ନୂଆଦିଲ୍ଲୀ: ମଙ୍ଗଳବାର ସୁପ୍ରିମକୋର୍ଟ ନିର୍ବାଚନ ଜନିତ ଏକ ଜନସ୍ୱାର୍ଥ ମାମଲା (ପିଆଇଏଲ) କୁ ପ୍ରତ୍ୟାଖ୍ୟାନ କରିଛନ୍ତି, ଏବଂ ଆବେଦନକାରୀଙ୍କୁ ଭର୍ସନା କରି କହିଛନ୍ତି ଯେ, ଯେତେବେଳେ ତୁମେ ହାରିଥାଅ, ଇଭିଏମ୍ ଗୁଡିକ ଟାମ୍ପରିଂ କରାଯାଇଥିବା ଅଭିଯୋଗ ଆସେ, ଆଉ ଯେତେବେଳେ ତୁମେ ଜିତିଥାଅ, ସେତେବେଳେ ଇଭିଏମ୍ ଗୁଡିକ ଭଲ ଥାଏ । ଜନସ୍ବାର୍ଥ ମାମଲାରେ ଇଭିଏମ୍ ସ୍ଥାନରେ ବାଲାଟ ପେପର ବ୍ୟବହାର କରିବାକୁ ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେବାକୁ ଦାବି କରାଯାଇଥିଲା। ଜଷ୍ଟିସ ବିକ୍ରମ ନାଥ ଏବଂ ପି.ବି.ବରାଳେଙ୍କ ଖଣ୍ଡପୀଠ ଇଭିଏମରେ ହେରଫେର ହେତୁ ବାଲାଟ ସିଷ୍ଟମକୁ ଫେରିବା ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି । ଏହା ପୂର୍ବରୁ ମାର୍ଚ୍ଚରେ ସୁପ୍ରିମକୋର୍ଟ ମଧ୍ୟ ସମାନ ଏକ ଆବେଦନକୁ ପ୍ରତ୍ୟାଖ୍ୟାନ କରିଥିଲେ, ଯେଉଁଥିରେ ଦାବି କରାଯାଇଥିଲା ଯେ, ବାଲଟ ପେପର ମାଧ୍ୟମରେ ଲୋକସଭା ନିର୍ବାଚନ କରାଯାଉ ।
ସୂଚନାଥାଉକି, ଆବେଦନକାରୀ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏବଂ ପୂର୍ବ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀଙ୍କୁ ଇଭିଏମ୍ ମାଧ୍ୟମରେ ଦିଆଯାଇଥିବା ଜନମତକୁ ନେଇ ଅଦାଲତଙ୍କ ଦ୍ବାରସ୍ଥ ହୋଇଥିଲେ। ଏହି ସମୟରେ ସୁପ୍ରିମକୋର୍ଟ ଏକ ଦୃଢ ମନ୍ତବ୍ୟ ଦେଇ କହିଛନ୍ତି ଯେ, 'ଯେତେବେଳେ ତୁମେ ହାରିବ, ଇଭିଏମ୍ଗୁଡ଼ିକ ବଦଳିଯାଏ; ଯେତେବେଳେ ତୁମେ ଜିତିବ, ଇଭିଏମ୍ ଭଲ ଅଛି । ଖଣ୍ଡପୀଠ କହିଛନ୍ତି, 'ଯେତେବେଳେ ଚନ୍ଦ୍ରବାବୁ ନାଇଡୁ କିମ୍ବା ଶ୍ରୀ ରେଡ୍ଡୀ ହାରିଯାଆନ୍ତି, ସେତେବେଳେ ସେମାନେ କୁହନ୍ତି ଯେ ଇଭିଏମ୍ ଗୁଡିକ ଟାମ୍ପରିଂ କରାଯାଇ ପାରିବ; ଯେତେବେଳେ ସେମାନେ ଜିତନ୍ତି, ସେମାନେ କିଛି କୁହନ୍ତି ନାହିଁ । ଆମେ ଏହାକୁ ବରଖାସ୍ତ କରୁଛୁ । ଏହା ସେହି ସ୍ଥାନ ନୁହେଁ ଯେଉଁଠାରେ ତୁମେ ଏସବୁ ବିଷୟରେ ବିତର୍କ କରିବ ।
