ପୁରୀ,୧୭/୦୬: ବେଶ୍ ତତ୍ପରତାର ସହ ଚାଲିଛି ଶ୍ରୀବିଗ୍ରହଙ୍କ ରଥ ନିର୍ମାଣ । ସୋମବାର ତିନି ରଥରେ କଇଁଚି ଓ ଅନ୍ଧାରି ତାଗ କାମ ଶେଷ ହୋଇଛି । ରଥର ବାନେ୍ଧଣୀ ହେଉଛି ‘କଇଁଚି’ । ଚାରିନାହାକାର ଉଭୟ ପାଶ୍ୱର୍ରେ କଇଁଚି ଛନ୍ଦା ହୁଏ । ରଥ ଉପର ଅଂଶରେ ଅନ୍ଧାରି ତାଗ କାମ । କଇଁଚି ଓ ଅନ୍ଧାରିତାଗ ଲାଗିବା ଦ୍ୱାରା ରଥ ଆଉ ଝାଙ୍କି ହୋଇ ନଥାଏ । ଏହାଦ୍ୱାରା ଅଧିକ ମଜଭୁତ ହୁଏ ରଥ । ସୋମବାର ରଥଖଳାରେ ଚନ୍ଦ୍ରଶାଳି କାମ ଆରମ୍ଭ ହୋଇଛି । ଦୁଆରଘଡ଼ାର ଏହା ପ୍ରମୁଖ ଅଂଶ । ମଙ୍ଗଳବାର ରଥରେ ପାରାଭାଡ଼ି ଉଠିବା ସହ ୧୨ ପରସ୍ତ ପୋଟଳ ଉଠାଯିବାର କାର୍ଯ୍ୟକ୍ରମ ରହିଛି ।
ରଥରେ କଇଁଚିରେ ୮/୨ ସାଇଜର କାଠ ‘ଅନ୍ଧାରି ତାଗ’ ଦୁଇଟି ଖାପ କରାଯାଇ ସେଟିଂ କରାଯାଇଛି । ଏହା ରଥର ବାନେ୍ଧଣୀ । କଇଁଚି ସହ ଭୂଇଁ ଶେଣି, ଭୂଇଁ ଖମ୍ବୀ ଓ ପାଖୁଡ଼ାକୁ ବାନ୍ଧି ରଖିବାରେ ସହାୟକ । ଅଭିଜ୍ଞ ବିଶ୍ୱକର୍ମାଙ୍କ ପରାମର୍ଶରେ ଭୋଇ ସେବକ ଓ ବିଶ୍ୱକର୍ମା ମିଶି ରଥରେ ଏହି କାର୍ଯ୍ୟ କରିଛନ୍ତି । ଚାରି ନାହାକା ବାନେ୍ଧଣି ପାଇଁ କଇଁଚି ଫିଟିଂ କରାଯାଇଛି । ୧୩ ପରସ୍ତ ପୋଟଳ ନିର୍ମାଣ ଶେଷ ହୋଇଛି । ବିଶ୍ୱକର୍ମା ମାପ ଅନୁଯାୟୀ ପଟା ପ୍ରସ୍ତୁତ କଲାପରେ କମାର ସେବକଙ୍କ ଦ୍ୱାରା ତିଆରି ବାଗିଆ କଣ୍ଟା ଓ ଗୋଡ଼ିଛାଲ କଣ୍ଟା ବାଡ଼େଇ ପୋଟଳ ପ୍ରସ୍ତୁତ ହୋଇଛି । ଆଜି ପାରାଭାଡ଼ିରେ ପାରା ଚିତ୍ର ସରିଛି । ମଙ୍ଗଳବାର ରଥରେ ପୋଟଳ ଉଠା କାର୍ଯ୍ୟ ସାରିବାକୁ ନିର୍ମାଣକାରୀ ପ୍ରସ୍ତୁତ ଅଛନ୍ତି ।
ସୋମବାର ରଥର ୧୨ ଅଶ୍ୱ ବାହାରକୁ ଆସି ପ୍ରସ୍ତୁତି ଅପେକ୍ଷାରେ ରହିଛନ୍ତି । ରଥ ସୌନ୍ଦର୍ଯ୍ୟକରଣ ପାଇଁ ରଙ୍ଗ କାର୍ଯ୍ୟ ଚାଲିଛି । ପାଶ୍ୱର୍ ଦେବତା, ଶିଖରଡ଼ମ୍ବରୁ(ପାଶ୍ୱର୍ ଦେବତାଙ୍କ ଆସ୍ଥାନ), ଓଲଟ ଶୁଆ, ସଖୀ, ଦ୍ୱାରପାଳ, ଋଷିପଟା ଆଦି ରଥାଂଶକୁ ଚିତ୍ରକରମାନେ ରଙ୍ଗ ଦେଉଛନ୍ତି । ରୂପକାର ସେବକମାନେ ରଥର ବିଭିନ୍ନ ଅଂଶ ଖୋଦେଇରେ ବ୍ୟସ୍ତ ଅଛନ୍ତି । ଦର୍ଜୀସେବକ କନାମଣ୍ଡଣି କାର୍ଯ୍ୟ ଚାଲୁ ରଖିଛନ୍ତି। ଦୋଳବେଦି ଅସ୍ଥାୟୀ ଶାଳରେ କମାର ସେବକମାନେ ନାରାଜ ଓ ଜଙ୍ଘା କଣ୍ଟା ତିଆରିଛନ୍ତି । ନାରାଜ କଣ୍ଟାରେ ରଥରେ ଓଲଟ ଶୁଆ ଲାଗିବେ । ଜଙ୍ଘା କଣ୍ଟା ପୋଟଳରେ ଲାଗିବ । ମହାପ୍ରଭୁଙ୍କ ଅନବସର ସେବାରେ ଲାଗିବା ପାଇଁ ନଡ଼ିଆ ଗଛ ଗଡ଼ରୁ ଆବଶ୍ୟକ ସାମଗ୍ରୀ ତିଆରି ହୋଇଛି । ଏହା ବଡ଼ବାଡ଼ର କାର୍ଯ୍ୟ ବୋଲି ବିଶ୍ୱକର୍ମା ବାଳକୃଷ୍ଣ ମହାରଣା କହିଛନ୍ତି ।
