ନୂଆଦିଲ୍ଲୀ,୧୬/୦୬: ଦେଶକୁ ଦୋହାଲାଇ ଦେଇଥିବା ଭୟଙ୍କର ଅହମ୍ମଦାବାଦ ବିମାନ ଦୁର୍ଘଟଣାର ଦ୍ୱିତୀୟ ବ୍ଲାକବକ୍ସ ମିଳିଛି । ଦୁର୍ଘଟଣା ସ୍ଥଳରୁ ଦ୍ୱିତୀୟ ବ୍ଲାକବକ୍ସ ଠାବ କରିଛି ତଦନ୍ତକାରୀ ଟିମ୍ । ଏହା ସହିତ କକପିଟ୍ ଭଏସ୍ ରେକର୍ଡର ମିଳିଛି । ଏହାଦ୍ୱାରା ଦୁର୍ଘଟଣାର ପ୍ରକୃତ କାରଣ ଜଣାପଡିବ ବୋଲି କହୁଯାଉଛି । ବ୍ଲାକବକ୍ସ ମିଳିଥିବା ନେଇ ତଦନ୍ତକାରୀ ଅଧିକାରୀ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପିକେ ମିଶ୍ରଙ୍କୁ ଅବଗତ କରାଇଛନ୍ତି ।
ଗତକାଲି (ରବିବାର) ପିକେ ମିଶ୍ର ବିମାନ ଦୁର୍ଘଟଣାସ୍ଥଳ ପରିଦର୍ଶନ କରିଥିଲେ । ଏହା ସହିତ ହସ୍ପିଟାଲରେ ଆହତଙ୍କୁ ଭେଟିଥିଲେ । ପୂର୍ବରୁ ବିମାନ ଦୁର୍ଘଟଣାର ତଦନ୍ତକାରୀ ଟିମ୍ ବିମାନ ଡାଟା ରେକର୍ଡର ଜବତ କରିଥିଲା । ଏବେ କକପିଟ୍ ଭଏସ୍ ରେକର୍ଡର ଠାବ ହୋଇଛି । ଉଭୟ ବ୍ଲାକ ବକ୍ସ ଯଥା ଏଫଡିଆର ଏବଂ ସିଭିଆରକୁ ଠାବ କରିବା ସହିତ ସୁରକ୍ଷିତ ରଖାଯାଇଛି ।
ଜୁନ୍ ୧୨ରେ ଅହମ୍ମଦାବାଦ ବିମାନ ବନ୍ଦରରୁ ଟେକ୍ ଅଫ୍ ହୋଇଥିବା ବୋଇଂ ଏଆଇ-୧୭୧ ପ୍ଲେନ୍ କ୍ରାସ୍ ହୋଇଥିଲା । ଉଡ଼ାଣ ଭରିବାର ମାତ୍ର ୫ ମିନିଟରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା । ବିଜେ ମେଡିକାଲ କଲେଜ ହସ୍ପିଟାଲରେ ପିଟି ହୋଇଥିଲା ବିମାନ । ଏଥିରେ ୧୨ କ୍ରୁ ମେମ୍ବରଙ୍କୁ ମିଶାଇ ୨୪୨ ଜଣ ଯାତ୍ରୀ ଥିଲେ । କେବଳ ଜଣଙ୍କୁ ଛାଡି ସମସ୍ତଙ୍କର ମୃତ୍ୟୁ ହୋଇଥିଲା । ଏହା ସହିତ ମେଡିକାଲ ଛାତ୍ରଙ୍କର ମୃତ୍ୟୁ ହୋଇଥିଲା । ବିମାନ ଦୁର୍ଘଟଣାରେ ମୋଟ ମୃତ୍ୟୁସଂଖ୍ୟା ୨୭୦କୁ ବୃଦ୍ଧି ହୋଇଛି । ମୃତଦେହ ଚିହ୍ନଟ ପାଇଁ ଡିଏନ୍ଏ ଟେଷ୍ଟ ଚାଲିଛି । ୪୭ ମୃତଦେହର ଡିଏନ୍ଏ ମେଳ ଖାଇଛି । ୨୪ ଶବ ପରିବାରଙ୍କୁ ହସ୍ତାନ୍ତର କରାଯାଇଛି ।
ଏତେ ବଡ଼ ଦୁର୍ଘଟଣା କେମିତି ହେଲା ? କେଉଁଠି ତ୍ରୁଟି ରହିଲା ? ପ୍ରକୃତ କାରଣ କଣ ଜାଣିବାକୁ ଚେଷ୍ଟା ଜାରି ରହିଛି । ତଦନ୍ତକାରୀ ଟିମ୍ ଓ ଆମେରିକା ନ୍ୟାସନାଲ ଟ୍ରାନ୍ସପୋଟେସନ୍ ସେଫ୍ଟି ବୋର୍ଡ ତଦନ୍ତ ଚଳାଇଛନ୍ତି ।
