ନୂଆଦିଲ୍ଲୀ,୭।୬: ଜମ୍ମୁ କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଳ ମଲିକ୍ ଅସୁସ୍ଥ। ଏବେ ହସ୍ପିଟାଲରେ ତାଙ୍କର ଚିକିତ୍ସା ଚାଲିଛି। ତାଙ୍କ ସ୍ବାସ୍ଥ୍ୟ ଖରାପ ହେବାପରେ ତାଙ୍କୁ ଆଇସିୟୁକୁ ସିଫ୍ଟ କରାଯାଇଛି। ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ରେ ସେ ଏକ ଆବେଗଭରା ପୋଷ୍ଟ ସେୟାର କରିଛନ୍ତି। ସେ କହିଛନ୍ତି, ସରକାର ତାଙ୍କୁ ଯେ କୌଣସି ପ୍ରକାରରେ ଫଶାଇବାକୁ ଚେଷ୍ଟା କରୁଛନ୍ତି। ମୁଁ ରହେ କିମ୍ବା ନରହେ, କିନ୍ତୁ ଗୋଟିଏ ସତ କଥା କହିବାକୁ ଚାହିଁବି । ସେ କହିଛନ୍ତି, ଯଦି ମୋ ପାଖରେ ଆଜି-ଧନ ସମ୍ପତ୍ତି ରହିଥାନ୍ତା ତେବେ ପ୍ରାଇଭେଟ୍ ହସ୍ପିଟାଲରେ ଚିକିତ୍ସା କରିଥାନ୍ତି।
ସତ୍ୟପାଲ ମଲିକ୍ ନିଜ ପୋଷ୍ଟରେ ଲେଖିଛନ୍ତି, ମୁଁ ଗତ ପ୍ରାୟ ଏକ ମାସ ହେବ ହସ୍ପିଟାଲରେ ଭର୍ତ୍ତି ହୋଇଛି। କିଡନୀ ଜନିତ ସମସ୍ୟାରେ ପୀଡିତ। ପରଦିନ ସକାଳେ ଠିକ୍ ଥିଲି, କିନ୍ତୁ ଆଜି ପୁଣିଥରେ ଆଇସିୟୁରେ ସିଫ୍ଟ ହେବାକୁ ପଡିଛି। ମୋର ସ୍ଥିତି ଗମ୍ଭୀର ହେବାରେ ଲାଗିଛି। ମୁଁ ରୁହେଁ କିମ୍ବା ନରୁହେ ଦେଶବାସୀଙ୍କୁ ସତ କହିବାକୁ ଚାହିଁବି। ରାଜ୍ୟପାଳ ପଦବୀରେ ଥିବା ବେଳେ ମୋତେ ୧୫୦ କୋଟି ଲେଖାଏଁ ଲାଞ୍ଚ ମିଳିଛି। କିନ୍ତୁ ମୁଁ ନିଷ୍ଠାର ସହ କାମ କରୁଥିଲି। ଯେତେବେଳେ ରାଜ୍ୟପାଳ ଥିଲି କୃଷକ ଆନ୍ଦୋଳନ ଚାଲିଥିଲା। ରାଜନୈତିକ ଲୋକ ନରଖି କୃଷକଙ୍କ ଦାବି ଉଠାଇଥିଲି। ମହିଳା ରେସଲରଙ୍କ ଆନ୍ଦୋଳନରେ ଜନ୍ତର ମନ୍ତରରୁ ନେଇ ଇଣ୍ଡିଆ ଗେଟ୍ ପର୍ଯ୍ୟନ୍ତ ସବୁଠି ମୁଁ ଲଢେଇ କରିଛି।
ପୁଲଓ୍ବାମା ହମଲାକୁ ନେଇ ସତ୍ୟପାଲ କହିଛନ୍ତି, ଆକ୍ରମଣରେ ଶହୀଦ ବୀର ଯବାନଙ୍କ ମାମଲାକୁ ଉଠାଇଥିଲି। ଯାହାର ଆଜି ପର୍ଯ୍ୟନ୍ତ ଏହି ସରକାର କୌଣସି ଯାଞ୍ଚ କରିପାରିଲେନି। ସରକାର ମୋତେ ସିବିଆଇର ଭୟ ଦେଖାଇ ମିଛ ଚାର୍ଜସିଟ୍ରେ ଫଶାଇବାର ବାହାନା ଖୋଜୁଛନ୍ତି।
