ନୂଆଦିଲ୍ଲୀ,୨୬/୦୫: ଋଷ-ୟୁକ୍ରେନ୍ ଯୁଦ୍ଧକୁ ୩ ବର୍ଷରୁ ଅଧିକ ଦିନ ବିତିଲାଣି । ତଥାପି ଶାନ୍ତି ଫେରୁନି । ବନ୍ଧୁକ ଗୁଳିଗୋଳା ବର୍ଷଣ ଥମୁନାହିଁ । ଦୁଇଦେଶ ମଧ୍ୟରେ ଯୁଦ୍ଧ ଅନେକ ନୀରିହ ଜୀବନ ନେଲାଣି । ଛାରଖାର ହେଲାଣି ସମ୍ପତ୍ତି । ବାସହରା ହେଲେଣି ଲୋକେ । ଯୁଦ୍ଧ ବନ୍ଦ କରିବାକୁ ଅରାଜି ଋଷ । ପୁଣି ୟୁକ୍ରେନ୍ ଉପରେ ଋଷ ବଡ଼ ଏୟାରଷ୍ଟ୍ରାଇକ୍ କରିଛି । ରବିବାର ବିଳମ୍ବିତ ରାତିରେ ୟୁକ୍ରେନ୍ ଉପରେ ୩୬୭ଟି ମିସାଇଲ ମାଡ଼ କରିଛି । ଏଥିରେ ୩ ଶିଶୁଙ୍କ ସମେତ ୧୩ ଜଣଙ୍କର ମୃତ୍ୟୁ ହୋଇଛି । ଏହାକୁ ନେଇ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉପରେ ବର୍ଷିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।
ରବିବାର ବିଳମ୍ବିତ ରାତିରେ ୟୁକ୍ରେନ୍ ବିରୋଧରେ ଋଷିଆର ସବୁଠୁ ବଡ଼ ଏୟାରଷ୍ଟ୍ରାଇକ୍ ହୋଇଛି । ୩୬୭ଟି ଡ୍ରୋନ୍ ଓ ମିସାଇଲ୍ ମାଡ଼ କରିଛି ଋଷିଆ । ୟୁକ୍ରେନ୍ର ଝିଟୋମିର୍ ସହର ଉପରକୁ ଘନ ଘନ ମିଜାଇଲ ମାଡ଼ କରିଛି । ଏଥିରେ ୩ ଶିଶୁଙ୍କ ସମେତ ୧୩ ଜଣଙ୍କର ମୃତ୍ୟୁ ହୋଇଛି । ୧୨ରୁ ଅଧିକ ଆହତ ହୋଇଛନ୍ତି । ୟୁକ୍ରେନ୍ର ୧୧୦ଟି ଡ୍ରୋନ୍କୁ ମାରି ଖସାଇ ଦେଇଥିବା କହିଛି ଋଷିଆ । ଗୋଟିଏ ପଟେ ଯୁଦ୍ଧ ବିରାମ ନେଇ ଆଲୋଚନା ହେଉଥିବାବେଳେ ୟୁକ୍ରେନ୍ ଉପରେ ଋଷର ବାରମ୍ବାର ଆକ୍ରମଣକୁ କଡ଼ା ନିନ୍ଦା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଋଷିଆର ପତନ ଆରମ୍ଭ ବୋଲି କହିଛନ୍ତି ଟ୍ରମ୍ପ ।
ଅଧିକ ପଢ଼ନ୍ତୁ...ଗାଜା ଉପରେ ଇସ୍ରାଏଲର ଜୋରଦାର୍ ବିମାନ ଆକ୍ରମଣ,୨ ଶିଶୁଙ୍କ ସମେତ ୧୪ ଜଣଙ୍କର ମୃତ୍ୟୁ…
ଋଷକୁ ନିନ୍ଦା କରି ଡୋନାଲ୍ଡ ଟ୍ରମ୍ପ କହିଛନ୍ତି,'' ଏହା କଣ ଚାଲିଛି ? ପାଗଳ ହୋଇଯାଇଛନ୍ତି ପୁଟିନ୍ । ମୁଁ ଜାଣିପାରୁ ନାହିଁ ତାଙ୍କର କଣ ହେଉଛି । ମୁଁ ତାଙ୍କର ଏ କାର୍ଯ୍ୟକୁ ନେଇ ଖୁସି ନାହିଁ । ମୁଁ ତାଙ୍କୁ ବହୁତ ସମୟ ହେବ ଜାଣିଛି । ଆମ ସମ୍ପର୍କ ଭଲ । ଏବେ ସେ ବହୁତ ଚକ୍ରାନ୍ତ କରୁଛନ୍ତି । ଅନେକ ସହର ଉପରେ ଆକ୍ରମଣ କରିଛନ୍ତି । ମୋତେ ଏହା ପସନ୍ଦ ନୁହେଁ । ମୁଁ ଜାଣିପାରୁନାହିଁ ତାଙ୍କର କଣ ହେଉଛି । କିଛି ତ ଗଡ଼ବଡ଼ ଅଛି ।''
