କଟକ, ୬।୯ : ଇନ୍ସର୍ଭିସ୍ ଶିକ୍ଷକମାନଙ୍କର ବହୁ ପ୍ରତୀକ୍ଷିତ ସ୍ପେସାଲ୍ ଓଟିଇଟି (ଓଡ଼ିଶା ଶିକ୍ଷକ ଯୋଗ୍ୟତା ପରୀକ୍ଷା) ଆସନ୍ତା ୨୭ ତାରିଖରେ ଅନୁଷ୍ଠିତ ହେବ । ମାଧ୍ୟମିକ ଶିକ୍ଷା ପରିଷଦ(ବୋର୍ଡ)ଦ୍ୱାରା ପରିଚାଳିତ ଏହି ପରୀକ୍ଷା ଦୁଇଟି ସିଟିଂରେ ହେବ । ପେପର-୧ ପରୀକ୍ଷା ପ୍ରଥମ ସିଟିଂ ସକାଳ ୯ଟାରୁ ଦିନ ୧୧ଟା ୩୦ ମିନିଟ୍ ପର୍ଯ୍ୟନ୍ତ ଚାଲିବ । ସେହିପରି ପେପର-୨ ପରୀକ୍ଷା ଅପରାହ୍ନ ୨ ଟାରୁ ଆରମ୍ଭ ହୋଇ ଅପରାହ୍ନ ୪ଟା ୩୦ ମିନିଟ୍ରେ ଶେଷ ହେବ । ଏଥିଲାଗି ଆବେଦନକାରୀ ଇନ୍ସର୍ଭିସ୍ ଶିକ୍ଷକମାନେ ଆସନ୍ତା ୧୭ ତାରିଖରୁ ବୋର୍ଡ ୱେବ୍ସାଇଟ୍ରୁ ସେମାନଙ୍କ ଆଡମିଟ୍ କାର୍ଡ ଡାଉନ୍ଲୋଡ୍ କରି ପାଇପାରିବେ ବୋଲି ସୂଚନା ଦିଆଯାଇଛି ।
ଏହି ସ୍ପେସାଲ୍ ଓଟିଇଟି ପାଇଁ ରାଜ୍ୟରେ ୭୫ ହଜାରରୁ ଅଧିକ ଇନ୍ସର୍ଭିସ ଶିକ୍ଷକ ଆବେଦନ କରିଛନ୍ତି । ଏଥିଲାଗି ୩୦ଟି ଜିଲ୍ଲାର ୧୯୩ଟି ପରୀକ୍ଷା କେନ୍ଦ୍ର ସ୍ଥିର ହୋଇଛି । ୧୫୦ ନମ୍ବର ବିଶିଷ୍ଟ ଏହି ପରୀକ୍ଷା ଓଏମ୍ଆର ସିଟ୍ରେ ହେବ । ଭାଇରାଲ୍ ଓ କପି ନିୟନ୍ତ୍ରଣ ପାଇଁ ପୂର୍ବ ପରି ପ୍ରତି ପ୍ରଶ୍ନପତ୍ରରେ କ୍ୟୁଆର୍ କୋର୍ଡ ଏବଂ ୱାଟର୍ ମାର୍କ ରହିବ । ପ୍ରଶ୍ନପତ୍ର ସୁରକ୍ଷିତ ଅବସ୍ଥାରେ କେନ୍ଦ୍ରରେ ପହଞ୍ଚିବା ପାଇଁ ବୋର୍ଡ କାର୍ଯ୍ୟାଳୟରୁ ପ୍ରଶ୍ନପତ୍ର ପ୍ୟାକେଟ୍ଗୁଡ଼ିକ ଡିଜିଟାଲ୍ ଲକର୍ରେ ଯିବ । ସୂଚନାଯୋଗ୍ୟ, ପରୀକ୍ଷା ଆଗ ଦିନ ପ୍ରଶ୍ନପତ୍ର ଭାଇରାଲ୍ ହେବାରୁ ଗତ ଜୁଲାଇ ୨୦ରେ ହେବାକୁ ଥିବା ଓଟିଇଟି ସ୍ଥଗିତ ରହିଥିଲା ।
ଅଗଷ୍ଟ ୩୧ ତାରିଖରେ ଉକ୍ତ ପରୀକ୍ଷା ହେବ ବୋଲି ବୋର୍ଡ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା । ମାତ୍ର ପ୍ରସ୍ତୁତି ଶେଷ ହୋଇ ନ ଥିବାରୁ ୩୧ ତାରିଖରେ ହେବାକୁ ଥିବା ପରୀକ୍ଷାକୁ ପୁଣି ବୋର୍ଡକର୍ତ୍ତୃପକ୍ଷ ସ୍ଥଗିତ ରଖିଥିଲେ । ଏବେ ସେପ୍ଟେମ୍ବର ୨୭ରେ ଓଟିଇଟି ପାଇଁ ସମୟ ଧାର୍ଯ୍ୟ କରାଯାଇଥିବାରୁ ଇନ୍ସର୍ଭିସ୍ ଶିକ୍ଷକମାନେ ଆଶାବାଦୀ ରହିଛନ୍ତି ।
