ନୂଆଦିଲ୍ଲୀ, ୨୫/୦୭ : ବହୁ ଚର୍ଚ୍ଚିତ ରେଣୁକାସ୍ୱାମୀ ହତ୍ୟା ମାମଲା। କନ୍ନଡ଼ ଅଭିନେତା ଦର୍ଶନ ଥୁଗୁଦୀପାଙ୍କ ବଢିଲା ଅଡ଼ୁଆ। ଦର୍ଶନଙ୍କ ସହ ଅନ୍ୟ ୬ ଜଣଙ୍କୁ ଜାମିନ ଦେବା ନେଇ କର୍ଣ୍ଣାଟକ ହାଇକୋର୍ଟଙ୍କ ଉପରେ ବର୍ଷିଲେ ସୁପ୍ରିମକୋର୍ଟ। କହିଲେ ନ୍ୟାୟପାଳିକାଙ୍କ ଶକ୍ତିର ଦୁରୁପଯୋଗ କରିଛନ୍ତି ହାଇକୋର୍ଟ। ଟ୍ରାଏଲ କୋର୍ଟ ଜଜ୍ ଏପରି ଭୁଲ୍ କରିପାରନ୍ତି, କିନ୍ତୁ ହାଇକୋର୍ଟ ବିଚାରପତି ନୁହେଁ। ଅଭିନେତାଙ୍କ ଜାମିନ ରଦ୍ଦ କରିବାକୁ କର୍ଣ୍ଣାଟକ ସରକାରଙ୍କ ଯାଚିକାକୁ ସଂରକ୍ଷିତ ରଖିଛନ୍ତି ଶୀର୍ଷ ଅଦାଲତ। ଜଷ୍ଟିସ୍ ଜେ.ବି ପାରଦିୱାଲା ଏବଂ ଜଷ୍ଟିସ୍ ଆର୍. ମହାଦେବନଙ୍କ ଖଣ୍ଡପୀଠ ଏହି ମାମଲାରେ ଶୁଣାଣି କରିଛନ୍ତି।
୨୦୨୪ ଡିସେମ୍ବର ୧୩ରେ ହାଇକୋର୍ଟ ଦର୍ଶନଙ୍କୁ ଜାମିନ ଦେଇଥିଲେ । ଏହା ପରେ ସେ ଜେଲରୁ ମୁକୁଳିଥିଲେ । କର୍ଣ୍ଣାଟକ ସରକାର ହାଇକୋର୍ଟଙ୍କ ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ । ଜୁଲାଇ ୧୭ରେ ସୁପ୍ରିମକୋର୍ଟ ଅଭିନେତା ଦର୍ଶନଙ୍କୁ ମିଳିଥିବା ଜାମିନ ଉପରେ ପ୍ରଶ୍ନ ଉଠାଇଥିଲେ। ଗୁରୁବାର ପୁଣି ଥରେ କର୍ଣ୍ଣାଟକ ହାଇକୋର୍ଟଙ୍କ ଉପରେ ବର୍ଷିଥିଲେ। ହାଇକୋର୍ଟ ଜାମିନ ଦେବାବେଳେ ନିଜ ବିବେକର ବ୍ୟବହାର କରିନାହାନ୍ତି। ହାଇକୋର୍ଟ ଏଭଳି ଭୁଲ୍ କରିବା କଥା ନୁହେଁ । ଅନ୍ୟ ମାମଲାରେ ବି ହାଇକୋର୍ଟ ଏପରି ରାୟ ଦେଉଛନ୍ତି କି ବୋଲି ଖଣ୍ଡପୀଠ ପ୍ରଶ୍ନ କରିଥିଲେ। ବିଶେଷକରି ହତ୍ୟା ମାମଲାରେ ଗିରଫଦାରିର ଆଧାର ନ ଥିବା ଟିପ୍ପଣୀ ଦେବା ଅସ୍ୱୀକାର୍ଯ୍ୟ ବୋଲି କହିଥିଲେ।
ପ୍ରକାଶଥାଉ କି, ଗତବର୍ଷ ଜୁନ୍ ୯ରେ ବେଙ୍ଗାଲୁରୁର କାମାକ୍ଷୀପାଲ୍ୟା ଅଞ୍ଚଳରେ ଥିବା ଏକ ଆପାର୍ଟମେଣ୍ଟ ନିକଟରୁ ଅଭିନେତା ଦର୍ଶନଙ୍କ ଜଣେ ପ୍ରଶଂସକ ରେଣୁକାସ୍ୱାମୀଙ୍କ ମୃତଦେହ ମିଳିଥିଲା। ଦର୍ଶନ ବିବାହିତ ହୋଇ ବି ତାଙ୍କ ସହକଳାକାର ପବିତ୍ରାଙ୍କ ସହ ମିଳାମିଶା କରିବାକୁ ରେଣୁକାସ୍ୱାମୀ ପସନ୍ଦ କରି ନଥିଲେ । ତେଣୁ ରେଣୁକାସ୍ୱାମୀ ପବିତ୍ରାଙ୍କୁ ଆପତ୍ତିଜନକ ମେସେଜ କରିବା ସହ ଧମକ ବି ଦେବାରେ ଲାଗିଥିଲେ । ଏଥିରେ ଉତ୍ତ୍ୟକ୍ତ ହୋଇ ଦର୍ଶନ ତାଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା।
