ନୂଆଦିଲ୍ଲୀ,୧୭/୧୧: ଉତ୍ତରୂପୂର୍ବ ରାଜ୍ୟ ମଣିପୁର ଅସମ୍ଭାଳ ହୋଇପଡିଛି । ପୁଣି ହିଂସା ଦେଖିବାକୁ ମିଳିଛି । ମଣିପୁର ଜଳୁଛି ହେଲେ ତାକୁ ଭୁଲି ଯାଇଛନ୍ତି ପ୍ରଧାନମନ୍ତ୍ରୀ । ମଣିପୁର ହିଂସା ବିଷୟରେ ଥରେ ବି କିଛି କହୁନାହାନ୍ତି । ମଣିପୁର ହିଂସାକୁ ଅଣଦେଖା କରୁଛନ୍ତି ମୋଦି । ମଣିପୁରରେ ଶାନ୍ତି ଫେରାଇବା କଥା ନ ଭାବି ସେ ବିଦେଶ ଗସ୍ତ କରୁଛନ୍ତି । ମୁଁ ପ୍ରଧାନମନ୍ତ୍ରୀଙ୍କୁ ଅପିଲ କରୁଛି ସେ ଥରେ ମଣିପୁର ଗସ୍ତ କରନ୍ତୁ । ରାଜ୍ୟରେ ଶାନ୍ତି ଫେରାଇ ଆଣିବା ଦିଗରେ ପଦକ୍ଷେପ ନିଅନ୍ତୁ ବୋଲି କହିଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧୀ ।

ସୋସିଆଲ ମିଡିଆ ଏକ୍ସରେ ରାହୁଲ ଗାନ୍ଧୀ କହିଛନ୍ତି, ମଣିପୁର ହିଂସା ଥମିବାରେ ନାଁ ନେଉନାହିଁ । ବର୍ଷରୁ ଅଧିକ ସମୟ ହେବ ମଣିପୁରରେ ଅଶାନ୍ତି ଲାଗି ରହିଛି । ମଣିପୁର  ହିଂସା ଦେଶକୁ ହୋହଲାଇ ଦେଇଛି । ପ୍ରତି ଭାରତୀୟ ଚାହାଁନ୍ତି କେନ୍ଦ୍ର ଓ ରାଜ୍ୟ ସରକାର ମଣିପୁରରେ ଶାନ୍ତି ଫେରାଇ ଆଣିବାକୁ ପଦକ୍ଷେପ ଗ୍ରହଣ କରନ୍ତୁ । ମୁଁ ପ୍ରଧାନମନ୍ତ୍ରୀଙ୍କୁ ଅନୁରୋଧ କରୁଛି ସେ ଥରେ ମଣିପୁର ଗସ୍ତ କରନ୍ତୁ । ରାଜ୍ୟରେ ଶାନ୍ତି ଫେରାଇ ଆଣିବାକୁ ପଦକ୍ଷେପ ନିଅନ୍ତୁ ।

ପ୍ରକାଶ ଥାଉ କି, ମଣିପୁରରେ ପାଖାପାଖି ବର୍ଷେ ହେବ ଅଶାନ୍ତି  ଲାଗି ରହିଛି । ମୈତେଇ ସମୁଦାୟ ପକ୍ଷରୁ ବିକ୍ଷୋଭ ପ୍ରଦର୍ଶନ ହୋଇଛି । ବଡଧରଣର ଭଙ୍ଗାରୁଜା ଓ ଜଳାପୋଡା ଭଳି ଘଟଣା ଘଟୁଛି । ରାଜ୍ୟର ଜିରିବାମ ଜିଲ୍ଲାରେ ୬ ଜଣଙ୍କୁ ଅପହରଣ ଓ ହତ୍ୟା ଘଟଣାକୁ ନେଇ ହିଂସାକାଣ୍ଡ ଘଟିଛି । ଏହାକୁ ଦୃଷ୍ଟିରେ ରଖି ୭ଟି ଜିଲ୍ଲାରେ କର୍ଫ୍ୟୁ ଲାଗୁ କରାଯାଇଛି । ଇଣ୍ଟରନେଟ ଓ ମୋବାଇଲ ସେବା ବନ୍ଦ କରି ଦିଆଯାଇଛି ।