ଭୁବନେଶ୍ୱର,୧୬/୧୨: ରାଜଧାନୀର ତାରକା ହୋଟେଲ ସାମ୍ନାରେ ହୋଇଥିବା ଲାଞ୍ଚ କାରବାର ମାମଲା ମାତ୍ର ୧୦ ଲକ୍ଷ ଟଙ୍କାରେ ସୀମିତ ନାହିଁ । ଟେଣ୍ଡର ହାତେଇବା ପାଇଁ ଏଭଳି ଡିଲ୍ ପୂର୍ବରୁ ଏକାଧିକ ଥର ହୋଇଥିବା ଗନ୍ଧ ବାରି ଜାତୀୟ ତଦନ୍ତକାରୀ ସଂସ୍ଥା (ସିବିଆଇ) ପ୍ରମାଣ ସଂଗ୍ରହରେ ଲାଗିଛି । ରବିବାର ସିବିଆଇ ଉକ୍ତ ତାରକା ହୋଟେଲର ଜେନେରାଲ ମ୍ୟାନେଜର ଶୁଭମୟ ବାନାର୍ଜୀଙ୍କୁ ପଚରାଉଚରା କରିଛି । ଉକ୍ତ ହୋଟେଲରେ ଥରେ ଲାଞ୍ଚ କାରବାର ହୋଇଥିଲା ନା ହୋଟେଲଟି ଡିଲ୍ ପଏଣ୍ଟ ପାଲଟିଥିଲା । ସେନେଇ ପ୍ରମାଣ ସଂଗ୍ରହରେ ଲାଗିଛି ସିବିଆଇ ।
ଲାଞ୍ଚ କାରବାର ବେଳର ଅଧିକ ତଥ୍ୟ ପାଇଁ ସିବିଆଇ ପକ୍ଷରୁ ଶ୍ରୀ ବାନାର୍ଜୀଙ୍କୁ ସମନ ଜାରି ହୋଇଥିଲା । ରବିବାର ଅପରାହ୍ଣରେ ସେ ସିବିଆଇ ଅଫିସରେ ପହଞ୍ଚିଥିଲେ । ରିମାଣ୍ଡରେ ଥିବା ବ୍ରିଜ ଆଣ୍ଡ ରୁଫ୍ ଗ୍ରୁପ୍ ଜେନେରାଲ ମ୍ୟାନେଜର ଚଞ୍ଚଲ ମୁଖାର୍ଜୀ, ମଧ୍ୟସ୍ଥ ତଥା ‘ଆଦିତ୍ୟଦେବ ଇନ୍ଫ୍ରାଟେକ୍ ପ୍ରାଇଭେଟ ଲିମିଟେଡ’ ମାଲିକ ଦେବଦତ୍ତ ମହାପାତ୍ର ଓ ପେଣ୍ଟା ଏ ଷ୍ଟୁଡିଓ ପ୍ରାଇଭେଟ୍ ଲିମିଟେଡ୍ କନ୍ଷ୍ଟ୍ରକ୍ସନ ସଂସ୍ଥାର ନିର୍ଦ୍ଦେଶକ ସନ୍ତୋଷ ମହାରଣାଙ୍କ ସାମ୍ନାରେ ଶ୍ରୀ ବାନାର୍ଜୀଙ୍କୁ ଦୀର୍ଘ ସମୟ ପାଇଁ ପଚରାଉଚରା କରାଯାଇଛି ।
ଗତ ୭ ତାରିଖ ସନ୍ଧ୍ୟାରେ ତାରକା ହୋଟେଲରେ ଚାଲିଥିଲା କ’ଣ ? ଡିଲ୍ ବେଳେ ୩ ଅଭିଯୁକ୍ତଙ୍କ ବାଦ୍ ଅନ୍ୟ କେଉଁମାନେ ଉପସ୍ଥିତ ଥିଲେ? ଡିଲ୍ ଚାଲିଥିବା ଟେବୁଲଟି କାହା ନାଁରେ ବୁକ୍ କରାଯାଇଥିଲା? ଟେବୁଲରେ ଅନୁସୂଚିତ ଜନଜାତି ଓ ଅନୁସୂଚିତ ଜାତି ବିଭାଗର ପ୍ରମୁଖ ସଚିବ ତଥା ବରିଷ୍ଠ ଆଇଏଏସ୍ ଅଧିକାରୀ ବିଷ୍ଣୁପଦ ସେଠୀ ଉପସ୍ଥିତ ଥିଲେ କି? ଶ୍ରୀ ବାନାର୍ଜୀଙ୍କୁ ପଚରାଉଚରା ବେଳେ ଏସବୁ ପ୍ରଶ୍ନର ଉତ୍ତର ଖୋଜିଥିଲା ସିବିଆଇ । ଏହି ଡିଲ୍ଟି ପ୍ରଥମ ଥିଲା ନା, ପୂର୍ବରୁ ଏମିତି ଏକାଧିକ ଥର ଲାଞ୍ଚ କାରବାର ହୋଇଛି । ସେ ସମ୍ପର୍କରେ ତଥ୍ୟ ଜାଣିବାକୁ ଚାହିଁଥିଲା । ରାତି ୭ଟା ବେଳକୁ ସେ ସିବିଆଇ କାର୍ଯ୍ୟାଳୟରୁ ବାହାରିଥିଲେ ।
ଲାଞ୍ଚ କାରବାରରେ ଅନ୍ୟମାନଙ୍କ ସମ୍ପୃକ୍ତିର ସତ ଜାଣିବା ପାଇଁ ତାରକା ହୋଟେଲର ସିସି କ୍ୟାମେରା ଫୁଟେଜ ମଗାଯାଇଥିଲା । କିନ୍ତୁ ଶ୍ରୀ ବାନାର୍ଜୀ ଏହି ଫୁଟେଜ ଦେବା ପାଇଁ ଲିଖିତ ଭାବେ ଆବେଦନ କରିବାକୁ ସିବିଆଇକୁ କହିଥିଲେ । ସିବିଆଇକୁ ସିସି କ୍ୟାମେରା ଫୁଟେଜ ହସ୍ତାନ୍ତର କରାଯାଇଛି । ଫୁଟେଜ ଯାଞ୍ଚରୁ ଶ୍ରୀ ସେଠୀଙ୍କ ସମ୍ପୃକ୍ତିର ସତ ସାମ୍ନାକୁ ଆସିବ । ସେହି ଆଧାରରେ ଆଗକୁ ଅନ୍ୟ ବ୍ୟକ୍ତିବିଶେଷ ଓ ସରକାରୀ ଅଧିକାରୀଙ୍କୁ ସମନ କରାଯିବ ।
ବ୍ରିଜ୍ ଆଣ୍ଡ ରୁଫ୍ ଗ୍ରୁପ୍ ସଂସ୍ଥାର ରାମମନ୍ଦିର ନିକଟସ୍ଥ ଅଫିସରେ ସିବିଆଇର ଏକ ଟିମ୍ ଯାଞ୍ଚ କରିଛି । କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ସଂଗ୍ରହ କରିଛି । ସଂସ୍ଥା ପୂର୍ବରୁ କାମ ନେଇଥିବା କିଛି ଟେଣ୍ଡରରେ ଅନିୟମିତତା ହୋଇଥିବା ଗନ୍ଧ ବାରିଛି ସିବିଆଇ । ସୋମବାର ୩ ଅଭିଯୁକ୍ତଙ୍କ ରିମାଣ୍ଡ ଅବଧି ସରୁଥିବାରୁ ସେମାନଙ୍କୁ ଅଦାଲତରେ ହାଜର କରାଯିବ । ଏହାପୂର୍ବରୁ ଶ୍ରୀ ସେଠୀ ହାଜର ହୋଇ ନିଜ ତଥ୍ୟ ଦେବେ ବୋଲି ସୂଚନା ମିଳିଛି । ଚଞ୍ଚଲ ଓ ସନ୍ତୋଷଙ୍କ ଓକିଲ ରାଜେଶ ମିଶ୍ର କହିଛନ୍ତି, ଚଞ୍ଚଲଙ୍କ ଦେହ ଖରାପ ହୋଇଛି । ତାଙ୍କୁ ହସ୍ପିଟାଲକୁ ପଠାଯାଇପାରେ । ସୋମବାର ଅଦାଲତରେ ଉଭୟଙ୍କ ଜାମିନ୍ ଆବେଦନ କରାଯିବ।
ଗତ ୧୧ ତାରିଖ ସୁଦ୍ଧା ସିବିଆଇରେ ହାଜର ହେବାକୁ ଶ୍ରୀ ସେଠୀଙ୍କୁ ସମନ ଜାରି କରାଯାଇଥିଲା । ତାଙ୍କ ଦୁଇ ଡ୍ରାଇଭର ନୃସିଂହ ଶତପଥୀ ଏବଂ ତୁଷାର କୁମାରଙ୍କୁ ଗତକାଲି ଦୀର୍ଘ ସମୟ ପାଇଁ ଜେରା କରାଯାଇଛି । ମଧ୍ୟସ୍ଥ ଦେବଦତ୍ତଙ୍କ କାର୍ଯ୍ୟାଳୟର ସବୁ ଅଧିକାରୀଙ୍କୁ ପଚରାଉଚରା ସରିଛି । ଏପରିକି ଦେବଦତ୍ତଙ୍କ ସ୍ତ୍ରୀ ଓ ସନ୍ତୋଷଙ୍କ ବାପାଙ୍କୁ ମଧ୍ୟ ସିବିଆଇ ପଚରାଉଚରା ଚଳିଛି ।
