ଗଞ୍ଜାମ, ୨୩/୦୯ : ଗଞ୍ଜାମ–ଗଜପତି ଜିଲ୍ଲା ସୀମାନ୍ତ ତପ୍ତପାଣିରେ ଅହିଂସା ରଥକୁ ଆଜି ସ୍ୱାଗତ କରାଯାଇଛି। ଗଜପତି ଜିଲ୍ଲାର ବିଭିନ୍ନ ଅଞ୍ଚଳ ବୁଲିବା ପରେ ଗଞ୍ଜାମ ଜ଼ିଲ୍ଲାରେ ପ୍ରବେଶ କରିଛି ଅହିଂସା ରଥ। ଏହି ରଥ ସାତଦିନ ଜିଲ୍ଲାରେ ପରିଭ୍ରମଣ କରିବ। ଏହି ଅବସରରେ ସାନଖେମୁଣ୍ଡି ବ୍ଲକ ତପ୍ତପାଣିରେ ପ୍ରଶାସନ, ପୋଲିସ, ମିଶନ ଶକ୍ତି ମହିଳା, ସ୍କୁଲ ଛାତ୍ରଛାତ୍ରୀ, ଏବଂ ଆଖପାଖର ଶତାଧିକ ମହିଳା, ପୁରୁଷ ଉପସ୍ଥିତ ଥିଲେ। ସମସ୍ତେ ହୁଳହୁଳି ଦେଇ ଫୁଲ ପକାଇ ଅହିଂସା ରଥକୁ ସ୍ଵାଗତ କରିଥିଲେ।
ଏହାପରେ ପୋଡାମାରି, ଡ଼େଙ୍ଗାଉସ୍ତା ଏବଂ ଦିଗପହଣ୍ଡିରେ ଏନ, ଏ, ସି ଏବଂ ବ୍ଲକ ପ୍ରଶାସନ ପକ୍ଷରୁ ରଥକୁ ବିପୁଳ ସମ୍ବର୍ଦ୍ଧନା ଦିଆଯାଇ ସ୍ୱାଗତ କରାଯାଇଥିଲା। ଏହି ଅବସରରେ ଲୋକନୃତ୍ୟ ପରିବେଷଣ ସାଙ୍ଗକୁ ରଙ୍ଗାରଙ୍ଗ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଆଜାଦି କି ଅମୃତ ମହୋତ୍ସବ ପାଳନ ଅବସରରେ ରାଜ୍ୟ ସରକାରଙ୍କ ପକ୍ଷରୁ ଅହିଂସା ରଥ ରାଜ୍ୟ ପରିଭ୍ରମଣ କରାଯାଉଛି।