ଦାରିଙ୍ଗବାଡି,୨୬/୧୦: ବିଡ଼ିଓ ଗଦାଧର ପାତ୍ରଙ୍କ ବଦଳି ହୋଇଥିବା ବେଳେ ଦାରିଙ୍ଗବାଡି ବ୍ଲକ କାର୍ଯ୍ୟାଳୟ ରେ ଯୋଗ ଦେଇଛନ୍ତି ନୂତନ ବିଡ଼ିଓ ପ୍ରୀତି ରଞ୍ଜନ ରଥ । ପ୍ରୀତି ରଞ୍ଜନ ରଥ ଏହା ପୂର୍ବରୁ ନବରଙ୍ଗପୂର ଜିଲ୍ଲା ଉମରକୋଟ ବ୍ଲକରେ ବିଡ଼ିଓ ଭାବେ କାର୍ଯ୍ୟ କରିଥିବା ସହ ଏନଏସିରେ କାର୍ଯ୍ୟ ନିର୍ବାହୀ ଅଧିକାରୀ ଭାବେ ଅତିରିକ୍ତ ଦାୟିତ୍ବରେ ରହିଥିଲେ ।
ଶୁକ୍ରବାର ସନ୍ଧ୍ୟା ସମୟରେ ଜିଲ୍ଲା ମୁଖ୍ୟ କାର୍ଯ୍ୟାଳୟରେ ପହଞ୍ଚି ଜିଲ୍ଲାପାଳ ଅମ୍ରିତ ଋତୁରାଜ ଓ ଜିଲ୍ଲା ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଶମ୍ଭୁନାଥ ନନ୍ଦୀଙ୍କୁ ସାକ୍ଷାତ କରି ଦାରିଙ୍ଗବାଡି ବ୍ଲକ କାର୍ଯ୍ୟାଳୟରେ ରାତ୍ର ୧୦ ଟାରେ ପହଞ୍ଚି ଦାୟିତ୍ତ୍ୱ ଗ୍ରହଣ କରିଥିଲେ । ପୂର୍ବ ବିଡ଼ିଓ ଗଦାଧର ପାତ୍ର ଦାରିଙ୍ଗବାଡି ବ୍ଲକରେ ତିନି ବର୍ଷ କାର୍ଯ୍ୟ କରିଥିବା ବେଳେ ତାଙ୍କ ନାମରେ ଅନେକ ଅଭିଯୋଗ ରହିଥିଲା । ସରପଞ୍ଚ ମାନଙ୍କୁ ଦୁର୍ବ୍ୟବହାର କରିବା ସହ ଶ୍ରୀ ମନ୍ଦିର ପରିକ୍ରମା ପ୍ରକଳ୍ପ ଓ ଆମ ଓଡ଼ିଶା ନବୀନ ଓଡ଼ିଶା ଯୋଜନାରେରେ ଦୁର୍ନୀତି କରିଥିବା ନେଇ ସରପଞ୍ଚ ସଂଘ କନ୍ଧମାଳ ଜିଲ୍ଲାପାଳ, ସାଂସଦ ଓ ମୁଖ୍ୟମନ୍ତ୍ରୀଙ୍କୁ ଭେଟି ଅଭିଯୋଗ ପ୍ରଦାନ କରିଥିଲେ ।
ଏହା ପରେ ଅକ୍ଟୋବର ୧୪ ତାରିଖରେ କନ୍ଧମାଳ ଜିଲ୍ଲା ପରିଷଦ କାର୍ଯ୍ୟାଳୟରୁ ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ ଆସି ଘଟଣାର ତଦନ୍ତ କରିଥିଲେ । ଯେଉଁ ସରପଞ୍ଚ ମାନଙ୍କୁ ତଦନ୍ତ ପାଇଁ ଡକାଯାଇଥିଲା, ସେ ସମସ୍ତ ସରପଞ୍ଚ ଯୋଗ ଦେଇ ନିଜ ନିଜର ଅଭିଯୋଗ ଅଧିକାରୀଙ୍କ ସାମ୍ନାରେ ଉପସ୍ଥାପନ କରିବା ସହ ଲିଖିତ ଭାବେ ପ୍ରଦାନ କରିଥିଲେ । ବର୍ତ୍ତମାନ ପର୍ଯ୍ୟନ୍ତ ଗଦାଧର ପାତ୍ରଙ୍କୁ କୌଣସି ପଦ ପଦବୀ ଦିଆଯାଇ ନଥିବା ବେଳେ ସେ କେଉଁଠିକି ଯିବେ କିଛି ସ୍ଥିର ହୋଇ ନାହିଁ । ସଂଘର ଦାବି ମୁତାବକ ବିଡ଼ିଓଙ୍କ ବଦଳି ହୋଇଥିବା ବେଳେ ଦୁର୍ନୀତିର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସଂଘ ଦାବି କରିଛି । ଗଦାଧର ପାତ୍ର ଖାଲି କବିତା ଲେଖିବା ଓ କବିତା କାର୍ଯ୍ୟକ୍ରମ କରିବାରେ ବ୍ୟସ୍ତ ରହି ଦାରିଙ୍ଗବାଡି ବ୍ଲକର ବିକାଶ ପ୍ରତି ସଠିକ୍ ଧ୍ୟାନ ଦେଇ ନଥିବା ଯୋଗୁଁ ଅଞ୍ଚଳବାସୀ କ୍ଷୁବ୍ଧ ପ୍ରକାଶ କରିଥିବା ବେଳେ ବଦଳିକୁ ନେଇ ସରପଞ୍ଚ ସଂଘ ସମେତ ଅଞ୍ଚଳବାସୀ ଖୁସି ପ୍ରକାଶ କରିଛନ୍ତି ।
