ଭୁବନେଶ୍ୱର,୨୬/୧୨: ୭୮ତମ ସିନିୟର ପୁରୁଷ ଜାତୀୟ ଫୁଟବଲ ଚାମ୍ପିଅନସିପ୍ ‘ସନ୍ତୋଷ ଟ୍ରଫି’ ଫାଇନାଲ ରାଉଣ୍ଡରେ ଓଡ଼ିଶା କ୍ୱାର୍ଟର ଫାଇନାଲରେ ଆସନ୍ତାକାଲି ଶକ୍ତିଶାଳୀ ପଶ୍ଚିମବଙ୍ଗକୁ ଭେଟିବ । ମେଘାଳୟ ବିପକ୍ଷରେ ଦଳ ମ୍ୟାଚ୍ ଡ୍ର’ ରଖିବା ପରେ କ୍ୱାର୍ଟରରେ ପ୍ରବେଶ କରିଥିଲା ।
ଗ୍ରୁପ୍ ବି’ରେ ୧୩ ପଏଣ୍ଟ ସହ କେରଳ ପ୍ରଥମ, ମେଘାଳୟ (୮ ପଏଣ୍ଟ) ଦ୍ୱିତୀୟ, ଦିଲ୍ଲୀ (୭ ପଏଣ୍ଟ) ତୃତୀୟ ଏବଂ ଓଡ଼ିଶା (୫ ପଏଣ୍ଟ) ଚତୁର୍ଥ ସ୍ଥାନରେ ରହି କ୍ୱାର୍ଟର ଫାଇନାଲକୁ ଉନ୍ନୀତ ହୋଇଥିଲେ । ପଶ୍ଚିମବଙ୍ଗ କିନ୍ତୁ ଗ୍ରୁପ୍ ଏ’ରେ ଟପ୍ପର ହୋଇଥିଲା । ୪ଟି ମ୍ୟାଚ୍ ଜିତିଥିବାବେଳେ ଗୋଟିଏ ମ୍ୟାଚ୍ ଡ୍ର’ ରଖିଥିଲା । ସନ୍ତୋଷ ଟ୍ରଫିରେ ପଶ୍ଚିମବଙ୍ଗ ସର୍ବାଧିକ ୩୨ ଥର ଚାମ୍ପିଅନ ହୋଇଛି । ହେଲେ ଓଡ଼ିଶା ଥରୁଟିଏ ବି ଫାଇନାଲ ଖେଳି ନାହିଁ । ତଥାପି ଦଳ ତା’ର ଶ୍ରେଷ୍ଠ ପ୍ରଦର୍ଶନ ଦେଇ ସେମି ଫାଇନାଲରେ ପ୍ରବେଶ କରିବାକୁ ଲକ୍ଷ୍ୟ ରଖିଛି ।
