ନୂଆଦିଲ୍ଲୀ: ବାଂଲାଦେଶରେ ହିନ୍ଦୁ ଓ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାରକୁ ନେଇ ଅସନ୍ତୋଷ ପ୍ରକାଶ କରିଛି ରାଷ୍ଟ୍ରୀୟ ସ୍ୱୟମ ସେବକ ସଂଘ(ଆର୍ଏସଏସ)। ଭାରତ ତୁରନ୍ତ ଏନେଇ କାର୍ଯ୍ୟାନୁଷ୍ଠାନ ନେଉ। ଅନ୍ତ୍ରର୍ଜାତୀୟ ସ୍ତରରେ ବାଂଲାଦେଶ ଉପରେ ଚାପ ସୃଷ୍ଟି କରୁ ବୋଲି ଆର୍ଏସଏସ କହିଛି।    

ଆରଏସଏସର ସାଧାରଣ ସମ୍ପାଦକ ଦତ୍ତାତ୍ରେୟ ହୋସବୋଲେ ବାଙ୍ଗଲାଦେଶରେ ହିନ୍ଦୁଙ୍କ ଉପରେ ହେଉଥିବା ନିର୍ଯାତନାକୁ କଡ଼ା ନିନ୍ଦା କରିଛନ୍ତି। ଅନ୍ୟାୟ କରି ଗିରଫ କରାଯାଇଥିବା ହିନ୍ଦୁ ସନ୍ନ୍ୟାସୀ ଚିନ୍ମୟ କୃଷ୍ଣ ଦାସଙ୍କୁ ତୁରନ୍ତ ମୁକୁଳାଇବାକୁ ସେ ଦାବି କରିଛନ୍ତି। ମହମ୍ମଦ ୟୁନୁସଙ୍କ ନେତୃତ୍ୱରେ ବାଂଲାଦେଶର ଅନ୍ତରୀଣ ସରକାର ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାର ଉପରେ ନିରବ ଦ୍ରଷ୍ଟା ସାଜିଛନ୍ତି ବୋଲି ହୋସବୋଲେ କହିଛନ୍ତି।  

ଏନେଇ ସଂଘ ପକ୍ଷରୁ ଏକ ବିବୃତ୍ତି ଜାରି କରାଯାଇଛି। ଯେଉଁଥିରେ ବାଙ୍ଗଲାଦେଶର ହିନ୍ଦୁ, ମହିଳା ଓ ସମସ୍ତ ସଂଖ୍ୟାଲଘୁ ଗୋଷ୍ଠୀ ଉପରେ ଇସଲାମିୟ ଉଗ୍ରପନ୍ଥୀମାନେ କରୁଥିବା ଆକ୍ରମଣ, ହତ୍ୟା, ଲୁଟ ଓ ଅଗ୍ନିକାଣ୍ଡକୁ ନିନ୍ଦା କରାଯାଇଛି।

ସଂଖ୍ୟାଲଘୁ ଗୋଷ୍ଠୀ ଉପରେ ଆକ୍ରମଣ ହେଉଥିବା ନେଇ ହଜାର ହଜାର ସଂଖ୍ୟାରେ ହିନ୍ଦୁ ଗତ ଅଗଷ୍ଟ ମାସରେ ଢାକା ଓ ଚଟୋଗ୍ରାମରେ ରାଜରାସ୍ତାକୁ ଓହ୍ଲାଇ ବିରୋଧ ପ୍ରଦର୍ଶନ କରିଥିଲେ। ବାଙ୍ଗଲାଦେଶରେ ହେଉଥିବା ଏହି ଆକ୍ରମଣ ଉଭୟ ସ୍ଥାନୀୟ ଓ ଦେଶବିଦେଶରେ ଥିବା ହିନ୍ଦୁ ସମ୍ପ୍ରଦାୟ ପାଇଁ ଚିନ୍ତାର କାରଣ ପାଲଟିଛି। ଶେଖ ହସିନାଙ୍କ ସରକାର ପତ୍ତନ ପରେ ବାଙ୍ଗଲାଦେଶରେ ରହୁଥିବା ହିନ୍ଦୁମାନଙ୍କ ଉପରେ ହେଉଥିବା ଆକ୍ରମଣର ପରିମାଣ ବହୁଳମାତ୍ରାରେ ବଢ଼ିଛି। ବିଭିନ୍ନ ମୌଳବାଦୀ ଗୋଷ୍ଠୀ ଦ୍ୱାରା ହିନ୍ଦୁ ମନ୍ଦିର ଭଙ୍ଗାରୁଜା, ହିନ୍ଦୁ ବ୍ୟକ୍ତିଙ୍କ ଉପରେ ଆକ୍ରମଣ ଓ ସେମାନଙ୍କ ଘର ଏବଂ ସମ୍ପତିକୁ ନଷ୍ଟ କରିବା ଭଳି ବିଭିନ୍ନ ଅମାନୁଷିକ କାମ କରାଯାଉଛି। 

ଆରଏସଏସ ଓ ବିଶ୍ୱ ହିନ୍ଦୁ ପରିଷଦ ବାଙ୍ଗଲାଦେଶରେ ସଂଖ୍ୟାଲଘୁ ଗୋଷ୍ଠୀ ଉପରେ ହେଉଥିବା ଆକ୍ରମଣ ପାଇଁ ଦୁଇଦିନ ଯାଏ ଦେଶବ୍ୟାପୀ ବିରୋଧ ପ୍ରଦର୍ଶନ ନିମନ୍ତେ ଡାକରା ଦେଇଛି। ଆସନ୍ତା ଶୁକ୍ରବାରଠୁ ଏହି ଆନ୍ଦୋଳନ ଆରମ୍ଭ ହେବ।