ତାଳଚେର,୦୯/୦୧: ଏନ୍ଟିପିସି ପରିଚାଳନାଧୀନ ତାଳଚେର ଥର୍ମାଲ୍ ପ୍ରକଳ୍ପର ନିର୍ମାଣ କାର୍ଯ୍ୟ ଜୋର୍ସୋରରେ ଆଗେଇ ଚାଲିଛି । ୨୦୨୭ ସେପ୍ଟେମ୍ବରରୁ ୬୬୦ ମେଗାୱାଟ ବିଶିଷ୍ଟ ପ୍ରଥମ ୟୁନିଟ୍ରୁ ବିଦ୍ୟୁତ୍ ଉତ୍ପାଦନ ଆରମ୍ଭ ହେବ ବୋଲି ପ୍ରକଳ୍ପ ମୁଖ୍ୟ ବିଜୟ ଚାନ୍ଦ ବୁଧବାର ପ୍ରକାଶ କରିଛନ୍ତି । ସେହିପରି ଦ୍ୱିତୀୟ ୟୁନିଟ୍ ଠିକ୍ ଏହାର ତିନି ମାସ ପରେ ଅର୍ଥାତ୍ ଡିସେମ୍ବର ୨୦୨୭ରେ କାର୍ଯ୍ୟକ୍ଷମ ହେବ ବୋଲି ସୂଚନା ଦିଆଯାଇଛି ।
୬୬୦ ମେଗାୱାଟ୍ କ୍ଷମତାର ଦୁଇଟି ୟୁନିଟ୍ କାର୍ଯ୍ୟ ନିର୍ମାଣାଧୀନ ରହିଛି । ପ୍ରକଳ୍ପ କାର୍ଯ୍ୟ ଶେଷ ହେଲେ ପ୍ରକଳ୍ପରୁ ୧୩୨୦ ମେଗାୱାଟ୍ ବିଦ୍ୟୁତ୍ ଶକ୍ତି ଉତ୍ପାଦନ ହେବ । ଏହି ପ୍ରକଳ୍ପରୁ ଉତ୍ପାଦିତ ବିଜୁଳି ଶକ୍ତିର ୫୦ ପ୍ରତିଶତ ଓଡ଼ିଶାକୁ ମିଳିବାକୁ ଥିବା ବେଳେ ଅବଶିଷ୍ଟ ୫୦ ପ୍ରତିଶତ ଗୁଜୁରାଟ, ଆସାମ ଓ ତାମିଲ୍ନାଡୁକୁ ଯୋଗାଣ ହେବ ବୋଲି ପ୍ରକଳ୍ପ ମୁଖ୍ୟ କହିଛନ୍ତି । ଏହି ପ୍ରକଳ୍ପ ପାଇଁ ସ୍ଥାନୀୟ ଯୁବବର୍ଗ ନିମନ୍ତେ କର୍ମନିଯୁକ୍ତିର ସୁଯୋଗ ସୃଷ୍ଟି ହୋଇଛି ।
ଶକ୍ତି ଉତ୍ପାଦନ ବ୍ୟତୀତ ପରିବେଶ ସୁରକ୍ଷା, ଶିକ୍ଷା, ସ୍ୱାସ୍ଥ୍ୟ ଓ ପାରିପାଶ୍ୱିର୍କ ଗ୍ରାମାଞ୍ଚଳ ଉନ୍ନତିକୁ ଏନ୍ଟିପିସି ଗୁରୁତ୍ୱ ଦେଇ ଆସିଛି । ପରିବେଶ ସୁରକ୍ଷା ନିମିତ୍ତ ରାଜ୍ୟ ବନ ନିଗମ ଦ୍ୱାରା ୯୦ ହଜାର ବୃକ୍ଷ ରୋପଣ କରାଯିବାକୁ ସ୍ଥିର ହୋଇଛି । ବୁଧବାର ଏକ ସାମ୍ବାଦିକ ସମ୍ମିଳନୀରେ ପ୍ରକଳ୍ପ ମୁଖ୍ୟ ଶ୍ରୀ ଚାନ୍ଦ କହିଲେ, ଏନ୍ଟିପିସି ନିଜ ଲକ୍ଷ୍ୟରେ ଅଟଳ ଓ ସାମାଜିକ ବିକାଶ ପାଇଁ ନିରନ୍ତର ପ୍ରୟାସ ଜାରି ରଖିଛି। ପ୍ରଦୂଷଣ ଶୂନ ଏହି ପ୍ରକଳ୍ପ ଓଡ଼ିଶା ପାଇଁ ଏକ ନୂଆ ମାଇଲ୍ ଖୁଣ୍ଟ ସ୍ଥାପନ କରିବ ବୋଲି ସେ କହିଥିଲେ ।
