ନୂଆଦିଲ୍ଲୀ ୦୩/୦୬: ମେକ୍ ଇନ୍ ଇଣ୍ଡିଆ ଅନ୍ତଗର୍ତ ରାଜସ୍ଥାନରେ ରକ୍ଷା କ୍ଷେତ୍ରକୁ ନୂଆ ପରିଚୟ ମିଳିବାକୁ ଯାଉଛି । ଅପରେସନ୍ ସିନ୍ଦୂରର ସଫଳତା ପରେ ଏବେ ‘ମେକ୍ ଇନ୍ ରାଜସ୍ଥାନ’ ବ୍ରାଣ୍ଡ ଅନ୍ତଗର୍ତ ଅତ୍ୟାଧୁନିକ ରାଇଫଲ ଓ ମଲ୍ଟି ବ୍ୟାରେଲ ମସିନ୍ ଗନ୍ର ନିର୍ମାଣ ଯୋଧପୁରରେ ଆରମ୍ଭ ହେବାକୁ ଯାଉଛି । ଏହା ଯୋଧପୁର ପାଇଁ ବଡ଼ ଉପଲବ୍ଧି । ୧୫୦୦ କୋଟିରୁ ଅଧିକ ଟଙ୍କାର ନିବେଶ ଚୁକ୍ତି ଏବେ କାର୍ଯ୍ୟକାରୀ ହେବାକୁ ଯାଉଛି । ଏଥିପାଇଁ ରକ୍ଷା ମନ୍ତ୍ରାଳୟରୁ ଆବଶ୍ୟକ ଅନୁମତି ମିଳିସାରିଛି । କ୍ଷେତ୍ର ପରୀକ୍ଷଣ ମଧ୍ୟ ସଫଳ ହୋଇଛି । ଏହାର ଅର୍ଥ, ଏଣିକି ରାଜସ୍ଥାନ କେବଳ ଦେଶର ରକ୍ଷା କ୍ଷେତ୍ରରେ ନିଜର ମଜଭୁତ ଉପସ୍ଥିତିକୁ ଉପସ୍ଥାପନ କରିବାକୁ ଯାଉଛି ତାହା ନୁହେଁ, ‘ମେକ୍ ଇନ୍ ଇଣ୍ଡିଆ’ ଅଭିଯାନରେ ଅନ୍ତର୍ଜାତୀୟ ସ୍ତରରେ ‘ମେଡ୍ ଇନ୍ ରାଜସ୍ଥାନ’କୁ ମଧ୍ୟ ସ୍ଥାପିତ କରିବାକୁ ଯାଉଛି ।
ରକ୍ଷା ଷ୍ଟାର୍ଟଅପ୍ ସହ ସଂଶ୍ଳିଷ୍ଟ ପ୍ରମୁଖ ଉଦ୍ୟୋଗପତି ରବିନ୍ଦ୍ର ସିଂହ ରାଠୋର କହିଛନ୍ତି, ଏହି ପ୍ରକଳ୍ପରେ ନିର୍ମାଣ ହେଉଥିବା ଅସ୍ତ୍ରଗୁଡ଼ିକର ପରୀକ୍ଷଣ ବିଦେଶରେ ଶେଷ ହୋଇଛି । ପରୀକ୍ଷଣର ଫଳ ମଧ୍ୟ ଉତ୍ସାହଜନକ ରହିଛି । ରକ୍ଷା ମନ୍ତ୍ରାଳୟ ଏହି ପ୍ରକଳ୍ପକୁ ଦୁଇଟି ଚରଣରେ ମଞ୍ଜୁରି ପ୍ରଦାନ କରିଛି, ଯାହା ଦ୍ୱାରା ଏହି ଅସ୍ତ୍ର କେବଳ ଭାରତୀୟ ସେନା ପାଇଁ ଉପଯୋଗୀ ହେବ ନାହିଁ, ବରଂ ବିଦେଶକୁ ରପ୍ତାନି ମଧ୍ୟ ହୋଇପାରିବ । ଆଫ୍ରିକୀୟ ଦେଶ ଟୋଗୋ ଓ ଏସୀୟ ଦେଶ ଥାଇଲାଣ୍ଡ ଏହି ଅସ୍ତ୍ର ପ୍ରତି ରୁଚି ପ୍ରଦର୍ଶନ କରିଛନ୍ତି । ଏଥିରୁ ପ୍ରମାଣ ହେଉଛି, ରାଜସ୍ଥାନର ଏହି କୌଶଳ ଅନ୍ତର୍ଜାତୀୟ ବଜାରରେ ପ୍ରତିଯୋଗିତା କରିବାରେ ସକ୍ଷମ ।
ମିଲିଟାରୀ ଗ୍ରେଡ୍ ସ୍ନାଇପର୍ ରାଇଫଲ: ଲମ୍ବା ଦୂରକୁ ସଠିକ୍ ଆକ୍ରମଣ ଏହି ପ୍ରକଳ୍ପ ଅନ୍ତର୍ଗତ ମିଲିଟାରୀ ଗ୍ରେଡ୍ ସ୍ନାଇପର୍ ରାଇଫଲ ପ୍ରସ୍ତୁତ କରାଯାଉଛି । ଏହାକୁ ବିଶେଷ କରି ଲମ୍ବା ଦୂରତା ପର୍ଯ୍ୟନ୍ତ ସଠିକ୍ ଟାର୍ଗେଟ୍ କରିବା ପାଇଁ ଡିଜାଇନ୍ କରାଯାଇଛି । ଏହି ରାଇଫଲ ସବ୍-ମିନିଟ୍ ଅଫ୍ ଆଙ୍ଗଲ୍ ସଠିକତା ହାସଲ କରିବାରେ ସକ୍ଷମ । ଅର୍ଥାତ୍ ବହୁତ କମ୍ ବିଚଳନ ସହିତ ଲମ୍ବା ଦୂରକୁ ଟାର୍ଗେଟ୍ କରିପାରେ । ପରୀକ୍ଷଣରେ ଏହା ୨.୪ କିମି ପର୍ଯ୍ୟନ୍ତ ଫାୟାର କରିବାରେ ସଫଳ ହୋଇଛି । ଏଥିସହ ଅଲଗା- ଅଲଗା ଜଳବାୟୁ ଓ ଭୌଗୋଳିକ ପରିସ୍ଥିତିରେ ନିରନ୍ତର ପ୍ରଦର୍ଶନ କରୁଛି, ଯାହା ଏହାକୁ ସବୁ ପାଣିପାଗ ଓ ଅଭିଯାନରେ ଉପଯୋଗୀ କରିଛି । ସୂଚନାଯୋଗ୍ୟ, ଏହି ରାଇଫଲ ଶତ ପ୍ରତିଶତ ‘ମେଡ୍ ଇନ୍ ଇଣ୍ଡିଆ’ ହେବ । ଅର୍ଥାତ୍ ଏହାର ସବୁ ଅଂଶ ଭାରତରେ ନିର୍ମିତ ହେବ ।
ମଲ୍ଟି ବ୍ୟାରେଲ ମସିନ୍ ଗନ୍: ମିନିଟ୍କୁ ୬,୦୦୦ ରାଉଣ୍ଡ୍ ଗୁଳି କରିବ ଏହି ପ୍ରୋଜେକ୍ଟର ଗୁରୁତ୍ୱପୂର୍ଣ୍ଣ ଅଂଶ ହେଉଛି ମଲ୍ଟି ବ୍ୟାରେଲ ମସିନ୍ ଗନ୍ । କୌଶଳ ଦୃଷ୍ଟିରୁ ଏହା ଅତି ଉନ୍ନତ । ୧ ମିନିଟ୍ରେ ପ୍ରାୟ ୬ ହଜାର ରାଉଣ୍ଡ୍ ଫାୟାର କରିବାରେ ଏହା ସକ୍ଷମ । ପାଖାପାଖି ୧୦୦୦ ମିଟର ପର୍ଯ୍ୟନ୍ତ ସଠିକତା ସହ ମାଡ଼ କରିପାରେ । ଏଥିସହ ଏହାର ଏକ ବେଲ୍ଟରେ ୧୫ ହଜାର ରାଉଣ୍ଡ୍ ପର୍ଯ୍ୟନ୍ତ ଗୋଳା ବାରୁଦ ମାଡ଼ କରିବାର ସୁବିଧା ରହିବ । ଭବିଷ୍ୟତରେ ଏହାକୁ ସି-ରାମ୍ (କାଉଣ୍ଟର୍ ରକେଟ୍, ଆର୍ଟିଲରୀ ଓ ମୋର୍ଟାର) ଅର୍ଥାତ୍ ଯୁଦ୍ଧ ବିମାନ-ରୋଧୀ ଅସ୍ତ୍ର ପ୍ରଣାଳୀ ରୂପେ ଅପଗ୍ରେଡ୍ କରାଯିବ, ଯାହା ଏହାକୁ ଶତ୍ରୁର ଡ୍ରୋନ୍ ଓ ବାୟୁମାର୍ଗରୁ ଆକ୍ରମଣ ବିରୋଧରେ ମଧ୍ୟ ଉପଯୁକ୍ତ ଅସ୍ତ୍ର କରିବ । ଏହି ପ୍ରକଳ୍ପକୁ ମଧ୍ୟ ‘ମେକ୍ ଇନ୍ ଇଣ୍ଡିଆ’ ଅନ୍ତର୍ଗତ ବିକଶିତ କରାଯାଉଛି । ଏହାର କୌଶଳ ଓ ନିର୍ମାଣ ପ୍ରକ୍ରିୟା ସମ୍ପୂର୍ଣ୍ଣ ସ୍ୱଦେଶୀ ହେବ ।
ଯୋଧପୁର, ଜୟପୁର ସମେତ ଅନେକ ସହରରେ ହେବ ନେଟ୍ୱର୍କ
ଏହି ପ୍ରକଳ୍ପ ଅନ୍ତର୍ଗତ ଅସ୍ତ୍ରଗୁଡ଼ିକର ବିଭିନ୍ନ ଅଂଶର ନିର୍ମାଣ ଯୋଧପୁର, ଜୟପୁର ଓ ରାଜ୍ୟର ଅନ୍ୟ ଔଦ୍ୟୋଗିକ କ୍ଷେତ୍ରରେ କରାଯିବ । ଯୋଧପୁରର ବୋରାନାଡା ଔଦ୍ୟୋଗିକ କ୍ଷେତ୍ରରେ ସ୍ଥିତ କାରଖାନା ହେବ ମୁଖ୍ୟ ଉତ୍ପାଦନ କେନ୍ଦ୍ର । ସେଠାରେ ମସିନ୍ ଗନ୍ର ବ୍ୟାରେଲ ପ୍ରସ୍ତୁତ କରାଯିବ । ଏହା ସହିତ ଅନ୍ୟ ଆବଶ୍ୟକ ଯନ୍ତ୍ରପାତି ରାଜ୍ୟର ବିଭିନ୍ନ ସହରରେ ନିର୍ମିତ ହେବ । ଶେଷରେ ସେଗୁଡ଼ିକୁ ଏକ ଗୁପ୍ତ ସ୍ଥାନରେ ସଂଲଗ୍ନ କରାଯିବ । ସୁରକ୍ଷା ଦୃଷ୍ଟିରୁ ଉକ୍ତ ସ୍ଥାନକୁ ସାର୍ବଜନୀନ କରାଯାଇ ନାହିଁ ।
ମସିନ୍ ଗନ୍ ଓ ସ୍ନାଇପର ରାଇଫଲର ନିର୍ମାଣ ସହିତ ସେଗୁଡ଼ିକର ସଂଚାଳନ ପାଇଁ ଆବଶ୍ୟକ ବାରୁଦ ଓ ଗୁଳିର ଉତ୍ପାଦନ ମଧ୍ୟ ଏହି ପ୍ରକଳ୍ପର ଗୁରୁତ୍ୱପୂର୍ଣ୍ଣ ଅଂଶ ହେବ । କିନ୍ତୁ ବାରୁଦର ଭଣ୍ଡାର ଘର ପାଇଁ ଭାରତ ସରକାରଙ୍କ ନିଷ୍ପତ୍ତି ଅତ୍ୟନ୍ତ କଠୋର । ସେହି ଅନୁସାରେ, ଯେଉଁ ସ୍ଥାନରେ ବାରୁଦର ଭଣ୍ଡାର ଘର କରାଯିବ, ତା’ର ୮-୧୦ କିମି ପରିବ୍ୟାପ୍ତ ସ୍ଥାନରେ ଜନବସତି ନ ରହିବା ଉଚିତ୍ । ଏହି ସ୍ଥିତିକୁ ଧ୍ୟାନରେ ରଖି ସୁରକ୍ଷା ମାନକ ଦୃଷ୍ଟିରୁ ଏବଂ ପ୍ରକଳ୍ପକୁ ସୁଚାରୁ ରୂପେ ଚଳାଇବା ପାଇଁ ସରକାରଙ୍କୁ ସେଭଳି ଜାଗା ମଗାଯାଇଛି ।
ମେଡ୍ ଇନ୍ ରାଜସ୍ଥାନ ବ୍ରାଣ୍ଡ୍ ଅନ୍ତର୍ଗତ ନିର୍ମିତ ଏହି ଅଧୁନିକ ଅସ୍ତ୍ରଶସ୍ତ୍ର ଆଗାମି ଦିନରେ ଭାରତୀୟ ସେନାର ଶକ୍ତି ବଢ଼ାଇବ । ରାଜ୍ୟକୁ ବୈଶ୍ୱିକ ରକ୍ଷା ମାନଚିତ୍ରରେ ନୂଆ ପରିଚୟ ମଧ୍ୟ ଦେବ ।
