ଭୁବନେଶ୍ୱର,୨୮/୦୬: ଆଗରେ ଚାଲିଛି ମା’ ଜିନ୍ନତ ।  ପଛରେ ନିର୍ଭୟରେ ବୁଲୁଛନ୍ତି ୪ ଶାବକ । ମା’ ସହ ଏକାଲୟରେ ଚାଲିଛନ୍ତି । ଏଭଳି କିଛି ଦୃଶ୍ୟ ଦେଖିବାକୁ ମିଳିଛି ଶିମିଳିପାଳରେ । ମହାରାଷ୍ଟ୍ରରୁ ଅଣାଯାଇଥିବା ବାଘୁଣୀ ଜିନ୍ନତ ଛୁଆମାନଙ୍କୁ ନେଇ ଜଙ୍ଗଲରେ ବୁଲୁଥିବା ବେଳର ଫଟୋ  ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର  କର୍ତ୍ତୃପକ୍ଷ ସୋସିଆଲ ମିଡିଆ ‘ଏକ୍ସ'ରେ  ପୋଷ୍ଟ କରିଛନ୍ତି । ଯାହା ଏବେ ଭାଇରାଲ  ହେବାରେ ଲାଗିଛି । ବ୍ୟାଘ୍ରପ୍ରେମୀ ଓ ପରିବେଶବିତ୍‌ମାନେ ଏହି  ଦୃଶ୍ୟକୁ ଖୁବ ପସନ୍ଦ କରିଛନ୍ତି ।

​​​​​​​

ଚାରି ବାଘ ଶାବକମାନଙ୍କ ବୟସ  ୨ ମାସରୁ କମ୍‌ ହେବ ଏବଂ ସେମାନେ ଧୀରେଧୀରେ ବଡ଼  ହେଉଛନ୍ତି । ସେମାନେ ମା’ ଜିନ୍ନତ ସହ ବୁଲୁଛନ୍ତି ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି । ବାଘୁଣୀ ଜିନ୍ନତ ଏବଂ ତା'ର  ଶାବକମାନଙ୍କ ଗତିବିଧି ଉପରେ ତୀକ୍ଷ୍ମ ନଜର ରଖାଯାଇଛି ।  ଶିମିଳିପାଳ କର୍ତ୍ତୃପକ୍ଷ ଅଭୟାରଣ୍ୟ ଭିତରେ ୨୦ କିଲୋମିଟର  ପରିଧି ମଧ୍ୟରେ ୨୦ରୁ ଅଧିକ ଟ୍ରାପ୍‌ କ୍ୟାମେରା ଲଗାଇଛନ୍ତି । ଏହା ସହିତ ବାଘୁଣୀ ଜିନ୍ନତର ଗତିବିଧି ଜାଣିବା ପାଇଁ ତାକୁ  ଏକ ସାଟେଲାଇଟ୍‌ କଲାର୍‌ ପିନ୍ଧାଯାଇଛି ଏବଂ  ଭିଏଚଏଫ୍‌ ଟ୍ରାକିଂ ସିଗ୍‌ନାଲ୍‌ ମାଧ୍ୟମରେ  ତଦାରଖ କରାଯାଉଛି ।

 

ପ୍ରକାଶ ଥାଉକି,  ମରାଠୀ ବାଘୁଣୀ ଜିନ୍ନତକୁ ୨୦୨୪ ନଭେମ୍ବର  ମାସରେ ଶିମିଳିପାଳରେ ଛଡ଼ାଯାଇଥିଲା । ସେହିବର୍ଷ ଜିନ୍ନତ ପ୍ରାୟ  ୩୦୦ କିଲୋମିଟର ଯାତ୍ରା କରି ରାଜ୍ୟ ସୀମା ପାର କରି ଓଡ଼ିଶା,  ଝାଡ଼ଖଣ୍ଡ ଡେଇଁ ପଶ୍ଚିମବଙ୍ଗ ପଳାଇଥିଲା । ପରେ ଏକ ବିଶେଷଜ୍ଞ  ବନ୍ୟପ୍ରାଣୀ ଟିମ୍‌ ତାକୁ ଟ୍ରାକ କରି ଶିମିଳିପାଳକୁ ଫେରାଇ  ଆଣିଥିଲେ । ଚଳିତମାସ ଆରମ୍ଭରେ ଜିନ୍ନତ ମା’ ହୋଇଥିଲା ।

ଅଧିକ ପଢ଼ନ୍ତୁ :- Odisha Liquor license: ‘ଉତ୍ତର ଭାରତ ଲିକର୍‌ ସିଣ୍ଡିକେଟ୍‌’ ହାତରେ ଓଡ଼ିଶାର ମଦ ଲାଇସେନ୍ସ, ଅଧାରୁ ଛାଡ଼ିଲେ କୋଟିକୋଟି ଟଙ୍କା ବୁଡ଼ିବ!