କଲିକତା: ଦକ୍ଷିଣ କଲିକତା ଲ’ କଲେଜରେ ଜଣେ ୨୪ ବର୍ଷୀୟ ଛାତ୍ରୀଙ୍କ ସହ ଜୁନ ୨୫ ତାରିଖରେ ହୋଇଥିବା ଦୁଷ୍କର୍ମ ଘଟଣା ଘଟିଥିବା ଅଭିଯୋଗ ପରେ କଲେଜ କର୍ତ୍ତୃପକ୍ଷ ଅନିର୍ଦ୍ଦିଷ୍ଟ କାଳ ପାଇଁ ସମସ୍ତ କ୍ଲାସ୍ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। ଏହି ନିଷ୍ପତ୍ତି କଲେଜର ଗଭର୍ଣ୍ଣିଂ ବଡି ଦ୍ୱାରା ଜୁନ ୨୯ ତାରିଖରେ ଜାରି ହୋଇଥିବା ଏକ ବିଜ୍ଞପ୍ତିରେ ଘୋଷଣା କରାଯାଇଛି। ବିଜ୍ଞପ୍ତିରେ କୁହାଯାଇଛି, “ସମସ୍ତ ବିଏ ଏଲଏଲବି ଏବଂ ଏଲଏଲଏମ (ଜେନେରାଲ ଏବଂ ଅନର୍ସ) କ୍ଲାସ୍ ସ୍ଥଗିତ ରହିବ ଏବଂ କଲେଜ ପରିସର ପରବର୍ତ୍ତୀ ନିର୍ଦ୍ଦେଶ ନଆସିବା ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ବନ୍ଦ ରହିବ”।
ଅଭିଯୋଗ ଅନୁଯାୟୀ,ଗତ ଜୁନ ୨୫ ତାରିଖରେ କଲେଜ ପରିସରରେ ଥିବା ଗାର୍ଡ ରୁମରେ ଜଣେ ପୂର୍ବତନ ଛାତ୍ର ଏବଂ ଦୁଇ ଜଣ ବରିଷ୍ଠ ଛାତ୍ର ଜଣେ ପ୍ରଥମ ବର୍ଷ ଛାତ୍ରୀଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଏହି ଘଟଣାରେ ମୁଖ୍ୟ ଅଭିଯୁକ୍ତ ତଥା ଜଣେ ତୃଣମୂଳ କଂଗ୍ରେସ ଛାତ୍ର ସଂଗଠନର ନେତା ମନୋଜିତ ମିଶ୍ରଙ୍କ ସମେତ ଜାଇବ ଅହମଦ (୧୯) ଏବଂ ପ୍ରମିତ ମୁଖୋପାଧ୍ୟାୟ (୨୦) ନାମକ ଦୁଇ ଛାତ୍ରଙ୍କୁ ଗିରଫ କରାଯାଇଛି। ଏହା ସହିତ କଲେଜର ଜଣେ ୫୫ ବର୍ଷୀୟ ସୁରକ୍ଷା ପ୍ରହରୀ ପିନାକୀ ବାନାର୍ଜୀଙ୍କୁ ମଧ୍ୟ ଜୁନ ୨୮ ତାରିଖରେ ଗିରଫ କରାଯାଇଛି।
ପୀଡ଼ିତାଙ୍କ ଅଭିଯୋଗ ଅନୁଯାୟୀ, ମନୋଜିତ ମିଶ୍ର ପ୍ରଥମେ ତାଙ୍କୁ ବିବାହ ପ୍ରସ୍ତାବ ଦେଇଥିଲେ, ଯାହାକୁ ସେ ପ୍ରତ୍ୟାଖ୍ୟାନ କରିଥିଲେ। ଏହା ପରେ ମନୋଜିତ ତାଙ୍କୁ ବଳପୂର୍ବକ ଗାର୍ଡ ରୁମରେ ବନ୍ଦ କରି ଦୁଷ୍କର୍ମ କରିଥିଲା। ପୀଡ଼ିତା ଆହୁରି ଅଭିଯୋଗ କରିଛନ୍ତି ଯେ ଅଭିଯୁକ୍ତମାନେ ତାଙ୍କୁ ହକି ଷ୍ଟିକରେ ପିଟିଥିଲେ, ଘଟଣାର ଭିଡିଓ ରେକର୍ଡ କରିଥିଲେ ଏବଂ ଏହାକୁ ବ୍ୟବହାର କରି ତାଙ୍କୁ ବ୍ଲାକମେଲ ମଧ୍ୟ କରିଥିଲେ। ସିସିଟ଼ିଭି ଫୁଟେଜରେ ମଧ୍ୟ ପୀଡ଼ିତାଙ୍କ ବୟାନକୁ ସମର୍ଥନ କରୁଥିବା ପ୍ରମାଣ ମିଳିଛି। ଯେଉଁଥିରେ ଅଭିଯୁକ୍ତମାନେ ତାଙ୍କୁ କଲେଜ ଗେଟରୁ ଟାଣି ନେଇ ଗାର୍ଡ ରୁମକୁ ନେଉଥିବା ଦେଖାଯାଇଛି।
କଲିକତା ପୁଲିସ ଏହି ମାମଲାରେ ଏକ ସ୍ପେଶାଲ ଇନଭେଷ୍ଟିଗେସନ ଟିମ (ଏସଆଇଟି) ଗଠନ କରିଛି। ଯାହା ଏସିପି ପ୍ରଦୀପ ଘୋଷାଲଙ୍କ ନେତୃତ୍ୱରେ ଏହି ତଦନ୍ତ ଭାରକୁ ଆଗକୁ ନେଉଛି। ପୁଲିସ ଗାର୍ଡ ରୁମ, କଲେଜ ଗେଟ ଏବଂ ଅନ୍ୟ କିଛି ସ୍ଥାନକୁ ମଧ୍ୟ ସିଲ କରିଛି ଏବଂ ଅଭିଯୁକ୍ତଙ୍କ ମୋବାଇଲ ଫୋନ ଜବତ କରି ଫରେନସିକ ପରୀକ୍ଷା ପାଇଁ ପଠାଇଛି। ପୀଡ଼ିତାଙ୍କ ମେଡିକାଲ ରିପୋର୍ଟରେ ଶାରୀରିକ ଆଘାତର ଚିହ୍ନ ମଧ୍ୟ ମିଳିଛି, ଯାହା ତାଙ୍କ ଅଭିଯୋଗକୁ ସମର୍ଥନ କରିଛି।
ଏହି ଘଟଣା ଦେଶବ୍ୟାପୀ ଉତ୍ତେଜନା ସୃଷ୍ଟି କରିଛି। ଛାତ୍ରଛାତ୍ରୀ ଏବଂ ସାଧାରଣ ଜନତା କଲେଜ ପରିସରରେ ନିରାପତ୍ତା ବୃଦ୍ଧି ଏବଂ ତୁରନ୍ତ ନ୍ୟାୟ ଦାବି କରି ବିକ୍ଷୋଭ ପ୍ରଦର୍ଶନ ଜାରି ରଖିଛନ୍ତି। କଲିକତା ହାଇକୋର୍ଟରେ ତିନୋଟି ଜନସ୍ୱାର୍ଥ ମାମଲା (ପିଆଇଏଲ) ଦାୟର ହୋଇଛି। ଯେଉଁଥିରେ ଏକ ଅବସରପ୍ରାପ୍ତ ବିଚାରପତିଙ୍କ ତତ୍ତ୍ୱାବଧାନରେ ତଦନ୍ତ ଏବଂ କଲେଜଗୁଡ଼ିକରେ ନିରାପତ୍ତା ବ୍ୟବସ୍ଥା ବୃଦ୍ଧି ପାଇଁ ଦାବି କରାଯାଇଛି। ଏହା ସହିତ ସୁପ୍ରିମ କୋର୍ଟରେ ମଧ୍ୟ ଏକ ଆବେଦନ ଦାୟର ହୋଇଛି, ଯେଉଁଥିରେ ସିବିଆଇ ତଦନ୍ତ ପାଇଁ ଅନୁରୋଧ କରାଯାଇଛି।
ମୁଖ୍ୟ ଅଭିଯୁକ୍ତ ମନୋଜିତ ମିଶ୍ରଙ୍କ ବିରୁଦ୍ଧରେ ପୂର୍ବରୁ ମଧ୍ୟ ଯୌନ ଉତ୍ପୀଡ଼ନ ଏବଂ ଅନ୍ୟାନ୍ୟ ଅପରାଧିକ ମାମଲାରେ ଅଭିଯୋଗ ରହିଛି। ୨୦୧୮ ମାର୍ଚ୍ଚରେ ଦୁଇ ଜଣ ଛାତ୍ରୀ ତାଙ୍କ ବିରୁଦ୍ଧରେ ଯୌନ ଉତ୍ପୀଡ଼ନର ଅଭିଯୋଗ ଆଣିଥିଲେ, ଯାହା ପରେ ତାଙ୍କୁ କିଛି ସମୟ ପାଇଁ କଲେଜରୁ ସସ୍ପେନ୍ସନ କରାଯାଇଥିଲା। ତଥାପି, କଲେଜ କର୍ତ୍ତୃପକ୍ଷ ତାଙ୍କ ନିଯୁକ୍ତି ନବୀକରଣ କରିଥିବା ନେଇ ଏକ ପତ୍ର ମଧ୍ୟ ପ୍ରକାଶ ପାଇଛି। ଯାହା କଲେଜ ପ୍ରଶାସନର ନିରାପତ୍ତା ନୀତି ଉପରେ ପ୍ରଶ୍ନ ଉଠାଇଛି।
ପୁଲିସ ଏହି ମାମଲାରେ କଠୋର କାର୍ଯ୍ୟାନୁଷ୍ଠାନ ନେବାକୁ ପ୍ରତିଶ୍ରୁତି ଦେଇଛି ଏବଂ ଅଭିଯୁକ୍ତମାନଙ୍କୁ ଘଟଣାର ୧୨ ଘଣ୍ଟା ମଧ୍ୟରେ ଗିରଫ କରାଯାଇଥିବା ନେଇ ଦାବି କରିଛି। ତେବେ ଏନେଇ ଅଧିକ ତଦନ୍ତ ଜାରି ରହିଥିବା ବେଳେ ପୁଲିସ ଅଧିକ ପ୍ରମାଣ ସଂଗ୍ରହ କରିବା ପାଇଁ ୨୫ରୁ ଅଧିକ ବ୍ୟକ୍ତିଙ୍କୁ ପଚରାଉଚରା କରିବାକୁ ଯୋଜନା କରିଛି।
