ପୁରୀ/ଭୁବନେଶ୍ୱର,୦୧/୦୮: ଶରଧାବାଲି ଦଳାଚକଟା ସଂପର୍କରେ ତଦନ୍ତ ରିପୋର୍ଟ ସରକାରଙ୍କୁ ମିଳିଛି । ଏ ଘଟଣାର ତଦନ୍ତ କରିଥିବା ଉନ୍ନୟନ କମିଶନର ଅନୁ ଗର୍ଗ ଗୁରୁବାର ରିପୋର୍ଟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପ୍ରଦାନ କରିଛନ୍ତି । ରିପୋର୍ଟକୁ ମୁଖ୍ୟମନ୍ତ୍ରୀ ତର୍ଜମା କରୁଛନ୍ତି । ପରବର୍ତ୍ତୀ ପଦକ୍ଷେପ କ’ଣ ହେବ ମୁଖ୍ୟମନ୍ତ୍ରୀ ତାର ନିଷ୍ପତ୍ତି ନେବେ । ତେଣୁ ଆମକୁ ଅପେକ୍ଷା କରିବାକୁ ପଡିବ । ଏନେଇ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି।
ଶ୍ରୀଗୁଣ୍ଡିଚା ପରଦିନ (୨୯ ଜୁନ୍) ଶରଧାବାଲିରେ ରଥାରୁଢ଼ ଶ୍ରୀଜିଉଙ୍କୁ ଦର୍ଶନ କରିବାକୁ ଭକ୍ତଙ୍କ ଅସମ୍ଭବ ଭିଡ଼ ହେବାରୁ ପୁଲିସ ଏହାକୁ ନିୟନ୍ତ୍ରଣ କରିପାରିନଥିଲା । ଦଳାଚକଟା ପରିସ୍ଥିତି ଉପୁଜି ୩ ଜଣଙ୍କର ମୃତ୍ୟୁ ହେବା ସହ ୧୨ରୁ ଅଧିକ ଶ୍ରଦ୍ଧାଳୁ ଆହତ ହୋଇଥିଲେ । ଘଟଣାର ଗମ୍ଭୀରତାକୁ ଦେଖି ଏହାର ତଦନ୍ତ ପାଇଁ ଉନ୍ନୟନ କମିଶନରଙ୍କୁ ସରକାର ଦାୟିତ୍ୱ ଦେଇଥିଲେ । ଉନ୍ନୟନ କମିଶନର ଏ ଘଟଣାରେ ଶ୍ରୀମନ୍ଦିର ପ୍ରଶାସନରେ କାର୍ଯ୍ୟରତ ଅଧିକାରୀ ଓ ପୁଲିସ ଅଧିକାରୀଙ୍କ ବୟାନ ରେକର୍ଡ କରିଥିଲେ । ତଦନ୍ତ କମିଟି ଭୁବନେଶ୍ୱରରେ ଗୋଟିଏ ଓ ପୁରୀ ସର୍କିଟ ହାଉସ୍ରେ ୩ଟି ବୈଠକ କରିଥିଲେ । ଘଟଣା ସମୟର ପ୍ରତ୍ୟକ୍ଷଦର୍ଶୀ ବା ଏବାବଦରେ ଘଟଣାସ୍ଥଳରେ ଥିବା ସମସ୍ତ ବର୍ଗର ବ୍ୟକ୍ତି ବିଶେଷଙ୍କ ସମେତ ଡ୍ୟୁଟିରେ ମୁତୟନ ବିଭିନ୍ନ ବିଭାଗର ଅଧିକାରୀଙ୍କ ଠାରୁ ତଦନ୍ତକାରୀ ଅଧିକାରୀ ବୟାନ ନେଇଛନ୍ତି । କେଉଁଠି ଭୁଲ ରହିଲା ଓ କିଏ ପ୍ରକୃତରେ ଭୁଲ କରିବାରୁ ଏତେବଡ଼ ଅଘଟଣ ଘଟିଲା ତାହା ଜାଣିବାକୁ ତଦନ୍ତ ବେଳେ କମିଟି ଉଦ୍ୟମ କରିଥିଲେ । ପ୍ରାୟ ୬୭ ଜଣଙ୍କର ସାକ୍ଷ୍ୟପ୍ରମାଣ ଗ୍ରହଣ କରିଥିଲେ ଉନ୍ନୟନ କମିଶନର ।
ଏହି ମାମଲାରେ ଅତିରିକ୍ତ ମୁଖ୍ୟ ସଚିବ ତଥା ଉନ୍ନୟନ କମିଶନର ଶ୍ରୀମତୀ ଗର୍ଗଙ୍କୁ ତଦନ୍ତରେ ସହଯୋଗ କରିବାକୁ ଅନ୍ୟ ୪ ଅଧିକାରୀଙ୍କୁ ସରକାର ନିଯୁକ୍ତ କରିଥିଲେ । ମାସକରେ ରିପୋର୍ଟ ଦେବାକୁ ସରକାରଙ୍କ ନିର୍ଦ୍ଦେଶ ଥିଲା ବେଳେ ଅଘଟଣ ପରଦିନଠାରୁ ତଦନ୍ତ ପ୍ରକ୍ରିୟା ଆରମ୍ଭ ହୋଇଥିଲା । ଏହି ଘଟଣାରେ ତତ୍କାଳୀନ ଜିଲ୍ଲାପାଳ ଓ ଏସ୍ପିଙ୍କୁ ବଦଳି କରାଯାଇଥିଲା । ସେହିପରି ଅନ୍ୟ ଦୁଇ ପୁଲିସ ଉଚ୍ଚ ଅଧିକାରୀଙ୍କୁ ଚାକିରିରୁ ନିଲମ୍ବିତ କରାଯାଇଥିଲା । ମୃତକଙ୍କ ପରିବାରକୁ ମୁଖ୍ୟମନ୍ତ୍ରୀଙ୍କ ପକ୍ଷରୁ ୨୦ ଲକ୍ଷ ଲେଖାଏଁ ସହାୟତା ପ୍ରଦାନ କରାଯାଇଥିଲା । ଧାର୍ଯ୍ୟ ସମୟରେ ତଦନ୍ତ ରିପୋର୍ଟ ଦାଖଲ ହୋଇଥିବାବେଳେ ରିପୋର୍ଟରେ କ’ଣ ରହିଛି ତାହା ଜଣାପଡିନାହିଁ ।
