ଆଜି କୁହୁଡ଼ି, କାଲିଠୁ ହାଲୁକା ବର୍ଷା

ଭୁବନେଶ୍ୱର,୨୪ା୧(ବ୍ୟୁରୋ): କୁହୁଡ଼ି ପ୍ରକୋପ ସାମାନ୍ୟ କମିଛି । ତଥାପି ଆସନ୍ତା ଦୁଇଦିନ ଉପକୂଳ ଓଡ଼ିଶାରେ ମଧ୍ୟମ ଧରଣର କୁହୁଡ଼ି ହୋଇପାରେ । ଅପରପକ୍ଷରେ ୨୬ ଓ ୨୭ ତାରିଖରେ ପାଗ ଆଂଶିକ ମେଘୁଆ ରହିବ । ଆଭ୍ୟନ୍ତରୀଣ ଓଡ଼ିଶାର ୧୨ଟି ଜିଲ୍ଲାରେ ହାଲ୍‌କା ବର୍ଷା ବି ହୋଇପାରେ । ଏଭଳି ପୂର୍ବାନୁମାନ କରିଛି ପାଣିପାଗ ବିଭାଗ ।
ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍‌.ଆର୍‌.ବିଶ୍ୱାସଙ୍କ ଆକଳନ ହେଲା, ଶୁକ୍ରବାର ଓ ଶନିବାର ଉପକୂଳ ଓଡ଼ିଶାରେ ମଧ୍ୟମ ଧରଣର କୁହୁଡ଼ି ହୋଇପାରେ । ପଶ୍ଚିମା ଓ ପୂର୍ବ ଦିଗରୁ ବାୟୁ ପ୍ରବାହରୁ ପାଗରେ ପରିବର୍ତ୍ତନ ସମ୍ଭାବନା ରହିଛି । ଆସନ୍ତା ୨୬ ତାରିଖ (ରବିବାର) ମାଲକାନଗିରି, କୋରାପୁଟ, ନବରଙ୍ଗପୁର, ନୂଆପଡ଼ା, କଳାହାଣ୍ଡି, ବଲାଙ୍ଗିର, ସୋନପୁର, ବରଗଡ଼, କନ୍ଧମାଳ, ଝାରସୁଗୁଡ଼ା, ସମ୍ବଲପୁର, ସୁନ୍ଦରଗଡ଼ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ହାଲ୍‌କା ବର୍ଷା ହୋଇପାରେ । ବାକି ସ୍ଥାନଗୁଡ଼ିକରେ ପାଗ ଆଂଶିକ ମେଘୁଆ ରହିବ । ସୋମବାର ଦକ୍ଷିଣ ଆଭ୍ୟନ୍ତରୀଣ ଓଡ଼ିଶା ସମେତ ଗଞ୍ଜାମ ଓ ଗଜପତିରେ ହାଲ୍‌କା ବର୍ଷା ସମ୍ଭାବନା ଅଛି । ବର୍ଷା କମିବା ପରେ ୨୮ରୁ ପାଗ ପୁଣି ବଦଳିବ । ଆଭ୍ୟନ୍ତୀରଣ ଓଡ଼ିଶାରେ ପାରଦ ୨ରୁ ୩ ଡିଗ୍ରୀ ଖସିବା ସହ ଶୀତ ବଢ଼ିବା ସମ୍ଭାବନା ଅଛି । ସେହିପରି ଆସନ୍ତା ୨୯ ତାରିଖରୁ ଉପକୂଳ ଓଡ଼ିଶାରେ ମଧ୍ୟ ସର୍ବନିମ୍ନ ତାପମାତ୍ରା ହ୍ରାସ ପାଇବ । ଶୀତ ପ୍ରକୋପ ବଢ଼ିବ ।