ଭୁବନେଶ୍ଵର, ୧୩/୦୨ : ବିଧାନସଭାରେ ନବୀନଙ୍କ ତାଗିଦ୍ ପରେ ପ୍ରତିକ୍ରିୟା ରଖିଲେ ଚମ୍ପୁଆ ବିଧାୟକ ସନା ମହାକୁଡ଼। ସେ କହିଛନ୍ତି ଯେ, 'ବିଧାୟକ ଦଳ ବୈଠକକୁ କାହିଁକି ଆସିନଥିଲି ବୋଲି ମୋତେ ନବୀନ ପଚାରିଥିଲେ, ଅସୁସ୍ଥତା ଯୋଗୁଁ ଆସିନଥିବା ତାଙ୍କୁ ଜଣାଇଥିଲି। ସେ ହେଉଛନ୍ତି ଦଳର ମୁରବୀ। ତାଙ୍କର ପଚାରିବାର ଅଧିକାର ଅଛି। ବିଜେପି ଯିବା କଥା ମୋତେ କହି ନାହାଁନ୍ତି। ମୁଁ ବିଜେଡିରେ ଥିଲି, ଅଛି ଏବଂ ରହିବି। ମୁଁ ଦଳରୁ ଦୂରେଇ ଯାଇନାହିଁ।' ସେହିପରି ବିଜେପି ଯିବା ନେଇ ସନା କହିଛନ୍ତି ଯେ, 'ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ନିକଟକୁ ଯାଉଛୁ, ତାଙ୍କ ସହ ଆଲୋଚନା କରୁଛୁ। ସେ ସାରା ରାଜ୍ୟର ମୁଖ୍ୟମନ୍ତ୍ରୀ, କେବଳ ବିଜେପିର ମୁଖ୍ୟମନ୍ତ୍ରୀ ନୁହଁନ୍ତି। ମୁଁ ବିକାଶ ସହ ଅଛି।'
ଏହି ଖବରଟିକୁ ପଢନ୍ତୁ-ବିଜେପି ମୁହାଁ ସନା ! ତାଗିଦ୍ କଲେ ନବୀନ
ଉଲ୍ଲେଖଯୋଗ୍ୟ ଯେ, ଗୁରୁବାର ବିରୋଧୀ ଦଳ ନେତା ନବୀନ ପଟ୍ଟନାୟକ ବିଧାନସଭାରେ ପ୍ରବେଶ କରିବା ସମୟରେ ବିଜେଡି ବିଧାୟକମାନେ ତାଙ୍କୁ ଅଭିବାଦନ ଜଣାଇଥିଲେ। ଏହି ସମୟରେ ନବୀନ ଚମ୍ପୁଆ ବିଧାୟକ ସନାତନ ମହାକୁଡ଼ଙ୍କୁ ଦେଖି ଅଟକି ଯାଇଥିଲେ। ଗତକାଲି ବିଜେଡି ବିଧାୟକ ଦଳ ବୈଠକକୁ କାହିଁକି ଆସି ନଥିଲେ ବୋଲି ପ୍ରଶ୍ନ କରିଥିଲେ। ଉତ୍ତରରେ ଅସୁସ୍ଥତା ଯୋଗୁଁ ଆସିନଥିବା କହିଥିଲେ ସନା। ପ୍ରତ୍ୟୁତ୍ତରରେ ବିଜେପି ଆଡ଼କୁ ମୁହାଁଉଛ କି... ବୋଲି କହି ସନାଙ୍କୁ ତେରଛା ବାଣ ମାରିଥିଲେ ନବୀନ।
ନବୀନଙ୍କ ଏଭଳି ରୋକ୍ଠୋକ୍ କଥାକୁ ନେଇ ରାଜନୈତିକ ମାହୋଲ ସରଗରମ ହୋଇଛି। ଅଧିବେଶନ ଆରମ୍ଭରୁ ନବୀନ ଆକ୍ସନ ମୁଡ୍ରେ ଥିବା ଦେଖିବାକୁ ମିଳିଛି।
