ଝାରସୁଗୁଡା,୧୮/୦୫: ବେଲପାହାଡ କୋଲ କରିଡର ରାସ୍ତା ନିର୍ମାଣର ଶିଳାନ୍ୟାସ କରିଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ । ଏମସିଏଲ ଅନୁଦାନରେ ୩୫ କୋଟି ୭୪ ଲକ୍ଷ ୬୬ ହଜାର ବ୍ୟୟ ଅଟକଳରେ ଚାରି ଥାକିଆ ବାଇପାସ ରାସ୍ତା ନିର୍ମାଣ ହେବ ।
ଦୀର୍ଘ ବର୍ଷ ହେଲା ଏହି ଡେଡିକେଟେଡ କୋଲ କରିଡର ନିର୍ମାଣ ଲାଗି ପାଣ୍ଠି ସଂଗ୍ରହ ସହ ଉଦ୍ୟମ ଆରମ୍ଭ ହୋଇଥିଲା । ପୂର୍ବରୁ ଥରେ ଟେଣ୍ଡର କରାଯାଇ କାର୍ଯ୍ୟାଦେଶ ମଧ୍ୟ ପ୍ରଦାନ କରାଯାଇଥିଲା । ହେଲେ ସଂପୃକ୍ତ ଠିକା ସଂସ୍ଥା କାର୍ଯ୍ୟରୁ ଓହରି ଯିବା ପରେ ପୁଣି ଥରେ ଟେଣ୍ଡର କରାଯାଇ ଏହାର ନିର୍ମାଣ ଦିଗରେ ପଦକ୍ଷେପ ନିଆଯାଇଛି । କିଛି ଜମି ଅଧିଗ୍ରହଣ ହେବାରେ ସମସ୍ୟା ହେବାରୁ ଏହାର ନିର୍ମାଣରେ ବାଧକ ସାଜିଥିଲା । ଆଜିର ଶିଳାନ୍ୟାସ କାର୍ଯ୍ୟକ୍ରମରେ ଜିଲ୍ଲାପାଳ ଅବୋଲି ସୁନୀଲ ନରୱଣେ ଉପସ୍ଥିତ ଥିଲେ । ଦେଢ ବର୍ଷ ସମୟରେ ଏହାର ନିର୍ମାଣ ସଂପୂର୍ଣ୍ଣ କରିବାର ଲକ୍ଷ୍ୟ ରହିଛି ।
