ନୂଆଦିଲ୍ଲୀ,୨୪/୦୯: ଫୁଡ୍ ଡେଲିଭରୀ କମ୍ପାନୀ ସ୍ୱିଗିର ବଡ଼ ନିଷ୍ପତ୍ତି। ବାଇକ୍ ଟ୍ୟାକ୍ସି ଷ୍ଟାର୍ଟଅପ୍ ରାପିଡୋରେ ଥିବା ନିଜର ଅଂଶଧନ ବିକ୍ରି କରିବ ସ୍ୱିଗି । ଏନେଇ କମ୍ପାନୀର ବୋର୍ଡ ଏହି ବିକ୍ରୟକୁ ଅନୁମୋଦନ କରିଛି। ସ୍ୱିଗିକୁ ଏହି ଚୁକ୍ତିରୁ ପ୍ରାୟ ୨,୪୦୦ କୋଟି ଟଙ୍କା ମିଳିବ। ବିଶ୍ୱାସ କରାଯାଉଛି ଯେ, ରାପିଡୋ ମଧ୍ୟ ଖାଦ୍ୟ ବିତରଣ ବ୍ୟବସାୟରେ ପ୍ରବେଶ କରିଥିବାରୁ ସ୍ୱିଗି ଏହାର ଅଂଶଧନ ବିକ୍ରି କରୁଛି।
ଷ୍ଟକ୍ ଏକ୍ସଚେଞ୍ଜକୁ ଦିଆଯାଇଥିବା ସୂଚନା ଅନୁଯାୟୀ, ସ୍ୱିଗି ରାପିଡ଼ୋର ୧୦ ଇକ୍ୱିଟି ସେୟାର ଏବଂ ୧୬୩,୯୯୦ ସିରିଜ୍ ଡି କମ୍ପଲ୍ସରୀ କନବର୍ଟିବଲ ପେଫରେନ୍ସ ସେୟାର ପ୍ରୋସେସର ସହଯୋଗରେ କମ୍ପାନୀ ଏମଆଇଏଚ ଇନଭେସ୍ଟମେଣ୍ଟ ଓ୍ୱାନକୁ ବିକ୍ରି କରିବ । ଏହି ଚୁକ୍ତିର ମୂଲ୍ୟ ₹୧,୯୬୮ କୋଟି ହେବ। ଏହା ସହିତ ସ୍ୱିଗି ୱେଷ୍ଟବ୍ରିଜ୍ କ୍ୟାପିଟାଲର ସେତୁ ଏଆଇଏଫ ଟ୍ରଷ୍ଟକୁ ୩୫,୯୫୮ ଅଂଶଧନ ବିକ୍ରି କରିବ, ଏଥିରେ ସ୍ୱିଗିକୁ ୪୩୧.୫ କୋଟି ଟଙ୍କା ମିଳିବ। ସ୍ୱିଗି କହିଛି ଯେ ଏହି ନିଷ୍ପତ୍ତି ସେୟାର ଧାରକମାନଙ୍କ ସ୍ୱାର୍ଥରେ ନିଆଯାଇଛି ଏବଂ କମ୍ପାନୀ ଏହାର ନିବେଶକୁ ରିଡିମ୍ କରିବାକୁ ଚାହୁଁଛି । ଏହି ବିକ୍ରୟ ସ୍ୱିଗିର ୨୦୨୨ ନିଷ୍ପତ୍ତିର ସମ୍ପୂର୍ଣ୍ଣ ବିପରୀତ। ସ୍ୱିଗି ସେତେବେଳେ ରାପିଡୋରେ ୧୮୦ ନିୟୁତ ଡଲାର ନିବେଶ କରିଥିଲା, ଯାହାର ମୂଲ୍ୟ ପ୍ରାୟ ୮୦୦ ନିୟୁତ ଡଲାର ଥିଲା। ସ୍ୱିଗି କହିଛି ଯେ ଏହି ନିବେଶ ଏହାର ଡେଲିଭରି ଫ୍ଲିଟ୍ ଏବଂ ରାପିଡୋର କ୍ୟାପ୍ଟେନମାନଙ୍କ ପାଇଁ ରୋଜଗାର ସୁଯୋଗ ବୃଦ୍ଧି କରିବ। ସେତେବେଳେ ରାପିଡୋର ୨୫ ନିୟୁତରୁ ଅଧିକ ଗ୍ରାହକ ଏବଂ ୧.୫ ନିୟୁତ କ୍ୟାପ୍ଟେନ ଥିଲେ। କମ୍ପାନୀ ଛୋଟ ସହରଗୁଡ଼ିକରେ ଏହାର ଉପସ୍ଥିତିକୁ ସୁଦୃଢ଼ କରିବାକୁ ଚାହୁଁଥିଲା।
ଯଦିଓ ୨୦୨୫ ମଧ୍ୟଭାଗ ସୁଦ୍ଧା ପରିସ୍ଥିତି ବଦଳିଗଲା। ରାପିଡୋ ନିଜର ଖାଦ୍ୟ ବିତରଣ ସେବା ଆରମ୍ଭ କଲା, ଯାହା ସ୍ୱିଗିର ମୂଳ ବ୍ୟବସାୟ ସହିତ ଏକ ଦ୍ୱନ୍ଦ୍ୱ ସୃଷ୍ଟି କଲା। ସ୍ୱିଗିର ସିଇଓ ହର୍ଷ ମାଜେଟି ଜୁଲାଇରେ କହିଥିଲେ, "ଯେତେବେଳେ ଆମେ ଅଢ଼େଇ ବର୍ଷ ପୂର୍ବେ ରାପିଡୋରେ ଯୋଗ ଦେଇଥିଲୁ, ଏହା ଏକ ମୋବିଲିଟି ପ୍ଲେୟର ଥିଲା ଏବଂ ଭଲ କାମ କରୁଥିଲା। ଦୁର୍ଭାଗ୍ୟବଶତଃ, ସେମାନେ ନିଜେ ଖାଦ୍ୟ ବିତରଣ ବ୍ୟବସାୟରେ ପ୍ରବେଶ କରିବାକୁ ନିଷ୍ପତ୍ତି ନେଇଛନ୍ତି। ଏହା ଆମ ପାଇଁ ଏକ ଦ୍ୱନ୍ଦ୍ୱ ସୃଷ୍ଟି କରିଛି। ତେଣୁ, ଆମେ ଅଲଗା ହେବାକୁ ଯୋଜନା କରୁଛୁ।" ଏହାର ଅର୍ଥ ହେଉଛି ସ୍ୱିଗି ଏବଂ ରାପିଡୋ ଏବେ ଭିନ୍ନ ପଥ ଅନୁସରଣ କରିବେ।
