ନୂଆଦିଲ୍ଲୀ,୦୩/୧୨: ଘରର ଚାରି କାନ୍ଥ ଭିତରୁ ବାହାରକୁ ଆସୁଛନ୍ତି ମହିଳା । ଅର୍ଥନୈତିକ କ୍ଷେତ୍ରରେ ଦେଖିବାକୁ ମିଳୁଛି ସେମାନଙ୍କର ଭାଗିଦାରୀତା । ରୋଜଗାର କରିବା ସହିତ ସେମାନଙ୍କର ବଢିଛି ସଞ୍ଚୟ ମାନସିକତା । ମହିଳାମାନେ ନିବେଶ କରିବାରେ ଆଉ ପଛୁଆ ନାହାନ୍ତି । ଆକ୍ସିସ୍ ମ୍ୟୁଚୁଆଲ୍ ଫଣ୍ଡର ପ୍ରତି ୪ ଜଣରେ ରହିଛନ୍ତି ଜଣେ ମହିଳା ନିବେଶକ । ୧୦.୫ କୋଟି ନିବେଶକଙ୍କ ମଧ୍ୟରେ ୨.୫ କୋଟି ମହିଳା । ଏହି ତାଲିକା ଗୋଆରେ ରହିଛନ୍ତି ସବୁଠୁ ଅଧିକ ମହିଳା ନିବେଶକ। ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜର ତଥ୍ୟର ଏକ ଅଧ୍ୟୟନରୁ ଏହି ତଥ୍ୟ ଜଣାପଡ଼ିଛି ।
ଏନ୍ଏସ୍ଇର ତଥ୍ୟ ଅନୁସାରେ, ଅକ୍ଟୋବର ସୁଦ୍ଧା ଦେଶର ସେୟାର ବଜାରରେ ମୋଟ ୧୦.୫୫ କୋଟି ଥିଲେ ବ୍ୟକ୍ତିଗତ ନିବେଶକ। ଏଥିମଧ୍ୟରୁ ମହିଳାଙ୍କ ଅଂଶ ୨.୫୨ କୋଟି ବା ୨୩.୯% ରହିଛି । ସେହିପରି ମହାରାଷ୍ଟ୍ର, ଗୁଜରାଟ, ତାମିଲନାଡୁ ଏବଂ କେରଳ ଭଳି ରାଜ୍ୟଗୁଡ଼ିକରେ ମୋଟ ସେୟାର ନିବେଶକଙ୍କ ମଧ୍ୟରେ ମହିଳାଙ୍କ ଭାଗ ୨୭%ରୁ ରହିଛି ଅଧିକ । ସେହିପରି ଏ ବର୍ଷ ଦିଲ୍ଲୀରେ ମହିଳା ନିବେଶକଙ୍କ ଭାଗ ୨୯.୮% ପର୍ଯ୍ୟନ୍ତ ପହଞ୍ଚିଯାଇଛି । ଗୋଆରେ ମୋଟ ନିବେଶକଙ୍କ ମଧ୍ୟରେ ମହିଳାଙ୍କ ଅଂଶ ସବୁଠାରୁ ଅଧିକ ୩୨% ହୋଇଛି । ଏହାବ୍ୟତୀତ ଚଣ୍ଡିଗଡ ଏବଂ ମିଜୋରାମରେ ବି ମହିଳା ନିବେଶକଙ୍କ ଅଂଶ ୩୧%ରୁ ଅଧିକ ରହିଛି । ଅକ୍ଟୋବରରେ ପୁଞ୍ଜି ବଜାରରେ ବର୍ଦ୍ଧିତ ଉତ୍ଥାନ ପତନ ଯୋଗୁ ନୂଆ ନିବେଶକଙ୍କ ସଂଖ୍ୟା ହ୍ରାସ ପାଇଛି । ଏନ୍ଏସ୍ଇ ତଥ୍ୟ ଅନୁସାରେ, ଅକ୍ଟୋବରରେ ୧୭.୯ ଲକ୍ଷ ନୂଆ ନିବେଶକ ପଞ୍ଜୀକରଣ କରାଇଛନ୍ତି । ଏହା ୫ ମାସରେ ସବୁଠୁ ଧୀମା ଏବଂ ସେପ୍ଟେମ୍ବର ତୁଳନାରେ ୧୮% କମ୍ ।
ସେହିପରି ସେପ୍ଟେମ୍ବରରେ ୨୧.୭ ଲକ୍ଷ ନିବେଶକ ପଞ୍ଜୀକରଣ କରାଇଥିଲେ । ଅକ୍ଟୋବରରେ ନୂଆ ନିବେଶକଙ୍କ ସଂଖ୍ୟା କମିବା ସତ୍ତେ୍ୱ ୨୦୨୪-୨୫ ଆର୍ଥିକବର୍ଷର ଅକ୍ଟୋବର ପର୍ଯ୍ୟନ୍ତ ପ୍ରତି ମାସ ନିବେଶକଙ୍କ ହାରାହାରି ପଞ୍ଜୀକରଣ ଦେଢ଼ ଗୁଣା ବଢ଼ିଛି । ବିଶ୍ଳେଷକଙ୍କ ଅନୁସାରେ,ଉତ୍ଥାନ-ପତନ ସତ୍ତେ୍ୱ ବଜାର ଜୋରଦାର ରିଟର୍ଣ୍ଣ ଦେଇଛି । ଏଥିପାଇଁ ଆକର୍ଷଣ ଜାରି ରହିଛି । ଅକ୍ଟୋବରରେ ଉତ୍ତର ପ୍ରଦେଶରେ ସବୁଠାରୁ ଅଧିକ ନିବେଶକ ପଞ୍ଜୀକରଣ କରାଇଛନ୍ତି । ଏ ସମୟରେ ଦେଶବ୍ୟାପୀ ଯେତେ ନୂଆ ନିବେଶକ ସେୟାର ଟ୍ରେଡିଂ ପାଇଁ ପଞ୍ଜୀକରଣ କରିଥିଲେ ସେଥିମଧ୍ୟରୁ ସବୁଠୁ ଅଧିକ ୧୩.୩% ବା ୨.୩୮ ଲକ୍ଷ ନିବେଶକ ଉତ୍ତର ପ୍ରଦେଶରୁ ଅଛନ୍ତି । ୨.୩୭ ଲକ୍ଷ ନୂଆ ନିବେଶକଙ୍କ ସହ ମହାରାଷ୍ଟ୍ର ଏ କ୍ଷେତ୍ରରେ ଦ୍ୱିତୀୟ ସ୍ଥାନରେ ରହିଛି । ଆଶ୍ଚର୍ଯ୍ୟର ବିଷୟ ହେଉଛି ଅକ୍ଟୋବରରେ ଉତ୍ତର ପ୍ରଦେଶରେ ନୂଆ ପଞ୍ଜୀକରଣ ସେପ୍ଟେମ୍ବର ତୁଳନାରେ ୧୯.୮% ଖସିଛି । ଅନ୍ୟପକ୍ଷରେ ଦେଶବ୍ୟାପୀ ହାରାହାରି ହ୍ରାସ ୧୮% ରହିଛି ।
