ଭୁବନେଶ୍ୱର,୧୧/୦୪: ଏପ୍ରିଲର ହାଲୁକା ଶୀତ ଏବଂ ପ୍ରସ୍ଫୁଟିତ ବସନ୍ତ ଋତୁ, ବରଫରେ ଆଚ୍ଛାଦିତ ହିମାଳୟ ଶିଖର, ସେଓ ଗଛରେ ଫୁଲର ବାଦାମୀ ଚାଦର ଏବଂ ସବୁଜ ଘାସ । ଏହା ଆଉ କେବଳ ସ୍ୱପ୍ନ ହୋଇ ରହିବ ନାହିଁ । ଖୁବ୍ଶୀଘ୍ର ଜମ୍ମୁ କାଶ୍ମୀର ପାଇଁ ସ୍ୱତନ୍ତ୍ର ଭାବେ ଡିଜାଇନ୍ ହୋଇଥିବା ବନ୍ଦେ ଭାରତ ଟ୍ରେନ୍ରେ ଯାତ୍ରା କରିବା ସମୟରେ ଏସବୁ ପ୍ରତ୍ୟକ୍ଷ ଭାବେ ଦେଖିବେ ଯାତ୍ରୀ । ଯେତେବେଳେ ଟ୍ରେନ୍ ପାହଲ୍ଗମ୍ର ଘାଟି ଦେଇ ଯିବ, ସବୁଜିମାରେ ପରିପୂର୍ଣ୍ଣ ପ୍ରାକୃତିକ ଦୃଶ୍ୟ, ବିସ୍ତୃତ ପାଇନ୍ ଜଙ୍ଗଲ ଏବଂ ମେଷପାଳକଙ୍କ ଝଲକ୍ ଯାତ୍ରୀଙ୍କ ମନ ମୋହିବ । ଦେଓଦର ଜଙ୍ଗଲର ଶାନ୍ତ ନୀରବତା ମଧ୍ୟ ଦେଇ ‘ବନ୍ଦେ ଭାରତ’ ସହିତ ଯାତ୍ରୀ ଖୁବ୍ଶୀଘ୍ର ପ୍ରଯୁକ୍ତିବିଦ୍ୟା ଏବଂ ପ୍ରକୃତିର ଏକ ମନୋରମ ମିଶ୍ରଣକୁ ଅନୁଭବ କରିବେ ।
ମେକ୍ ଇନ୍ ଇଣ୍ଡିଆ ଅଭିଯାନ ଅଧୀନରେ ଇଣ୍ଟିଗ୍ରାଲ କୋଚ୍ ଫ୍ୟାକ୍ଟ୍ରିରେ ନିର୍ମିତ ଏହି ସେମି ହାଇସ୍ପିଡ୍ ଟ୍ରେନ୍ ଷ୍ଟେଟ୍-ଅଫ୍-ଦ-ଆର୍ଟ ଟେକ୍ନୋଲୋଜି ଏବଂ ଟପ୍ ଟିୟର ସୁବିଧାରେ ପରିପୂର୍ଣ୍ଣ । ଉଭୟ ବେଗ ଏବଂ ଆରାମ ପାଇଁ ଡିଜାଇନ୍ ଏହି ଟ୍ରେନ୍ ନିରାପତ୍ତା ସହ ଦକ୍ଷ ଯାତ୍ରାକୁ ସୁନିଶ୍ଚିତ କରିଥାଏ । ଭାରତୀୟ ରେଳର ଏହି ଉଲ୍ଲେଖନୀୟ ନବସୃଜନ ପ୍ରତ୍ୟେକ ଭାରତୀୟଙ୍କୁ ଗର୍ବିତ କରିବ ଏବଂ ପ୍ରମାଣିତ କରିବ ଯେ, ନୂଆ ଭାରତର ଇଞ୍ଜିନିୟରିଂ ପ୍ରକୃତ ଭାବେ ଅସାଧାରଣ । ଜମ୍ମୁ କାଶ୍ମୀର ଭଳି ଶୀତଳ ସ୍ଥାନରେ ନିର୍ବିଘ୍ନ ରେଳ ଚଳାଚଳକୁ ସୁନିଶ୍ଚିତ କରିବା ପାଇଁ ଏହି ବନ୍ଦେ ଭାରତ ଟ୍ରେନ୍ରେ ସିଲିକନ୍ ହିଟିଂ ପ୍ୟାଡ୍, ହିଟେଡ୍ ପ୍ଲମ୍ବିଂ ପାଇପ୍ଲାଇନ୍, ଅଟୋ ଡ୍ରେନିଂ ମେକାନିଜମ୍ ଭଳି ଅନେକ ବୈଶିଷ୍ଟ୍ୟ ରହିଥିବା ଜଣାପଡ଼ିଛି ।
