ନୂଆଦିଲ୍ଲୀ : ତାମିଲନାଡୁ ବିଧାନସଭା ନିର୍ବାଚନ ପାଇଁ ରାଜନୈତିକ ଦଳ ଗୁଡ଼ିକ ଜୋରଦାର ପ୍ରସ୍ତୁତି ଆରମ୍ଭ କରିଦେଇଛନ୍ତି। ଗୋଟିଏ ପଟେ ପ୍ରାର୍ଥୀ ତାଲିକା ପ୍ରକାଶିତ ହେଉଥିବା ବେଳେ ଅନ୍ୟ ପଟେ ଡିଏମକେ ମୁଖ୍ୟ ତଥା ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ଆଜି (ରବିବାର) ଦଳର ଇସ୍ତାହାର ପ୍ରକାଶ କରିଛନ୍ତି। ଇସ୍ତାହାରରେ ମହିଳା ଏବଂ ବୃଦ୍ଧ ମାନଙ୍କୁ ମାସିକ ୨୦୦୦ ଟଙ୍କା, ମାଗଣା ବିଦ୍ୟୁତ୍ ଏବଂ ୩୫ ଲକ୍ଷ ଛାତ୍ରଛାତ୍ରୀଙ୍କୁ ଲାପଟପ୍ ପ୍ରଦାନ କରିବା ଠାରୁ ଆରମ୍ଭ କରି ଅନେକ ପ୍ରମୁଖ ଘୋଷଣା କରିଛନ୍ତି।
ଚେନ୍ନାଇର ଦଳୀୟ ମୁଖ୍ୟାଳୟରେ ଇସ୍ତାହାର ପ୍ରକାଶ କରି ଷ୍ଟାଲିନ୍ କହିଛନ୍ତି,"ଡିଏମକେ ସରକାର ଜନସାଧାରଣଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିଛି। ଯଦି ଡିଏମକେ ତାମିଲନାଡୁରେ ପୁଣି ଥରେ ସରକାର ଗଠନ କରେ, ତେବେ ବର୍ତମାନର ଯୋଜନା ଗୁଡ଼ିକୁ ପୂର୍ଣ୍ଣ ରୂପରେଖ ଦିଆଯିବ।
ପରିବାରର ମହିଳା ମୁଖ୍ୟଙ୍କୁ ପ୍ରତି ମାସରେ ୨୦୦୦ ଟଙ୍କା ମିଳିବ...
ଷ୍ଟାଲିନଙ୍କ ପ୍ରମୁଖ ଘୋଷଣା ଗୁଡ଼ିକ ମଧ୍ୟରେ ହେଉଛି ଯେ, ମହିଳା ମୁଖ୍ୟ ମାନଙ୍କୁ ବର୍ତ୍ତମାନ ଦିଆଯାଉଥିବା ମାସିକ ୧୦୦୦ ଟଙ୍କା ସହାୟତାକୁ ୨୦୦୦ ଟଙ୍କାକୁ ବୃଦ୍ଧି କରାଯିବ। ଏହା ରାଜ୍ୟର ୧.୩୭ କୋଟିରୁ ଅଧିକ ହିତାଧିକାରୀଙ୍କୁ ଲାଭ ଦେବ। ସେ ବୃଦ୍ଧାବସ୍ଥା ପେନସନକୁ ୨୦୦୦ ଟଙ୍କାକୁ ବୃଦ୍ଧି କରିବାକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି। ସରକାରଙ୍କର ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପିଲା ମାନଙ୍କ ପାଇଁ କାର୍ଯ୍ୟକାରୀ ହେଉଥିବା ଜଳଖିଆ ଯୋଜନାକୁ ୮ମ ଶ୍ରେଣୀ ପର୍ଯ୍ୟନ୍ତ ବୃଦ୍ଧି କରାଯିବାର ପ୍ରତିଶ୍ରୁତି ଦିଆଯାଇଛି।
୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଋଣ ଘୋଷଣା...
ଡିଏମକେ ମୁଖ୍ୟ ପ୍ରତିଶ୍ରୁତି ଦେଇଛନ୍ତି ଯେ ଯଦି ତାଙ୍କ ଦଳ ସରକାର ଗଠନ କରେ, ତେବେ ମହିଳା ସ୍ୱୟଂ ସହାୟକ ଗୋଷ୍ଠୀ ଗୁଡ଼ିକୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଋଣ ମିଳିବ। ସେ ମୁଖ୍ୟମନ୍ତ୍ରୀ ସ୍ୱାସ୍ଥ୍ୟ ବୀମା ଯୋଜନା ଅଧୀନରେ ଲାଭ ୧ ଲକ୍ଷ ଟଙ୍କାକୁ ବୃଦ୍ଧି କରିବାକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି। ଏଥି ସହ ଏହା ଆଗାମୀ ପାଞ୍ଚ ବର୍ଷ ମଧ୍ୟରେ ୧୦ ଲକ୍ଷ ନୂତନ ଘର ନିର୍ମାଣ କରିବ ଏବଂ ସରକାରୀ ହସ୍ପିଟାଲରେ ଡବଲ ଡାଏଲିସିସ୍ ସୁବିଧା ନିର୍ମାଣ କରିବ।
ମାଗଣା ବିଦ୍ୟୁତ୍ ଏବଂ ଲାପଟପ୍ ପ୍ରତିଶ୍ରୁତି...
ଇସ୍ତାହାରରେ ଉଲ୍ଲେଖ କରାଯାଇଛି ଯେ ଉଚ୍ଚଶିକ୍ଷା ନେଉଥିବା ୩୫ ଲକ୍ଷ ଛାତ୍ରଛାତ୍ରୀଙ୍କୁ ଲାପଟପ୍ ଯୋଗାଇ ଦିଆଯିବ। ୨୦ ଲକ୍ଷରୁ ଅଧିକ ହିତାଧିକାରୀଙ୍କୁ ମାଗଣା ବିଦ୍ୟୁତ୍ ସହାୟତା ଜାରି ରଖିବାକୁ ମଧ୍ୟ ପ୍ରତିଶ୍ରୁତି ଦିଆଯାଇଛି। ଏଥିରେ ଏହା ମଧ୍ୟ କୁହାଯାଇଛି ଯେ ମିଟରଲେସ୍ ପମ୍ପ ସେଟ୍ ଯୋଗାଇ ଦିଆଯିବ। ନିଯୁକ୍ତି ସୁଯୋଗ ବୃଦ୍ଧି କରିବା ପାଇଁ ଆଇଟି ପାର୍କ ପ୍ରତିଷ୍ଠା କରାଯିବ।
