ମୁମ୍ବାଇ,୧୦/୦୫: ଭାରତକୁ ଟି-ଟ୍ୱେଣ୍ଟି ବିଶ୍ୱକପ୍ ଓ ଚାମ୍ପିଅନ୍ସ ଟ୍ରଫି ଜିତାଇଥିବା ରୋହିତ ଶର୍ମା ସମ୍ପ୍ରତି ଟେଷ୍ଟ କ୍ରିକେଟ୍ରୁ ଅବସର ଘୋଷଣା କରିଛନ୍ତି । ତାଙ୍କ ସ୍ଥାନରେ ବିସିସିଆଇ ସିନିୟର ଚୟନ କମିଟି ଖୁବ୍ ଶୀଘ୍ର ନୂଆ ଅଧିନାୟକ ନିଯୁକ୍ତ କରିବ । କିଛି ସିନିୟର ଖେଳାଳିଙ୍କ ସହ ଯୁବ ଖେଳାଳି ମଧ୍ୟ ଅଧିନାୟକ ଦୌଡ଼ରେ ରହିଛନ୍ତି । ଖାଲି ସେତିକି ନୁହେଁ ଟେଷ୍ଟ ଦଳରେ ରୋହିତ ଖାଲି କରିଥିବା ସ୍ଥାନ ପାଇଁ ମଧ୍ୟ ଅନେକ ଖେଳାଳି ଦାବିଦାର ରୂପେ ଉଭା ହୋଇଛନ୍ତି । ଆସନ୍ତା ମାସରେ ଭାରତୀୟ ଦଳ ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବା ପାଇଁ ଇଂଲଣ୍ଡ ଯାତ୍ରା କରିବ । ଜୁନ୍ ୨୦ରୁ ଟେଷ୍ଟ ସିରିଜ ଆରମ୍ଭ ହେବ ।
ଧ୍ରୁବ ଜୁରେଲ
ଜଣେ ଦକ୍ଷ ୱିକେଟ୍ କିପର ବ୍ୟାଟର ଭାବେ ଜୁରେଲ ଟେଷ୍ଟ ଦଳର ନିୟମିତ ସଦସ୍ୟ ହେବାର କ୍ଷମତା ରଖିଛନ୍ତି । ସେ ଇତି ମଧ୍ୟରେ ୪ଟି ଟେଷ୍ଟ ଖେଳିସାରିଛନ୍ତି ଓ ୪୦.୪୦ ହାରରେ ୨୦୨ ରନ ସଂଗ୍ରହ କରିଛନ୍ତି । ତଥାପି ସେ ଦଳର ତୃତୀୟ ୱିକେଟ୍ କିପର । କାରଣ ଅନ୍ୟ ୱିକେଟ୍ କିପର ଭାବେ ରିଷଭ ପନ୍ତ ଓ କେଏଲ ରାହୁଲ ଦଳର ସ୍ଥାୟୀ ସଦସ୍ୟ ରହିବେ । ବର୍ଡର-ଗାଭାସ୍କର ଟ୍ରଫିର ପଞ୍ଚମ ଟେଷ୍ଟରେ ରୋହିତ ଏକାଦଶରୁ ବାଦ ପଡ଼ିଥିଲେ ଓ ତାଙ୍କ ସ୍ଥାନରେ ଜୁରେଲଙ୍କୁ ସ୍ଥାନ ମିଳିଥିଲା । ବର୍ତ୍ତମାନ ରୋହିତ ଅବସର ନେଇଛନ୍ତି । ତେଣୁ ଜୁରେଲ ଏହି ସ୍ଥାନ ପାଇଁ ପ୍ରବଳ ଦାବିଦାର ରହିବା ସ୍ୱାଭାବିକ । ତାଙ୍କୁ ଦ୍ୱିତୀୟ ୱିକେଟ୍ କିପର ଭାବେ ସ୍ଥାନ ମିଳିଲେ ରାହୁଲ କେବଳ ବ୍ୟାଟିଂ ଉପରେ ଧ୍ୟାନ ଦେଇପାରିବେ ।
କରୁଣ ନାଏର
ବର୍ତ୍ତମାନ ଭାରତୀୟ ଘରୋଇ କ୍ରିକେଟ୍ରେ ସବୁଠୁ ଚର୍ଚ୍ଚିତ ଖେଳାଳି ହେଉଛନ୍ତି କରୁଣ ନାଏର । ୩୩ବର୍ଷିୟ ନାଏରଙ୍କ ନିକଟରେ ଢ଼େର ଅଭିଜ୍ଞତା ରହିଛି । ବୀରେନ୍ଦ୍ର ସେହୱାଗଙ୍କ ପରେ ଦ୍ୱିତୀୟ ଭାରତୀୟ ଭାବେ ସେ ଟେଷ୍ଟ କ୍ରିକେଟ୍ରେ ତ୍ରିଶତକ ଅର୍ଜନ କରିଛନ୍ତି । ୨୦୧୭ରେ ସେ ଇଂଲଣ୍ଡ ବିପକ୍ଷରେ ଏହି ଐତିହାସିକ ଇନିଂସ ଖେଳିଥିଲେ ।
ଗତ ରଣଜୀ ଟ୍ରଫିରେ ସେ ମୋଟ୍ ୮୬୩ ରନ ସଂଗ୍ରହ କରିବା ସହ ବିଦର୍ଭକୁ ଚାମ୍ପିଅନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । ଏଥିରେ ୪ଟି ଶତକ ରହିଥିଲା । ରଣଜୀ ପ୍ରଦର୍ଶନ ଜରିଆରେ ସେ ଟେଷ୍ଟ ଦଳକୁ ଫେରିବା ପାଇଁ ପ୍ରସ୍ତୁତ ଥିବା ପ୍ରମାଣ କରିଛନ୍ତି । ତାଙ୍କ ନିକଟରେ ଉଭୟ ଅଭିଜ୍ଞତା ଓ ଟେକନିକ ରହିଛି । ମଧ୍ୟକ୍ରମରେ ଜଣେ ଦକ୍ଷ ବ୍ୟାଟରଙ୍କ ଆବଶ୍ୟକତା ମଧ୍ୟ ରହିଛି । ତେଣୁ ରୋହିତଙ୍କ ସ୍ଥାନ ନେବା ପାଇଁ ନାଏର ଉପଯୁକ୍ତ ସଦସ୍ୟ । ସେ ଗତ ୨ଟି ସିଜନ ଧରି କାଉଣ୍ଟି କ୍ରିକେଟ୍ ମଧ୍ୟ ଖେଳିଛନ୍ତି ଓ ୫୬.୭୧ ହାରରେ ୭୩୬ ରନ ସଂଗ୍ରହ କରିଛନ୍ତି । ତେଣୁ ଇଂଲଣ୍ଡ ଗସ୍ତରେ ତାଙ୍କୁ ସୁଯୋଗ ମିଳିବାର ଯଥେଷ୍ଟ ସମ୍ଭାବନା ରହିଛି ।
ସାଇ ସୁଦର୍ଶନ
୨୩ବର୍ଷିୟ ସାଇ ସୁଦର୍ଶନ ରୋହିତଙ୍କ ସ୍ଥାନ ନେବା ପାଇଁ ପ୍ରମୁଖ ଦାବିଦାର । ରୋହିତ ଓପନର ଭାବେ ଖେଳୁଥିଲେ । ସୁଦର୍ଶନ ମଧ୍ୟ ଜଣେ ପ୍ରତିଭାବାନ ଓପନିଂ ବ୍ୟାଟର । ଗତ ଦୁଇ ବର୍ଷ ହେଲା ସୁଦର୍ଶନଙ୍କୁ ଏ’ ଦଳରେ ନିୟମିତ ଭାବେ ସୁଯୋଗ ଦିଆଯାଉଛି । ଓପନ କରିବା ସହ ମଧ୍ୟ କ୍ରମରେ ଖେଳିବା ଭଳି ଦକ୍ଷତା ଓ ଟେକନିକ୍ ତାଙ୍କ ନିକଟରେ ରହିଛି । ସେ କାଉଣ୍ଟି କ୍ରିକେଟ୍ରେ ମଧ୍ୟ ଉନ୍ନତ ପ୍ରଦର୍ଶନ କରିଛନ୍ତି ।
ରଜତ ପାତିଦାର
ଆଇପିଏଲ୍ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳର ଅଧିନାୟକ ଥିବା ରଜତ ପାତିଦାର ଟେଷ୍ଟ ଦଳର ଅନ୍ୟତମ ଦାବିଦାର ରହିଛନ୍ତି । ଗତ ଇଂଲଣ୍ଡ ବିପକ୍ଷ ଘରୋଇ ଟେଷ୍ଟ ସିରିଜରେ ପାତିଦାରଙ୍କୁ ୩ଟି ମ୍ୟାଚ୍ ଖେଳିବାକୁ ସୁଯୋଗ ମିଳିଥିଲା । ମାତ୍ର ସେ ନିରାଶ କରିଥିଲେ । ଏଥର ରଣଜୀ ଟ୍ରଫିରେ ତାଙ୍କ ପ୍ରଦର୍ଶନ ବେଶ୍ ଦମ୍ଦାର ରହିଥିଲା । ସେ ୩୯୫ରନ ସଂଗ୍ରହ କରିଥିଲେ । ମଧ୍ୟ କ୍ରମରେ ବ୍ୟାଟିଂ କରିବାର କ୍ଷମତା ପାତିଦାରଙ୍କ ନିକଟରେ ରହିଛି । ରୋହିତଙ୍କ ଅନୁପସ୍ଥିତିରେ ମୁଖ୍ୟ କୋଚ୍ ଗୌତମ ଗମ୍ଭୀର ଅଭିଜ୍ଞ ରାହୁଲଙ୍କୁ ଓପନର ଭାବେ ଖେଳାଇବା ଏକ ପ୍ରକାର ନିଶ୍ଚିତ । ତେଣୁ ବ୍ୟାଟିଂ କ୍ରମର ୫ କିମ୍ବା ୬ନଂ ସ୍ଥାନରେ ଜଣେ ଦକ୍ଷ ବ୍ୟାଟରଙ୍କୁ ଖେଳାଇବାକୁ ଯୋଜନା କରାଯାଉଛି । ପାତିଦାର ଏହି ସ୍ଥାନ ପାଇଁ ଉପଯୁକ୍ତ ।
