ପଟନା: ବିହାରରେ ପୁଣି ଥରେ ଏକ ଅଜଣା ଘଟଣା ସାମ୍ନାକୁ ଆସିଛି। ପଟନାରେ ‘ଡଗ୍ ବାବୁ’ ନାମରେ ଏକ କୁକୁର ପାଇଁ ବାସିନ୍ଦା ପ୍ରମାଣପତ୍ର ଜାରି ହେବାର ବିବାଦ ଶେଷ ହେବା ପୂର୍ବରୁ ନୱାଦା ଜିଲ୍ଲାରେ ‘ଡଗେଶ ବାବୁ’ ନାମରେ ଆଉ ଏକ କୁକୁର ପାଇଁ ବାସିନ୍ଦା ପ୍ରମାଣପତ୍ର ଆବେଦନ ଦାଖଲ ହୋଇଛି। ଏହି ଘଟଣାକୁ ଗମ୍ଭୀରତାର ସହ ନେଇ ନୱାଦା ଜିଲ୍ଲାପାଳ ରବି ପ୍ରକାଶ ପୋଲିସକୁ ଏଫଆଇଆର ଦାଖଲ କରି ପୂର୍ଣ୍ଣାଙ୍ଗ ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁସାରେ, ନୱାଦା ଜିଲ୍ଲାର ସିରଦଲା ବ୍ଲକରେ ଥିବା ଆରଟିପିଏସ (ରାଇଟ ଟୁ ପବ୍ଲିକ ସର୍ଭିସ) କାର୍ଯ୍ୟାଳୟରେ ୨୯ ଜୁଲାଇ ୨୦୨୫ରେ ଏକ ଅନଲାଇନ ଆବେଦନ ଦାଖଲ ହୋଇଥିଲା। ଯେଉଁଥିରେ ଆବେଦନକାରୀଙ୍କ ନାମ ‘ଡଗେଶ ବାବୁ’ ଏବଂ ତାଙ୍କ ପିତାଙ୍କ ନାମ ‘ଡଗେଶ କେ ପାପା’ ଓ ମାତାଙ୍କ ନାମ ‘ଡଗେଶ କୀ ମମ୍ମୀ’ ଉଲ୍ଲେଖ କରାଯାଇଥିଲା। ଆବେଦନ ସହ ଏକ କୁକୁରର ଫଟୋ ମଧ୍ୟ ଦିଆଯାଇଥିଲା। ଠିକଣା ଭାବେ ଖରୌନ୍ଧ ଗାଁ, ୱାର୍ଡ ନମ୍ବର ୧୧, ଶେରପୁର ପୋଷ୍ଟ, ସିରଦଲା ବ୍ଲକ, ନୱାଦା ଜିଲ୍ଲା ଦର୍ଶାଯାଇଥିଲା।
ଜିଲ୍ଲାପାଳ ରବି ପ୍ରକାଶ ସୋସିଆଲ ମିଡିଆରେ ଏହି ଘଟଣାକୁ ‘କପିକ୍ୟାଟ’ ବା ‘କପି ଡଗ’ କହି କଟାକ୍ଷ କରିଛନ୍ତି ଏବଂ ଏହାକୁ ଏକ ହାସ୍ୟାସ୍ପଦ ଓ ଶସ୍ତା ମଜାକ ବୋଲି ଅଭିହିତ କରିଛନ୍ତି। ସେ କହିଛନ୍ତି, “ପ୍ରଶାସନିକ ପ୍ରକ୍ରିୟାରେ ଏଭଳି କାର୍ଯ୍ୟ ଆଦୈ ଗ୍ରହଣୀୟ ନୁହେଁ। ଦୋଷୀମାନଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।”
ସିରଦଲା ଜୋନ ଅଫିସର ଅଭିନବ ରାଜ ଏହି ଘଟଣାର ସତ୍ୟତା ନିଶ୍ଚିତ କରିଛନ୍ତି ଏବଂ ଭାରତୀୟ ଦଣ୍ଡ ସଂହିତାର ଧାରା ୩୧୯(୨) (ପ୍ରତାରଣା), ୩୪୦(୧) ଓ (୨) (ଇଲେକ୍ଟ୍ରୋନିକ ରେକର୍ଡର ପ୍ରତାରଣାମୂଳକ ବ୍ୟବହାର), ୨୪୧ (ଜାଲିଆତି) ଏବଂ ଆଇଟି ଆକ୍ଟ ୨୦୦୦ର ଧାରା ୬୬ଡି (କମ୍ପ୍ୟୁଟର ସମ୍ବଳ ବ୍ୟବହାର କରି ଅନୁକରଣ) ଅଧୀନରେ ଏକ ଏଫଆଇଆର ଦାଖଲ କରିଛନ୍ତି।
ଏହା ପୂର୍ବରୁ ପଟନାର ମସୌଢ଼ୀ ଜୋନରେ ‘ଡଗ୍ ବାବୁ’ ନାମରେ ଏକ ବୈଧ ନିବାସ ପ୍ରମାଣପତ୍ର ଜାରି ହୋଇଥିଲା। ଯେଉଁଥିରେ କୁକୁରର ଫଟୋ ସହ ପିତାଙ୍କ ନାମ ‘କୁତ୍ତା ବାବୁ’ ଓ ମାତାଙ୍କ ନାମ ‘କୁତିୟା ଦେବୀ’ ଉଲ୍ଲେଖ ଥିଲା। ଏହି ଘଟଣା ସୋସିଆଲ ମିଡିଆରେ ଭାଇରାଲ ହେବା ପରେ ବିହାରର ପ୍ରଶାସନିକ ତ୍ରୁଟି ଉପରେ ବ୍ୟାପକ ସମାଲୋଚନା ହୋଇଥିଲା। ପଟନା ଜିଲ୍ଲାପାଳ ଥିୟାଗରାଜନ ଏସ.ଏମ. ମସୌଢ଼ୀ ବ୍ଲକ-କମ-ସର୍କଲ ଅଫିସ ପରିଦର୍ଶନ କରି ଏହି ଘଟଣାର ତଦନ୍ତ କରିଥିଲେ ଏବଂ ଏହାକୁ ଏକ ଉଦ୍ଦେଶ୍ୟମୂଳକ ପ୍ରୟାସ ବୋଲି କହିଥିଲେ। ସେ କହିଛନ୍ତି, “ଏହା କୌଣସି ଭୁଲ ନୁହେ, ବରଂ ରାଜ୍ୟ ସରକାର ଓ ଜିଲ୍ଲା ପ୍ରଶାସନକୁ ବଦନାମ କରିବାର ଏକ ଉଦ୍ଦେଶ୍ୟମୂଳକ ପ୍ରୟାସ।”
ଏହି ଘଟଣାମାନେ ବିହାରର ଆରଟିପିଏସ ସିଷ୍ଟମର ଅଖଣ୍ଡତା ଏବଂ ଏହାର ଦୁରୁପୟୋଗ ସମ୍ଭାବନା ଉପରେ ଗମ୍ଭୀର ପ୍ରଶ୍ନ ଉଠାଇଛି। ପଟନାରେ ‘ଡଗ୍ ବାବୁ’ ପ୍ରମାଣପତ୍ର ରଦ୍ଦ କରାଯାଇଛି ଏବଂ ଦାୟୀ ଅଧିକାରୀମାନଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ବିଚାର କରାଯାଉଛି। ନୱାଦା ଘଟଣାରେ ମଧ୍ୟ ଅପରାଧୀମାନଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ପାଇଁ ପ୍ରଶାସନ ଉଦ୍ୟମ ଜାରି ରଖିଛି।
ଏହି ପରିପ୍ରେକ୍ଷୀରେ ସୋସିଆଲ ମିଡିଆରେ ମଧ୍ୟ ବ୍ୟାପକ ଚର୍ଚ୍ଚା ଆରମ୍ଭ ହୋଇଯାଇଛି। ସ୍ୱରାଜ ଇଣ୍ଡିଆର ସଦସ୍ୟ ଯୋଗେନ୍ଦ୍ର ଯାଦବ ଏହି ଘଟଣାକୁ ନେଇ ରାଜ୍ୟ ସରକାରଙ୍କୁ କଟାକ୍ଷ କରି କହିଛନ୍ତି, “ବିହାରରେ ଏକ କୁକୁର ନିବାସ ପ୍ରମାଣପତ୍ର ପାଇଛି, ଯାହା ସ୍ପେଶାଲ ଇଣ୍ଟେନସିଭ ରିଭିଜନ (ଏସଆଇଆର) ପାଇଁ ଗ୍ରହଣୀୟ, କିନ୍ତୁ ଆଧାର ଓ ରାସନ କାର୍ଡକୁ ନକଲି କୁହାଯାଉଛି।”
ଏହି ଘଟଣାଗୁଡ଼ିକ ବିହାରର ଡିଜିଟାଲ ପ୍ରଶାସନ ଓ ନିର୍ବାଚନୀ ପ୍ରକ୍ରିୟାରେ ଥିବା ତ୍ରୁଟିଗୁଡ଼ିକୁ ପ୍ରକାଶ କରିଛି। ପ୍ରଶାସନ ଏହାକୁ ଗମ୍ଭୀରତାର ସହ ନେଇ ସମସ୍ତ ଦୋଷୀମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଏବଂ ଆରଟିପିଏସ ସିଷ୍ଟମର ସୁରକ୍ଷା ମଜବୁତ କରିବା ପାଇଁ ପଦକ୍ଷେପ ଗ୍ରହଣ କରୁଛି।
