ପାଟନା: ବିହାରରେ ପୁଣି ମଦ ମୃତ୍ୟୁ ଚିନ୍ତା ବଢ଼ାଇଛି । ବିହାରର ସିଓ୍ବାନ ଏବଂ ସାରଣରେ ବିଷାକ୍ତ ମଦ ୨୭ ଜଣଙ୍କ ଜୀବନ ନେଇଛି । ଅନେକ ଲୋକ ହସ୍ପିଟାଲରେ ଭର୍ତ୍ତି ହୋଇଛନ୍ତି । ମୃତ୍ୟୁ ସଂଖ୍ୟାରେ ବୃଦ୍ଧି ହେବାର ସମ୍ଭାବନା ରହିଛି । ସାରଣରେ ମୃତକଙ୍କ ସଂଖ୍ୟା ବଢ଼ିବାରେ ଲାଗିଛି । କିଛି ମାସ ପୂର୍ବରୁ ତାମିଲନାଡୁରେ ବିଷାକ୍ତ ମଦପିଇ ୫୦ରୁ ଊର୍ଦ୍ଧ୍ବ ଲୋକଙ୍କର ମୃତ୍ୟୁ ହୋଇଥିଲା। ଏବେ ବିହାରର ସିୱାନ ଓ ଛପ୍ରାରେ ବିଷାକ୍ତ ମଦ ପିଇ ମୃତ୍ୟୁ ଘଟଣା ସାମ୍ନାକୁ ଆସିଛି ।
୨୭ ଜଣଙ୍କ ମୃତ୍ୟୁ ହୋଇଥିବା ଏସ୍ପି ସୂଚନା ଦେଇଛନ୍ତି । ବିଷାକ୍ତ ମଦ ପିଇ ଏପର୍ଯ୍ୟନ୍ତ ୨୭ ଜଣଙ୍କ ମୃତ୍ୟୁ ହୋଇଥିବା ସିଭିଲ ସର୍ଜନଙ୍କ ଦ୍ୱାରା ପ୍ରକାଶିତ ରିପୋର୍ଟରେ କୁହାଯାଇଛି । ମୃତକଙ୍କ ମଧ୍ୟରେ ଛପ୍ରାର ୮ ଜଣ ଅଛନ୍ତି । ମଦ ପିଇବା ପରେ ଲୋକଙ୍କୁ ଡାକ୍ତରଖାନା ନିଆଯାଇଥିବା ବେଳେ ସେଠାରେ ସେମାନଙ୍କ ମୃତ୍ୟୁ ଘଟିଥିଲା । ମାମଲା ପରେ ସିୱାନ ଜିଲ୍ଲା ମାଜିଷ୍ଟ୍ରେଟ୍ ମୁକୁଲ କୁମାର ଗୁପ୍ତା ଗଣମାଧ୍ୟମକୁ କହିଛନ୍ତି, ବୁଧବାର ସକାଳ ପ୍ରାୟ ସାଢ଼େ ୭ଟାରେ ମଗର ଓ ଓରାଇଆ ପଞ୍ଚାୟତରେ ୩ ଜଣଙ୍କ ରହସ୍ୟଜନକ ମୃତ୍ୟୁ ହୋଇଥିବା ସୂଚନା ମିଳିଥିଲା।
ସଙ୍ଗେସଙ୍ଗେ ଅଧିକାରୀଙ୍କ ଏକ ଟିମ୍ ଉକ୍ତ ଅଞ୍ଚଳକୁ ପଠାଯାଇଥିଲା ଏବଂ ଆଉ ୧୨ ଜଣଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ପଠାଯାଇଥିଲା । କିନ୍ତୁ ବାଟରେ ସେମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିଲା । ନିକଟ ଅତୀତରେ ବିହାରରେ ମଦ ମୃତ୍ୟୁ ଘଟିଛି । ଏନେଇ ରାଜନୈତିକ ବୟାନ ବାଜି ହେଉଥିଲେ ହେଁ ସରକାର କିମ୍ବା ପ୍ରଶାସନ କୌଣସି ଠୋସ୍ ପଦକ୍ଷେପ ନେଉନଥିବା ଅଭିଯୋଗ ହେଉଛି ।
