାର ନିଘା ନାହିଁ । ଜନତାଙ୍କ ମୌଳିକ ସୁବିଧା ଯୋଗାଇବାରେ ମଧ୍ୟ ସରକାର ବିଫଳ ହୋଇଛନ୍ତି । କ୍ଷମତା ଲୋଭରେ ସରକାର କିଛି ଜାଣି ପାରୁନାହାନ୍ତି ବୋଲି କହିଛନ୍ତି ।

ନିକଟରେ ରାହୁଲ ଏକ ପୋଷ୍ଟରରେ ମଧ୍ୟ ଟାର୍ଗେଟ କରିଥିଲେ । ଯେଉଁଥିରେ ସେ ଦର୍ଶାଇଥିଲେ କି, ଦେଶସାରା ଦୁର୍ନୀତି ଚାଲିଛି । ଡବଲ ଇଞ୍ଜିନ୍ କହି କହି ଲୋକଙ୍କ ଜୀବନକୁ ନଷ୍ଟ କରି ଦେଉଛନ୍ତି । କ୍ଷମତାର ଅପବ୍ୟବହାର କରାଯାଉଥିବା ଭଳି ସଙ୍ଗୀନ ଅଭିଯୋଗ ମଧ୍ୟ ଆଣିଛନ୍ତି ।