ଭାରତକୁ ଋଷର ଧମକ: ‘FATFରେ ସହଯୋଗ ନ କଲେ ରଦ୍ଦ କରିବୁ ବ୍ୟବସାୟିକ ଓ ଅସ୍ତ୍ରଶସ୍ତ୍ର ଡିଲ୍’
ନୂଆଦିଲ୍ଲୀ ୨୪/ ୦୫: ୟୁକ୍ରେନ୍ ସହ ଯୁଦ୍ଧ ପରେ ବିଶ୍ବରେ ଏକ ଘରିକିଆ ହୋଇ ରହିଥିବା ଋଷକୁ ହାତ ଗଣତି କିଛି ଦେଶ ସହଯୋଗ କରିଆସୁଛନ୍ତି । ଯେଉଁଥିରେ ଭାରତ ସବା ଆଗରେ ରହିଛି । ବିଶ୍ବ ସମୁଦାୟ ସମେତ ଋଷ ସହ ସନ୍ତୁଳିତ ହୋଇ ବ୍ୟବସାୟିକ ତଥା ଅନ୍ୟାନ୍ୟ କାରବାର ଜାରି ରଖିଛି ଭାରତ । ଏହାରି ମଧ୍ୟରେ ଫାଇନାନ୍ସିଆଲ ଆକ୍ସନ୍ ଟାସ୍କ ଫୋର୍ସ (FATF)ରେ ସହଯୋଗ କରିବା ପାଇଁ ଭାରତ ଉପରେ ଋଷ ଚାପ ପକାଉଥିବା ଏକ ବ୍ଲୁମ୍ବର୍ଗ ରିପୋର୍ଟରେ ପ୍ରକାଶ ପାଇଛି ।
ବ୍ଲୁମବର୍ଗ ରିପୋର୍ଟ ଅନୁଯାୟୀ, ‘ଋଷ କହିଛି କି, ଯଦି ଭାରତ ଋଷିଆକୁ ଫାଇନାନ୍ସିଆଲ ଆକ୍ସନ୍ ଟାସ୍କ ଫୋର୍ସ (FATF)ର ବ୍ଲାକ୍ ଲିଷ୍ଟ କିମ୍ବା ଗ୍ରେ ଲିଷ୍ଟରେ ସାମିଲ ହେବାରୁ ରକ୍ଷା ନ କରେ ତେବେ ପୁଟିନ୍, ପ୍ରତିରକ୍ଷା ଓ ଉର୍ଜା ଡିଲ୍କୁ ରଦ୍ଦ କରିଦେବେ’। ଫାଇନାନ୍ସିଆଲ ଆକ୍ସନ୍ ଟାସ୍କ ଫୋର୍ସ ହେଉଛି ଏକ ଅନ୍ତର୍ଜାତୀୟ ସଂସ୍ଥା ଯିଏ କି, ବିଶ୍ବରେ ଆର୍ଥିକ ଅପରାଧ ରୋକିଥାଏ । ଯେଉଁ ଦେଶ ଗୁଡିକ FATFର ବ୍ଲାକ୍ କିମ୍ବା ଗ୍ରେ ଲିଷ୍ଟରେ ରୁହନ୍ତି ସେମାନଙ୍କ ଉପରେ ନଜର ରଖାଯାଇଥାଏ । କେବଳ ସେତିକି ନୁହେଁ ଅନ୍ତର୍ଜାତୀୟ ସ୍ତରରୁ ମିଳୁଥିବା ଆର୍ଥିକ ସହଯୋଗ ମଧ୍ୟ ବନ୍ଦ କରି ଦିଆଯାଇଥାଏ ।
ଋଷ ଉପରେ FATF କାର୍ଯ୍ୟାନୁଷ୍ଠାନ ନେବାକୁ ଯୋଜନା କରୁଥିବା ବେଳେ ଏଥିରୁ ରକ୍ଷା ପାଇବା ପାଇଁ ପ୍ରଚ୍ଛଦ ପଟରେ ରହି ବିଭିନ୍ନ ଦେଶ ଉପରେ ଚାପ ପକାଉଛି ଋଷ । ଯେଉଁଥିରେ ଭାରତ ମଧ୍ୟ ରହିଛି । ବ୍ଲୁମବର୍ଗ ରିପୋର୍ଟ ଅନୁଯାୟୀ, ଆସନ୍ତା ଜୁନ ମାସରେ ହିଁ ଋଷକୁ ବ୍ଲାକ୍ କିମ୍ବା ଗ୍ରେ ଲିଷ୍ଟରେ ସାମିଲ କରିପାରେ FATF । ତେଣୁ ଏଥିରୁ ରକ୍ଷା ପାଇବା ପାଇଁ ଭାରତକୁ ବ୍ୟବସାୟିକ କାରବାର ରଦ୍ଦ କରିଦେବାକୁ ଧମକ ଦେଉଛି ଋଷ ।
ସୂଚନା କି, ଗତ ଫେବୃଆରୀ ମାସରେ ଋଷର ସଦସ୍ୟତା ପଦକୁ ରଦ୍ଦ କରିଥିଲା FATF । ଆଉ ସଫେଇରେ ୟୁକ୍ରେନ୍ ସହ ଯୁଦ୍ଧ ବାବଦରେ ଦର୍ଶାଇଥିଲା ସଂସ୍ଥା । FATF କହିଥିଲା କି, ୟୁକ୍ରେନ ବିରୁଦ୍ଧରେ ଋଷ ଜାରି ରଖିଥିବା ଯୁଦ୍ଧ ଫାଇନାନ୍ସିଆଲ ଆକ୍ସନ୍ ଟାସ୍କ ଫୋର୍ସର ନିୟମ ଉଲ୍ଲଂଘନ କରୁଛି । କେବଳ ସେତିକି ନୁହେଁ, ଋଷ ପକ୍ଷରୁ ୟୁକ୍ରେନ ଉପରେ କରାଯାଉଥିବା ଆକ୍ରମଣ ଅନ୍ୟ ଦେଶମାନଙ୍କୁ ଉସକାଇବା ପାଇଁ ମଧ୍ୟ କରାଯାଉଛି । ତେଣୁ ସଦସ୍ୟତା ପଦ ରଦ୍ଦ କରାଯାଇଛି ।
ୟୁକ୍ରେନ ସହ ଯୁଦ୍ଧ କାରଣରୁ ଆମେରିକା ସମେତ ଅନେକ ପଶ୍ଚିମୀ ଦେଶ ଋଷ ବିରୁଦ୍ଧରେ ପ୍ରତିବନ୍ଧକ ଲାଗୁ କରିସାରିଛନ୍ତି । ତେଣୁ ଋଷିଆ ନିଜର ଅର୍ଥ ବ୍ୟବସ୍ଥାକୁ ରକ୍ଷା କରିବା ପାଇଁ ଭାରତ, ଚୀନ ଓ ତାଇଓ୍ବାନ ଭଳି ଦେଶ ସହ ସମ୍ପର୍କକୁ ସୁଦୃଢ କରୁଛି । ତେଣୁ ଯଦି ଫାଇନାନ୍ସିଆଲ ଆକ୍ସନ୍ ଟାସ୍କ ଫୋର୍ସ, ଋଷକୁ ବ୍ଲାକ୍ ଲିଷ୍ଟ କିମ୍ବା ଗ୍ରେ ଲିଷ୍ଟ କରିଦିଏ ତେବେ ଏହି ସବୁ ଦେଶଗୁଡିକ ଋଷ ସହ ବ୍ୟବସାୟିକ କାରବାର କରିବା କଷ୍ଟକର ହୋଇପଡିବ । ଯାହାର ସିଧାସଳଖ ପ୍ରଭାବ ଅର୍ଥ ବ୍ୟବସ୍ଥା ଉପରେ ପଡିବ ।
