ନୂଆଦିଲ୍ଲୀ,୦୬/୦୮: ରବୀନ୍ଦ୍ର ଜାଡ଼େଜା ଭାରତୀୟ କ୍ରିକେଟ ଦଳର ସେ ନାମ, ଯିଏକି ପ୍ରତି ମୂହୁର୍ତ୍ତରେ ନିଜକୁ ପ୍ରମାଣିତ କରିଛନ୍ତି । ଦୁଇ ଦିନ ତଳେ ସରିଥିବା ଇଂଲଣ୍ଡ ଗସ୍ତରେ ତାଙ୍କ ଜବରଦସ୍ତ ପ୍ରଦର୍ଶନ ରହିଥିଲା । ସାର୍ ଜାଡେଜାଙ୍କ ଚମକ ଦେଖିବାକୁ ମିଳିଥିଲା । ଭାରତକୁ ସଙ୍କଟରୁ ଉଦ୍ଧାର କରିବାରେ ତାଙ୍କର ଭୂମିକା ରହିଛି । ଇଂଲଣ୍ଡ ବିପକ୍ଷ ୫ଟି ଟେଷ୍ଟ ମ୍ୟାଚରେ ୮୬ ଆଭରେଜରେ ୫୧୬ରନ୍ କରିଛନ୍ତି । ୧ ଶତକ ଓ ୫ ଅର୍ଦ୍ଧଶତକ ରହିଛି । ମାଞ୍ଚେଷ୍ଟରରେ ଚମତ୍କାର ପାଳି ଖେଳିଥିଲେ ।
ବାମହାତୀ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ଅଭିଜ୍ଞତା ଇଂଲଣ୍ଡରେ କଷ୍ଟକର ପରିସ୍ଥିତିରେ ଟିମ୍ ଇଣ୍ଡିଆ ପାଇଁ ଏକ ବଡ଼ ପରିବର୍ତ୍ତନ ଆଣିଛି । ଉଭୟ ବୋଲିଂ ଓ ବ୍ୟାଟିଂରେ କାମଲ କରିଥିଲେ ଜାଡ଼େଜା । ୨୦୧୨ରେ ଟେଷ୍ଟ ଡେବ୍ୟୁ କରିଥିଲେ ଜାଡେଜା । ଧୋନୀଙ୍କ ଅଧିନାୟକତ୍ୱରେ ଇଂଲଣ୍ଡ ବିପକ୍ଷରେ ନାଗପୁରରେ ଡେବ୍ୟୁ କରିଥିଲେ । ସେବେ ଭାରତୀୟ ଦଳରେ ସଚିନ ତେନ୍ଦୁଲକର ବି ଥିଲେ । ବିରାଟ କୋହଲି ମଧ୍ୟ ସାମିଲ ଥିଲେ । ରୋହିତ- ଧୋନୀଙ୍କ ସହିତ ଅନେକ ଟ୍ରଫି ଜିତିଛନ୍ତି ଜଡ଼ୁ । ଏବେ ବି ଭାରତୀୟ ଟିମ୍ର ଜଣେ ମଜବୁତ ପ୍ଲେୟାର ହୋଇଛନ୍ତି । ଶୁବମନ ସେନାରେ ସିନିୟର ଖେଳାଳି ହୋଇଛନ୍ତି ।
ଜାଡ଼େଜାଙ୍କ ଇଣ୍ଟରନ୍ୟାସନାଲ ରେକର୍ଡ- ୩୬ ବର୍ଷୀୟ ରବୀନ୍ଦ୍ର ଜାଡ଼େଜା ଦୀର୍ଘ ସମୟରୁ ଆଇସିସି ଟେଷ୍ଟ ଅଲରାଉଣ୍ଡର ରାଙ୍କିଂ ନମ୍ବର ୱାନ୍ରେ ରହିଛନ୍ତି । ୮୫ ଟେଷ୍ଟ ମ୍ୟାଚ, ୨୦୪ ଦିନିକିଆ ଏବଂ ୭୪ଟି ଟି-ଟ୍ୱେଣ୍ଟି ଖେଳିଛନ୍ତି । ଟେଷ୍ଟ ମ୍ୟାଚରେ ୩୮୮୬ ରନ୍ କରି ୩୩୦ ୱିକେଟ୍ ନେଇଛନ୍ତି । ଦିନିକିଆ ତାଙ୍କ ଖାତାରେ ୨୮୦୬ ରନ୍ ସହିତ ୨୩୧ ୱିକେଟ ନେଇଛନ୍ତି । ଟି-୨୦ରେ ୫୪ ୱିକେଟ ସହିତ ୫୧୫ ରନ୍ କରିଛନ୍ତି । ଆଇସିସି ଚାମ୍ପିଅନ୍ସ ଟ୍ରଫି ୨୦୧୩ରେ ଜାଡେଜା ଟିମ୍ ଇଣ୍ଡିଆରେ ଥିଲେ । ଏମ୍ଏସ ଧୋନୀଙ୍କ ନେତୃତ୍ୱରେ ବିଜୟ ହାସଲ କରିଥିଲା । ଆଇସିସି ଟି-୨୦ ବିଶ୍ୱକପ୍ ୨୦୨୪ ଏବଂ ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ରେ ବିଜୀୟ ଟିମ୍ ସଦସ୍ୟ ଥିଲେ ସାର୍ ଜାଡ଼େଜା । ଟି-୨୦ ବିଶ୍ୱକପ ପରେ ଟି-୨୦ ଅନ୍ତର୍ଜାତୀୟରୁ ଅବସର ନେଇଥିଲେ ଜାଡେଜା । ଏବେ ସେ କେବଳ ଦିନିକିଆ ଏବଂ ଟେଷ୍ଟ ଖେଳୁଛନ୍ତି ।
